प्रकाशन 10

स्वर्ग दूत अर होछ़ी ज़ेही जंतरी

1तेखअ भाल़अ मंऐं जोधअ स्वर्ग दूत। तेऊ फेर तै बादल़ अर सह थिअ लागअ द स्वर्गा का उंधै होथदअ, तेऊए मुंडा प्रैंदै ती फणैरी, तेऊओ मुंह थिअ सुरज़ा ज़िहअ अर तेऊए खूर तै आगीए थाम्हा ज़िहै। 2तेऊए हाथै ती एक होछ़ी जंतरी ज़ुंण खुल्ही आसा ती, तेऊ त आपणअ दैहणअ खूर समुंदरै अर बाऊंअ खूर थिअ धरती दी डाहअ द। 3तेऊ स्वर्ग दूतै पाई ज़ोरै हाक अर तेऊओ बोल त इहअ, ज़िहअ सिह क्रुंगा। ज़ांऊं सह हाक पाआ त, साता बारी हआ तै गुल़ूबिज़ल़ू, ज़ुंण बोल तेऊ बोलै, तिन्‍नां सका त हुंह समझ़ी।

4ज़ांऊं सात बारी गुल़ूबिज़ल़ू बोली मुक्‍कै, मंऐं हेरअ त तेते बारै तेभी लिखी लाई पर स्वर्गा का शूणअ मंऐं तैहा ई घल़ी एक इहअ बोल, “ज़ुंण तंऐं ईंयां गुल़ूबिज़ल़ू संघै बोल शूणैं, इना निं लिखी, इना डाहै गुप्त।”#दान. 8:26; 12:4

5ज़ुंण स्वर्ग दूत मंऐं समुंदर अर धरती दी खल़्हुअ द भाल़अ, तेऊ च़कअ आपणअ दैहणअ हाथ स्वर्गा बाखा लै।#बधा. 32:40 6ज़ुंण जुगै-जुगै ज़िऊंदअ आसा अर ज़ुंणी स्वर्ग, पृथूई, समुंदर अर सोभै गल्‍ला बणाईं तेऊए सोह खाई करै बोलअ,#प्रका. 4:11

7“ऐबै निं होर बल़ैग पल़णीं, तेऊ करनअ हेरा-हेरी काम। ज़ेही ई सातुऐ स्वर्ग दूता नाद बाज़णीं, परमेशरा करनअ आपणअ गुप्त भेद पूरअ ज़ुंण खुशीओ समाद तेऊ आपणैं दास अर गूरा का आसा खोज़अ द।”#इफि. 3:3; आम. 3:7

8तेखअ शूणअ भिई मंऐं एक बोल सह बोलअ मुल्है स्वर्गा का। सह बोल बोला त मुल्है इहअ, “डेऊ, ज़ुंण स्वर्ग दूत समुंदरै अर समुंदरे बाढै धरती दी आसा खल़्हुअ द तेऊए हाथा का ढाक ऐहा खोल्ही दी जंतरी आप्पू का।” 9तेखअ बोलअ मंऐं तेऊ स्वर्ग दूता सेटा डेऊई, “ऐहा होछ़ी जंतरी दै मुल्है।” तेऊ दैनअ मुल्है ज़बाब, “निंऊं अर ऐहा खा। तेरी खाखा लागणीं मखीरा का ज़ादी मिठी, पर तेरअ पेट हणअ थोल़ी घल़ी बाद कल़ुअ।”#एज. 3:1-3

10तेखअ ढाकी मंऐं सह होछ़ी जंतरी स्वर्ग दूते हाथा का संघा खाई। सह कताब मेरी खाखा मखीरा ज़ेही मिठी ता ज़ाण्हुंई पर ज़ांऊं मेरै पेटै डेऊई, मेरअ पेट हुअ कल़ुअ। 11तेखअ बोलअ मुल्है इहअ, “तूह खोज़ सोभी ज़ाती, सोभी देशा का, सोभी भाषा-बोली लै अर राज़ै का एकी बारी भिई तिन्‍नां गल्‍ला ज़ुंण परमेशर ताखा खोज़णा लै बोले।”

Seçili Olanlar:

प्रकाशन 10: OSJ

Vurgu

Kopyala

Karşılaştır

Paylaş

Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın

This work is licensed under Creative Commons Attribution-ShareAlike 4.0 License.

बाघली सराज़ी बोली दी पबित्र शास्त्र Hakkında Daha Fazlasını Öğrenin

प्रकाशन 10