मत्ती 23
23
शास्त्रियां ते फरीसियां का खबरदार
1तां यीशु ने भीड़ जो ते अपणे चेल्लेयां जो बोल्लेया, 2शास्त्रि ते फरीसी लोक्कां जो मूसा रे कानून जो सिखाणे रा हक्क है, 3इधेरे तांइ जे किच्छ से बोल्ले उस पर चलणा अते उन्हा जो मनणा, पर तिन्हेरे सांई कम्म मत करदे, किजोकी से मणू बाकियां जो तां सिखांदे पर अप्पु तिस पर नी चलदे। 4से इदेय-इदेय मुस्किल नियम बणांदे जे लोक्कां तांइ निभाणा बड़ा मुस्किल हुंदा, पर से तिन्हा नियमां पर रत्ती भर भी नी चलदे। 5से ठीक कम्म इधेरे तांइ करदे कि मणू उन्हा जो दिखण, से पवित्रशास्त्र रे लिख्खे री वचनां री लम्बी-लम्बी पट्टियां अपणे जिस्म पर बन्नी करी फिरदे, अते अपणे कपड़ेयां री झालरां जो बड़ा बड्डा करदे। 6धाम बिच खास जगाह्, ते सभास्थल बिच खास आसन चाह्ंदे, 7बजारां बिच प्रणाम ते मणूआं बिच तिन्हा जो गुरु बोलण किजोकी तिन्हा जो ए सब खरा लगदा। 8पर तुसा मणूआं बिच अप्पु जो गुरु मत बुलवान्दे, किजोकी तुसा रा इक्क ही गुरु है, ते तुसा सारे सिर्फ भैण भाई हिन। 9दुनिया पर मणूआं जो तुसा अपणे बिच का कुसकी जो भी अपणा प्यो मत बोलदे, किजोकी तुसा रा इक्क ही प्यो है, जे स्वर्ग बिच हिन। 10ते ना ही मणूआं जो तुसा अप्पु जो मालक बोलणा दिंदे, किजोकी तुसा रा मालक तां वस इक्क ही है, अते से मसीह यीशु ए। 11तुसा रे बिच का सबका खास मणू सेह्ई होणा जे तुसा रा नौक्कर बणगा। 12जे कोई अप्पु जो बड्डा बणागां, ओ छोटा कित्ता जाणा: ते जे कोई अप्पु जो छोटा बणागां, से बड्डा कित्ता जाणा।
शास्त्रियां ते फरीसियां रे बारे बिच
13ओ ढोंगी शास्त्रियों, ते फरीसी लोक्कों, तुसा पर लाणत है! तुसा लोक्कां जो स्वर्ग रे राज बिच नी जाणा दिंदे, ना तां अप्पु खुद उस बिच जांदे अते ना ही उन्हा जो जाणे दिंदे जे जाणे तांइ कोसीस करेया करदे हिन। 14ओ ढोंगी शास्त्रियों, ते फरीसी लोक्कों, तुसा पर लाणत है! तुसा धोखे कने विधवा जनानियां री जमीन-जायदाद हड़पी लिन्दे, अते दिखावे तांइ लम्बी-लम्बी प्रार्थना करदे, इधेरे तांइ तुसा जो कड़ी सजा मिलणी। 15ओ ढोंगी शास्त्रियों, ते फरीसी लोक्कों, तुसा पर लाणत है! तुसा कुसकी मणू जो अपणे मत बिच मिलाणे तांइ दुर-दुर पूजी जांदे अते जां से तुसा रे मत पर मिली जांदा तां तुसा तिसजो अप्पु का भी जादा नरक बिच पाए जाणे जोग्गा बणाई दिंदे। 16ओ अन्ने अगुवों, तुसा पर लाणत है! जे बोलदे कि मन्दिर री कसम खाणा कोई बड्डी गल्ल नी पर जे कोई मन्दिर रे सुन्ने री कसम खांदा तां तिसजो कसम जो मनणा जरुरी है। 17ओ अन्ने बेवकूफों! बड्डा कुण है? मन्दिर रा सुन्ना या से मन्दिर जिनिये उस सुन्ने जो पवित्र बणेया। 18तुसा ए भी बोलदे जे कोई वेदी री कसम खांदा तां किच्छ नी, पर जे कोई वेदी पर रखे रे चढ़ावे री कसम खांदा तां से अपणी कसम बिच बह्नितेरा है? 19ओ अन्नेयो! कुण बड्डा है? वेदी पर रखे रा चढ़ावा या से वेदी जिस कने से चढ़ावा पवित्र हुन्दा? 20इधेरे तांइ जे कोई मन्दिर री कसम खादां, तां से वेदी कने वेदी पर जे रखे रा है, उसेरी भी कसम खांदा। 21जे मन्दिर री कसम खांदा, से तिसेरे बिच बसणे वाले परमेश्वर री भी कसम खांदा। 22जे स्वर्ग री कसम खांदा, से परमेश्वर रे सिंहासन कने जे जे उस सिंहासन पर बैठ्ठे रा है उसेरी भी कसम खांदा। 23“ओ ढोंगी शास्त्रियों, ते फरीसी लोक्कों, तुसा पर लाणत है! तुसा पुदिन्ने ते सौंफ ते जीरे रा तां दसमाअशं दिदें, पर न्याय, दया, ते विश्वास जदेई मूसा रे कानून री जरुरी गल्लां जो छड्डी दित्ते रा है; जरुरी थिया कि तुसा दसमाअशं भी दिंदे रैहन्दे ते ए कम्म भी कमादें रैहन्दे। 24ओ अन्ने अगुवों! तुसा परमेश्वर री छोटी-मोटी गल्लां मनणे बिच इन्ने सतर्क रैहन्दे कि जिय्यां पाणी भी मच्छर भी ना पैणे देयो पर परमेश्वर री बड्डी ते जरुरी बिच इय्यां लापरवाही दिखांदे कि जिय्यां ऊँट भी निगली जाओ। 25ओ ढोंगी शास्त्रि ते फरीसी लोक्कों! तुसा पर लाणत है, जिय्यां भांडे बाहर का तां साफ पर अंदर का गंदे हुंदे, तिय्यां ही तुसा भी अप्पु जो लोक्कां सामणे तां पवित्तर बणी करी दसदे पर अंदर का लालच ते मतलबीपन कने भरे रे हिन। 26ओ अन्ने फरीसियों! जिय्यां भांडेया जो भी का अंदर का भी साफ-सुथरा होणा चाएदा तिय्यां ही तुसा भी पैल्ले अपणे लालचीपन ते मतलबीपन जो छड्डो, तां ही पवित्तर बणी सकदे। 27ओ कपटी यहूदी धर्मशास्त्रियों! अते फरीसियों! तुसा पर लाणत है तुसा चैन कने लिपि री कब्रां सांई हिन जे बाहर का तां छैल लिबदी पर अन्दर का मरे रेयां रे हड्डियाँ अते हर तरह री गन्दगी कने भरितेरे हिन। 28इय्यां ही तुसा बाहर का तां धार्मिक लिबदे हिन पर अन्दर का छल-कपट अते अधार्मिकता कने भरितेरे हिन।”
शास्त्रियां ते फरीसियां पर सजा री भविष्यवाणी
29ओ ढोंगी शास्त्रियों, ते फरीसी लोक्कों, तुसा पर लाणत है, तुसा तिन्हा भविष्यद्वक्ता री कब्रां जो सजान्दे जिन्हा जो तुसा रे पूरखां ने मारेया, तिन्हा अते धार्मिक लोक्कां रे री कब्रां जो बणान्दे जिन्हा जो तुसा रे पूरखां ने खतम कित्ता, 30अते बोलदे हिन कि, जे तुसा अपणे पूरखां रे बेल्ले बिच हुन्दे तां भविष्यद्वक्ता रा खून करणे बिच उन्हेरा हत्थ बटान्दे। 31इस कने ए साबित हुंदा कि तुसा भविष्यद्वक्तां रे खून करणे वालेयां रे औलादां हिन। 32इधेरे तांइ मैं जाणदा कि जे बुराई तुसा रे पूरखां ने सुरु कित्तेया, तुसा तिसजो पूरा करणा। 33तुसा जहरिल्ले कीड़े ते जहरिल्ले किड़ेयां रे बच्चेयां सांई खतरनाक हिन, तुसा किय्यां सोचदे कि तुसा नरक री आग्ग बिच सजा भोगणे का बची जाणा। 34इधेरे तांइ दिख्खो, मैं तुसा का भविष्यद्वक्ता, समजदार ते शास्त्रि लोक्कां जो भेजेया करदा है, तुसा उन्हा बिच का किन्नेयां जो मारी दैणा अते किन्नेयां जो सुली पर चढ़ाई दैणा, किन्नेयां जो तुसा अपणी सभास्थल बिच कोड़े लगाणे अते इक्क सहर का दूज्जे सहर उन्हेरा पीच्छा करदे फिरणा। 35जिस कने धार्मिक हाबिल का लेई करी बिरिक्याह रे पुत्तर जकरयाह तांइ, जिस जो तुसा मन्दिर अते वेदी रे मझाटे मारी रख्खेया थिया, जितणे धार्मिक लोक्कां रा खून धरती पर होए रा है उन्हा सब री सजा तुसा जो मिलणी। 36मैं तुसा रे कने सच बोलदा इस सब तांइ किच्छ तांइ इस पीढ़ी रे मणूआं जो सजा भोगणा पैणी।
यरुशलेम सहर तांइ रोणा
37ओ यरुशलेम सहर रे लोक्कों! तुसा इदेय मणू हिन जे भविष्यद्वक्तां जो मारी रखदे अते परमेश्वर रे भेजे दूतां जो पत्थर मारदा, मैं कितणी वरी चाया कि जिय्यां कोई मुर्गी अपणे चुज्जेयां जो अप्पु का कठेरी करी बचाई लिंदी तिय्यां ही मैं तेरे बच्चेयां जो बचाणा चाएया, पर तुसा मणूआं ने नी चाया। 38ते अवे दिख्खो, तेरा मन्दिर पूरी तरह कने उजड़ी जाणा, 39किजोकी मैं तुसा जो दसदा। कि तुसा मेरे जो तां तांइ नी फिरी दिख्खी सकणा जां तांइ तुसा ए नी बोलणा: धन्न ए से जे प्रभु रे अधिकार कने आया करदा है!
Seçili Olanlar:
मत्ती 23: CDHNT
Vurgu
Paylaş
Karşılaştır
Kopyala
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
Chambeali Bible (चम्बयाळी बाइबिल) 2020 by The Love Fellowship is licensed under a Creative Commons Attribution-ShareAlike 4.0 International License.
