2 Timoteo 2
2
Ököghömërrya ko-meremo ighya Waryobha
1Mbe, uwe omoona uwaane ku-mukumo ghono tokosanga, obhe na singuru kö örööbhö rono tukunyoora ku ukukumya Kiristo Yëësu. 2Amëëghyö ghaara waaighwa ndaghamba harabhu igho mo-bhaimërërri abhaaru, bhoono uwe oghaghööti abhantö abha heene, bhano bharaatore ukwëghya abhantö abhandë.
3Ghömërrya inyaanyi kya umusirikare umuuya uwa Kiristo Yëësu. 4Umusirikare umuuya ono akutuna omonene uwaaye ashomerwe, takokora emeremo ighya ubhusirikare na eno araishooghania-mo na gheno ghetarëngë ighya ubhusirikare. 5Kora ömöntö ono akokera abhandë kö-mëhöörwë, wonswe takutuhwa igho atakörrë bhuuya, kya bhono amaraghërryö agha ömöhöörwë ghuyö ghakutuna. 6Kora ömöntö uwa omotono ko okorema, uyö we aingʼarëëyi okobha uwa mbere ukunyoora ibhyakorya. 7Timoteo, witegherre bhuuya amangʼana ghano nkökötëëbhya. Omonene Waryobha nakohaana obhotoro ubhwa okomanya ghonswe igho.
8Uhiite Yëësu Kiristo uwa eka iya omokama Daudi.#2:8 Daudi. Maaha mo-faharaasa. Maaha mo-ketabho ikya 2 Samwëri 7:12-13. Waryobha yaamuryökëri ukurwa mo-bhaku. Ghayö ngo Amangʼana Amaiya ghano nkoraarekera abhantö. 9Ko okoghera iya amangʼana ghayö, öni nkunyanka ndë, na nkobhohwa ndë na iminyorro kya ömöntö omoghogho. Kasi engʼana iya Waryobha yo tekobhohwa hë. 10Ku bhuyö nköghömërrya ndë ghonswe igho, ko okoghera iya abhantö bhano bhaashaaghorwa na Waryobha igha bhabhe abhantö abhaaye. Nkokora ndë igho, okore abhantö bhayö bhahönibhwi ku ukukumya Kiristo Yëësu, kora bhasange ubhuhika ubhwaye bhono bhotakohwa.
11Engʼana eno ni-iya heene, igha,
“Nyoore twaakwa hamwë na Kiristo,
ntorebha abhahöru hamwë nawe.
12Hano toraaghömërri,
ntoretonga hamwë nawe.
Hano toraamwange,
wonswe naritwanga.
13Hano toraange okobha abhantö abha heene ku-Yëësu,
umwene nköghëndërrya arë okobha ömöntö uwa heene,
ko bhoora igha, umwene taatore ukwikaana hë.”
Amaraghërryö ko omotomwa uwa heene uwa Waryobha
14Uhiitöki abhakumya amangʼana ghayö, na okobhakaania mbere iya Waryobha, bhatakaanyeerananga senkaani ko obhongʼana bhoke bhoke. Ko bhoora senkaani siyö, teseena moremo hë, kasi senkaani siyö, nkosarya sërë bhano bhakwitegherra. 15Okore omotono ughwa ukwëghya engʼana iya obhoheene, kya bhono ikutunwa na Waryobha igha yëghiibhwi. Hayö ho oraabhe ömököri uwa emeremo ono atakosookera emeremo ighyaye. Ghayö ngo Waryobha akutuna.
16Kasi wibhashe amangʼana amanyanku, teghaana ubhwera bhwobhwonswe bhoora hë, ko bhoora igha amangʼana ghayö, nkotoora gharë abhantö hare bhököngʼu na Waryobha. 17Amëëghyö aghaabho ghayö, ngaraaromaane kya öbhörööyë obhoghogho ubhwa insisa. Mo-bhantö bhayö, bhaamo Himenayo na Fireto. 18Abhantö bhayö, bhaasira bhököngʼu. Bhaatigha obhoheene, ko bhoora bhakoghamba igha, ukuryoka ukwa abhaku kwamara okobha-ho kare. Amangʼana ghayö bhakoghamba, nkusirya bharë umukumo ughwa abhantö abhandë. 19Kasi abhantö bhano bhanaghirë, bho n-kya umusingi umuuya ghono Waryobha yaakora. Ku-musingi kuyö, amangʼana ghandëkirwë igha,
“Omonene Waryobha namanyirë abhantö abhaaye,”#2:19a Maaha mo-ketabho ikya Okobhara 16:5.
ghwiki igha,
“Ömöntö wowonswe ono akwibherekera igha nu-uwa Omonene Waryobha,
ni-igha atighe obhoghogho.”#2:19b Maaha mo-ketabho ikya Zabhuri 34:14.
20Mu-nyumba enene, bherabhanga-mo ëbhëntö ibhya seteemo nsharu, ëbhëntö ibhya esahaabhu na ibhya seehera, kora ibhya amatoto na ibhya ëmëtë. Ibhyëndë ni-ibhya okokorra emeremo ëmëhagharë, kasi ibhyëndë m-bya okokorra emeremo ghyoghyonswe gheno ghetarëngë ëmëhagharë. 21Mbe, hano ömöntö yaisaabhuura atighe obhoghogho bhuyö bhonswe igho, nkobha arë kya ëkëntö keno kyahorwa, ikya okokorra emeremo ëmëhagharë. Naraangʼarre ko-Monene uwaaye. Noraanyoore aisëëmëri okokora emeremo imiiya ghyonswe igho.
22Wibhashe oronamba urwa ubhumura. Oghoote-ko amangʼana agha heene, obhe na umukumo, righonshe, na omorembe. Onaghi ghayö, hamwë na bhonswe igho bhano bhakosaasaama Omonene Waryobha kwa enkoro inshiiya. 23Otakaabha na senkaani isya obhokangi seno setaana ubhwera, ko bhoora nomanyirë igha, senkaani kya siyö, ni-ribheeha sekoreeta. 24Ghwiki tiyingʼarëëyë igha ömököri uwa emeremo uwa Omonene Waryobha abhe umutindi. Kasi abhe ömöghömërrya, omohaabhu ko-bhantö bhonswe igho, kora abhe ömöntö ono aana obhotoro ubhwa ukwëghya. 25Ni-igha akaaninga abhantö bhohaabhu igho bhano bhakumunyeera senkaani, okore hanga Waryobha akabhakora bhahongore ëbhëbhë ibhyabho, bhamanye obhoheene. 26Hayö ho bharaasesemoke, bharwe mo-motegho ughwa Oghosambwa.#2:26 Oghosambwa. Maaha mo-faharaasa. Oghosambwa ghwabhaghöötya, nkokora bharë bhono ghukutuna.
© 2021, Wycliffe Bible Translators, Inc. All rights reserved.