जकर्या 4
4
सदीअ अर जैतूने बूट
1ज़ुंण स्वर्ग दूत मुंह संघै गल्ला करदअ त लागअ द, सह आअ मुंह सेटा भिई अर तेऊ झ़ैऊअ हुंह निंजा सुत्तै दै मणछा ज़िहअ खल़अ। 2तेऊ स्वर्ग दूतै पुछ़अ मुखा इहअ, “ताखा किज़ै शुझिआ?”
मंऐं दैनअ ज़बाब, “मुखा शुझिआ च़ोखै सुन्नैं ओ सदीअ, तेथ प्रैंदै आसा कऊली अर तेथ आसा सात दीऐ, हर दीऐ दी आसा बाती लै सात-सात नाल़ी। 3सदीऐ सेटा आसा जैतूने दूई बूट, एक आसा कऊलीए दैहणीं बाखा अर दुजअ आसा बाऊंईं बाखा।”
4तेखअ पुछ़अ मंऐं सह दूत ज़ुंण मुंह संघै गल्ला करदअ थिअ लागअ द, “मेरै मालक, ईंयां किज़ै आसा?”
5तेऊ स्वर्ग दूतै बोलअ, “ताखा कै एतो थोघ आथी निं?”
मंऐं बोलअ, “मेरै मालक, मुखा निं थोघै!”
6तेखअ खोज़अ तेऊ स्वर्ग दूतै मुखा, “जरूबाबेला लै का खोज़ बिधातो अह समाद कि स्वर्गे सारी सैनो मालक बिधाता बोला इहअ, ‘तूह हणअ सफल, पर सह निं तेरी सैने बल अर तेरै आपणैं ज़ोरा करै हणअ, पर सह हणअ मेरी आत्मां करै।
7“‘बडै पर्बता, तूह निं जरूबाबेला सेटा किछ़ बी आथी! तूह हणअ धरनीं सरली ज़ैगा ज़िहअ। जरूबाबेला लाणअ मेरै भबनो मडाथरूओ पात्थर अर फेर हणैं लोग एही ज़ै-ज़ैकार करदै लागै दै कि बिधाता लोल़ी एता लै बर्गत दैनी! बिधाता लोल़ी एता लै बर्गत दैनी!’”
8बिधाता दैनअ मुखा भिई समाद, 9“जरूबाबेलै आसा आपणैं हाथै मेरै भबने आथरीओ पात्थर लाअ द। तेऊ ई करनअ एऊ भबनो काम पूरअ बी।” तेखअ लागणअ तम्हां का आप्पै थोघ कि स्वर्गे सारी सैने मालक बिधाता आसा हुंह तम्हां सेटा लै छ़ाडअ द।
10तेऊ स्वर्ग दूतै खोज़अ मुखा इहअ, “ईंयां सात दीऐ आसा बिधाते सात आछी ज़ुंण सारी पृथूई हअ भाल़ी लागी दी। थोल़ी च़िज़ा हंदी भाल़ी निं तिंयां धैल़ी कोही बृथा लाई समझ़ी! तिन्नां हणअ जरूबाबेले हाथै साहुल भाल़ी खुश।”
11तेखअ पुछ़अ मंऐं तेऊ स्वर्ग दूता का, “सदीऐ दैहणीं अर बाऊंईं बाखा ईंयां जैतूने बूट किज़ै आसा?”
12तेखअ पुछ़अ मंऐं भिई, “ईंयां जैतूने बूटे शाण्हीं किज़ै आसा ज़ुंण कऊली दी तेला तरैल़णें सुन्नें दूई नाल़ी सेटा आसा?”
13तेऊ स्वर्ग दूतै खोज़अ मुखा इहअ, “ताखा कै थोघै निं आथी कि ईंयां किज़ै आसा?”
मंऐं बोलअ, “मेरै मालक, मुखा निं थोघै।”
14तेऊ खोज़अ मुखा इहअ, “ईंयां आसा तिंयां दूई मणछ ज़ुंण सारै संसारा मांझ़ै बिधाते च़ाकरी करना लै आसा छ़ांटै दै।”
Seçili Olanlar:
जकर्या 4: OSJ
Vurgu
Kopyala
Karşılaştır
Paylaş
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
This work is licensed under Creative Commons Attribution-ShareAlike 4.0 License.