लूका 17

ठोक्कर लगणे री वजह बणना

1यीशु ने अपणे चेल्‍लेयां जो बोल्लया, जिन्हा गल्लां कने मणूआं जो ठोकर लगदी से गल्लां तां होणी ही हिन, पर लाणत है तिस मणू पर जिसेरी वजह कने से ठोकर आन्दी 2तिसेरे तांइ ए जादा खरा हुन्दा कि बजाय इसेरे कि से इन छोटे मणूआं बिच का कुसकी जो पाप करणे पर मजबूर करी सकें, तिसेरे गले पर चक्की रा पाट लटकाई करी तिसजो समुन्द्र बिच सूटी दित्तेया जान्दा 3इस गल्ल रा ध्यान रख्खो, कि तेरा संगी विश्वासी पाप करे तां तिसजो समझा, जे से अपणी गलती मन्दा तां तिसजो माफ कर। 4अगर जे कोई इक्क रोज बिच सत्त वरी तेरे कने बुरा करदा, अते सत्त वरी ही तेरे का आई करी बोल्ले कि मेरे जो बड़ा मोह् होया करदा है अपणी गलती रा, तां तिसजो सत्तो वरी माफ कर 5तां यीशु रे बारा प्रेरितां ने बोल्लेया, प्रभु जी, असा जो विश्वास बिच मजबूत बणाओ।

विश्वास

6प्रभु यीशु ने तिन्हा जो बोल्लेया, जे तुसा रा विश्वास सरेयाँ रे दाणे रे बराबर भी हुंदा, तां तुसा इस शहतुत रे बूट्टे जो बोल्ल गे, कि तू जड़ा का बुट्टि करी समुन्द्रा बिच लग्गी जा, तां तिन्ने तुसा री मन्नी लैणी थी।

इक्क दास रा फर्ज

7जे अगर तुसा रा नौक्कर हल बाई करी या भेड़ा जो चराई करी आए, तां तिसेरे मालक जो तिसजो रोट्टी खाणे तांइ बोलणा चाएदा। 8पर से तिसेरे बजाए, कै ए नी बोल्गा, कि मेरे तांइ रोट्टी तैयार कर, ते जां तांइ मैं रोट्टी खाई नी लिन्दा तां तांइ कमर कसी करी मेरी सेवा कर अते जां मैं रोट्टी खाई लिन्गा तां तिसेरे बाद तू भी खाई लेयां? 9तुसा अपणे नौक्कर रा से सारे कम्म करणे तांइ जे तुसा तिसजो दित्ते थिये, शुक्रिया नी करणा! 10इय्यां ही जां तुसा परमेश्वर रे कम्म जो पूरा करी री बैंदे, तां तुसा ए बोल्लेयो कि असी तां तारिफ लायक नी हिन किजोकी असा ने से ही कित्तेया जे असा जो करणा चाएदा थिया।

दस कोढ़ रे मरीजाँ जो ठीक करणा

11इक्क रोज इय्यां होया कि यीशु ते तिन्हेरे चेल्‍ले यरुशलेम सहर जो जान्दे बेल्ले गलील प्रदेश अते सामरिया प्रदेश री सीमा रे बिच का होई करी जाया करदे थिये। 12कुसकी ग्रां बिच बड़दे बेल्ले यीशु जो दस्स कोढ़ियां #17:12 मूसा रे कानून रे हिसाब कने कोढ़ी लोक्कां जो ग्रां या कस्बे का बाहर रैह्णे ते लोक्कां का दुर रैह्णे रा हुकम थिया। कने मिल्ले, 13अते तिन्हा ने यीशु जो जोर सणे हक्क लाई अते बोल्लेया, ओ यीशु, ओ मालक, असा पर दया करो! 14यीशु ने तिन्हा जो दिख्खेया अते बोल्लेया, कि अपणे आप जो पुरोत्तां जो दिख्खाओ। जां से यीशु री गल्ल मन्नी करी वापिस हटेया करदे थिये तां से रस्ते बिच ही कोढ सुच्चे होई गे। 15तिन्हा दस्स कोढ़ियां बिच का इक्क ने दिख्खेया कि मैं खरा होई गेया तां से परमेश्वर री बड़ाई करदे करदे यीशु का आया, 16अते तिन्हेरे पैरा पर मूह् रे भारे पेया ते तिन्हेरा शुकर करणे लग्गेया कने से इक्क सामरिया प्रदेश रा मणू थिया। 17यीशु ने तिसजो पूच्छेया, कै मैं दस्स जणेया जो सुच्चा नी कित्ता, फिरी से बाक्की नौ कुदे हिन? 18कै परमेश्वर री बड़ाई करणे तांइ इस परदेसी जो छडी, होर कोई नी आया? 19यीशु ने तिसजो बोल्लेया, उठ अते जा, तेरे विश्वास करणे री वजह कने तू कोढ का ठीक होई गेया।

परमेश्वर रे राज रा आणा

20जां फरीसियां ने यीशु का पूच्छेया, कि परमेश्वर ने राज करणे तांइ कधाड़ी आणा, तां तिन्हा ने जवाब दित्ता, परमेश्वर रा राज तुसा रे हिसाब कने लिब्बणे वाली निशानियां कने नी आणा 21अते मणूआं ने ए नी बोल्णा, कि दिख्खो, इत्ते है, या उत्ते है किजोकी, परमेश्वर रा राज तुसा रे बिच् है 22फिरी यीशु ने चेल्‍लेयां जो दस्सेया, कि से रोज आणे, जां मणू रे पुत्तर, जे मैं ही है राज करणा तां तुसा तिस रोज जो दिख्खणे तांइ तरसी जाणा, पर दिख्खी नी पाणा। 23मणूआं ने तुसा जो बोलणा कि मणू रा पुत्तर, जे मैं ही है राज करणे तांइ आई गे रा है। मते जणेया ने बोलणा कि मसीह से इत्ते है, या मसीह उत्ते है, पर मैं तुसा जो बोल्दा, कि तुसा तिसेरे पीच्छे मत चली जान्दे, या तिन्हा गल्लां पर विश्वास मत करी बैन्दे। 24जिय्यां आसमान बिच बिजली इक्क कुणे का दूए कुणे तक लसकदी, तिस ही तरिक्के कने मणू रे पुत्तर, जे मैं ही है अपणे समय बिच ही प्रकट होणा। 25पर ए सब गल्लां होणे का पैल्ले ए जरुरी है कि मणू रा पुत्तर, जे मैं ही है जो बड़े दुख सैह्णे पैणे अते इस जुग दे मणूआं ने मेरे जो तुच्छ समझणा, 26मणू रा पुत्तर, जे मैं ही है रे राज करणे रे बेल्ले बिच भी ओई होणा, जेड़ा नूह रे बेल्ले होया थिया, 27किजोकी नूह रे जहाज पर चढ़ने का पैल्ले तांइ भी ब्याह हुदें थिये, अते धाम्माँ बिच खाणा-पीणा, हुन्दा थिया अते इक्क रोज इदेया हड़ आया कि तित्ते सब किच्‍छ तैहस-नैहस होई गेया 28अते तिय्यां ही जां लूत सदोम सहर बिच रेया करदा थिया तां तित्ते रे मणू भी खान्दे-पिन्दे अते काम्म-धन्दे बिच लैण-दैण करदे रैहन्दे थिये, अते खेती-बाड़ी अते घर-बार बणाणे बिच लग्गी रैह्‍न्दे थिये 29पर इक्क रोज जां लूत सदोम सहर का चली गेया अते तिसेरे जाणे का बाद तिस सहर रे लोक्कां पर आग्ग अते गन्धक आसमान का बरसी पेई अते तित्ते सब किच्‍छ तबाह् होई गेया 30तिस दिन भी इदेया ही होणा जां मणू रे पुत्तर, जे मैं ही है, चाणचक्के ही वापिस हटणा। 31उस रोज जे मणू अपणे घरे री छत्ती पर हो अते से अपणा समान लैणे जो थल्ले ना उतरो अते तिय्यां ही जे अपणे खेत्रां अन्दर होण से अपणे घरां जो ना हटन 32लूत री लाड़ी जो चेत्ता करो, कि उस कने कै होया थिया? 33जिस कुसकी ने अपणी जान बचाणे री कोसीस करणी तिसने तिसजो गवाई दैणा ते जिस ने तिसजो दाव पर लाणा तिसने अपणी जान बचाई लैणी। 34मैं तुसा जो बोल्दा, कि तधाड़ी राती दो मणू इक्क मन्जे पर सुत्ते रे होणे अते इक्क अपणे कने लेई जाणा अते दुज्जा छड्डी दित्ता जाणा 35तधाड़ी दो जनानियां आट्टा पिह्न्दी होणी अते इक्क अपणे कन्ने लेई जाणी अते दुई छड्डी दित्ती जाणी 36तधाड़ी दो जणे खेत्रा बिच हुन्गे, इक्क लेई लिता जाणा ते दुजा तित्ते ही रेई जाणा 37ए सुणी करी चेल्‍लेयां ने पुछेया कि, ओ प्रभु ऐसा कुस जगाह् हुणा? यीशु ने तिन्हा जो जवाब दित्तेया, सारे लोक्कां जो ए इय्यां पता लग्गी जाणा कि ए कुते होणा जिय्यां कि इल्लणां रे कठीणे पर लास रा पता चलदा।

Seçili Olanlar:

लूका 17: CDHNT

Vurgu

Kopyala

Karşılaştır

Paylaş