मार्कुस 16
16
ईशूओ मरी करै ज़िऊंदै हणअ
(मोत्ती 28:1-8; लूका 24:1-12; जोहन्ना 20:1-10)
1ज़ांऊं बशैघे धैल़ी-बिति, मगदल़ गराऊंए मरिअम अर याकबे ईज मरिअम अर सलोमी आणी बडी खुशबूदार च़िज़ा ताकि ईशूए ल्हासा दी मल़ी सके।
2हबते पैहली धैल़ी दोत्ती-दोत्थी धुप्पै लागदी पुजी तिंयां तैहा घोरी सेटा ज़िधी ईशू त डाहअ द। 3तिंयां ती लागी दी आप्पू मांझ़ै गल्ला करदी, “हाम्हां लै घोरीए मोहरै लाई दी बडी टोल्ह कहा दैणीं बदल़ी?” 4ज़ांऊं तिन्नैं भाल़अ कि घोरी का आसा टोल्ह पोर्ही बदल़ी दी, अर सह थिई खास्सी बडी टोल्ह।
5ज़ांऊं तिंयां घोरी भितरी डेऊई, तिन्नां का शुझुअ एक शेतै झिकल़ै आल़अ ज़ुआन मणछ दैहणीं बाखा बेठअ द अर तिंयां हुई बडी रहैन।
6तेऊ ज़ुआन मणछै बोलअ तिन्नां लै, “तम्हैं किल्है हुई रहैन! तम्हैं ईशू नासरी लोल़ी आसा लागी दी ज़ुंण क्रूसा दी छ़ड़ाऊअ त? तै शूणां, सह हुअ ज़िऊंदअ अर सह निं इधी आथी। भाल़ा, अह आसा सह ई ज़ैगा, ज़िधी तेऊए ल्हास ती डाही दी।
7“पर तम्हैं डेओआ पतरासा सेटा लै तेऊ का खोज़ै अर होरी च़ेल्लै का बी खोज़ै इहअ कि सह डेऊणअ तम्हां का आजी गलील मुल्खा लै। ज़िहअ तेऊ तम्हां लै बोलअ त तम्हां भेटणअ सह तिधी।”
8तिंयां बेटल़ी लागी डरै काम्बदी अर तिंयां ठुर्ही घोरी सेटा का अर तिन्नैं निं डरै कोही का खोज़अ।
मगदल़ गराऊंए मरिअमा का ईशू शुझणअ
(मोत्ती 28:9-10; जोहन्ना 20:11-18)
9हबते पैहलै धैल़ै दोत्ती-दोत्थी शुझुअ ईशू ज़िऊंदै हणैं का बाद सोभी का आजी मगदल़ गराऊंए मरिअमा का, ज़हा का ईशू सात भूत काढै तै।
10सह डेऊई ईशूए च़ेल्लै सेटा लै, तिंयां थिऐ खास्सै दुखी लेरदै-पकारदै लागै दै। तैहा खोज़ी तिन्नां का सारी गल्ला। 11ज़ांऊं तैहा तिन्नां का खोज़अ, “ईशू हुअ ज़िऊंदअ अर मंऐं भाल़अ सह आपणीं आछी।” पर तिन्नैं निं तेसे गल्लो विश्वास किअ।
ईशू शुझुअ दूई च़ेल्लै का
(लूका 24:13-35)
12इना एही गल्ला हणैं बाद शुझुअ ईशू दूई होरी च़ेल्लै का। तिंयां च़ेल्लै तै एरुशलेम नगरी का तिन्नें गराऊंआं लै डेऊंदै लागै दै, तिन्नैं निं ईशू बछ़ैणअ किल्हैकि तिन्नां का ज़ाण्हुंई ईशूए नर्हांग होरी रंगे। 13तिन्नैं बी खोज़अ होरी सोभी का ऐहा गल्लो समाद पर तिन्नैं होरी च़ेल्लै निं तिन्नें गल्ला दी बी विश्वास किअ।
सोभी गैरा च़ेल्लै का ईशू शुझणअ
(मोत्ती 28:16-20; लूका 24:36-39; जोहन्ना 20:19-23; शधाणूं 1:6-8)
14तेखअ शुझुअ सह तिन्नां गैरा च़ेल्लै का बी, ज़ांऊं तिंयां रोटी खांदै तै बेठै दै। ईशू नैरै तिंयां किल्हैकि तिन्नैं मन्न तै एतरै काठै हुऐ दै कि ज़ुंणी ज़िऊंदअ हई ईशू भाल़अ त तिन्नैं निं तिन्नें गल्ला दी विश्वास किअ।
15ईशू बोलअ तिन्नां लै, “तम्हैं डेओआ सारै संसारै, अर सारै संसारे सोभी ज़ातीए लोगा का खोज़ा खुशीओ समाद। 16ज़ुंण विश्वास करे अर पापो प्राश्त करने डुबकी लए, उद्धार भेटणअ तेऊ ई अर ज़ुंण विश्वास निं करे सह हणअ दोशी।
17 “विश्वासा करनै आल़ेए हणैं ईंयां नछ़ैण, कि तिन्नां काढणैं मेरै नाओंआं करै मणछा का भूत पोर्ही अर तिन्नां बोल़णीं नऊंईं-नऊंईं भाषा। 18तिन्नां च़कणी दानुईं बी हाथै अर नज़ाणै दी तिंयां ज़ैहर बी झुटे ता, तैबी निं तिन्नां किछ़ हणअ, अर रोगी मणछा लै बी ज़ै तिंयां आपणैं हाथा करै छुंए तिंयां हणैं नरोगै।”
ईशूओ स्वर्गा लै डेऊणअ
(लूका 24:50-53; शधाणूं 1:9-11)
19तिन्नां च़ेल्लै संघै गल्ला करनै का बाद च़कअ परमेशरै ईशू तिन्नें आछी सम्हनै उझै स्वर्गा लै। संघा बशैल़अ सह आपणीं दैहणीं बाखा सोभी का बडी पदबी दी।#1 पत. 3:22
20एता बाद लागै तिंयां एरुशलेम नगरी का हांढदै अर तिन्नैं खोज़ी ईंयां गल्ला सारै दी अर ज़िधी बी तिंयां डेऊऐ, ईशू रहअ तिन्नां करै नछ़ैण अर च़मत्कार करदअ लागी। एता करै रहैऊअ ईशू लोगा का कि परमेशरो खुशीओ समाद आसा शुचअ। एवमस्तू।
Seçili Olanlar:
मार्कुस 16: OSJ
Vurgu
Kopyala
Karşılaştır
Paylaş
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
This work is licensed under Creative Commons Attribution-ShareAlike 4.0 License.
