मोत्ती 8
8
कोहल़ो रोगी किअ शुचअ
(मार्कुस 1:40-45; लूका 5:12-16)
1ज़ांऊं ईशू धारा का उंधै होथअ, तेऊ पिछ़ू लागै खास्सै मणछ हांढदै। 2तिन्नां मांझ़ा का आअ एक मणछ ज़हा कोहल़ ती निखल़ी दी। तेऊ टेक्कअ ईशू सेटा माथअ संघा किई एही अरज़, “हे प्रभू, ज़ै तूह च़ाहे, तूह सका मुंह एऊ कोहल़ा का शुचअ करी।”
3ईशू छ़ुंअ सह आपणैं हाथा करै संघा बोलअ, “हुंबी च़ाहा इहअ ई, तूह लोल़ी एभी शुचअ हुअ।” अर सह हुअ तेभी कोहल़ा का शुचअ। 4ईशू बोलअ तेऊ लै, “हेरे, ऐहा गल्ला निं होरी कोही का खोज़ी। हाँ, प्रोहता सेटा डेऊई एछ आप्पू रहैऊई अर कोहल़ा का शुचै हणें बारै ज़ुंण बधान परमेशरे गूर मोसा आसा खोज़अ द तेऊ साबै दै भैंट। ताकि तिंयां भाल़े कि तूह गअ कोहल़ा का शुचअ हई।”#8:4 लेब. 14:2-32
सैने एकी दरबारीओ विश्वास
(लूका 7:1-10)
5ईशू डेऊअ कफरनहूम नगरी लै, तिधी आअ एक सुबैदार ईशू सेटा लै संघा लागअ एही अरज़ करदअ, 6“हे प्रभू, मेरै आसा घअरै एक दास च़ैन्नै सुत्तअ द खास्सअ दुखी तेऊ आसा दरंग हुअ द।”
7ईशू बोलअ तेऊ लै इहअ, “हुंह आअ तेरै घअरा लै, तेऊ करूं हुंह नरोगै।”
8सुबैदारै बोलअ ईशू लै, “हे प्रभू, हुंह निं एता जोगी आथी कि तूह मेरै घअरै एछी सके। तूह कर इधी का हुकम अर मेरअ दास जाणअ नरोगअ हई, एतो आसा मुंह पाक्कअ भरोस्सअ।
9“किल्हैकि हुंह आसा आप्पू बी सरकारी दास अर मुंह आसा आप्पू उंधै काम करनै आल़ै सपाही लै हुकम करनैओ हक। ज़ांऊं हुंह कहा लै पोर्ही डेऊणा लै बोला, सह डेओआ पोर्ही अर ज़हा लै ओर्ही एछणा लै बोला, सह एछा ओर्ही अर आपणैं दासा लै बोला हुंह कि इहअ कर, सह करा तिहअ ई।”
10ईशू हुअ तेऊए गल्ला शूणीं रहैन। तेऊ बोलअ तिन्नां लै ज़ुंण तेऊ पिछ़ू तै हांढदै लागै दै, “हुंह खोज़ा तम्हां का सत्त कि मंऐं निं एऊ होरी ज़ातीए मणछा ज़िहअ विश्वास पूरै इज़राईला दी भाल़अ। 11हुंह बोला तम्हां लै इहअ कि च़ऊ दिशा का एछी बेशणै लोग आबराम, याकब अर इसहाका संघै स्वर्गे राज़ा दी।
12 “पर ज़हा यहूदी लै परमेशरै राज़ दैणअ किअ त, तिंयां काढणैं बागै न्हैरी जम्परी लै। तिधी हणैं तिंयां लैल़ा लांदै अर दाहे झोशा करै दांदा कटिल्लदै लागै दै।”
13तेखअ बोलअ ईशू तेऊ सुबैदारा लै, “घअरा लै डेऊ, ज़िहअ तूह विश्वास करा, ताल्है लोल़ी तिहअ ई हुअ” सुबैदारो दास हुअ तेभी नरोगअ।
ईशू किऐ खास्सै रोगी नरोगै
(मार्कुस 1:29-34; लूका 4:38-41)
14तेखअ आअ ईशू पतरासे घअरै अर तिधी त पतरासे शाशुई ज़अर आअ द। 15ईशू छ़ुंअ तेसो हाथ, सह उझ़ुई तेभी खल़ी अर सह लागी तिन्नें च़ाकरी करदी।
16ज़ांऊं सान्ह पल़ी, ईशू सेटा लै आऐ खास्सै रोगी मणछ, तिन्नां तै भूत शाचै दै, अर कई रंगे रोग, ईशू काढै तिन्नां सोभिए भूत दूर अर सोभ रोगी किऐ नरोगै। 17#1 पत. 2:24इहअ करै हुअ ईशायाह परमेशरे गूरै बोलअ द बैण बी पूरअ,
“तेऊ च़की म्हारी कमज़ोरी आप्पू दी,
अर किऐ म्हारै दाहे शूल़ दूर।”
ईशूए च़ेल्लै हणैंओ मोल
(लूका 9:57-62)
18ईशू भाल़ै आप्पू फेर खास्सै मणछो छ़ुंड, अर तेऊ बोलअ आपणैं च़ेल्लै लै कि समुंदरा पारा लै च़ाल्ला।
19तिधी आअ एक शास्त्री। तेऊ बोलअ ईशू सेटा एछी, “हे गूरू, ज़िधा लै बी तूह डेओए मुंह बी लागणअ ताह पिछ़ू हांढदै।”
20ईशू दैनअ तेऊ लै इहअ ज़बाब, “शैल़ीए हआ जुहल़ी अर सरगै डैऊंदै च़ेल्लू-पखीरूए हआ कोल्ह। पर हुंह मणछो पूत ज़ुंण स्वर्गा का आसा आअ द, मुल्है निं किधी घअर आथी ज़िधी हुंह सुत्ती सकूं!”
21तेखअ बोलअ एकी होरी च़ेल्लै ईशू लै, “हे प्रभू, मेरै आसा घअरै प्रोढै, तिन्नें क्रिया कर्म हणैं तैणीं लऊं हुंह, न्हैल़ी तेभा बाद एछणअ मुंह ताह संघै।”#1 राज़. 19:20-21
22ईशू बोलअ तेऊ लै, “ज़ुंण आत्मां दी मुल्दै आसा, तिन्नां दै मुल्दै दाबणै, तूह लाग मुंह पिछ़ू हांढदअ।”
ढिश-बागर शांत करनअ
(मार्कुस 4:35-41; लूका 8:22-25)
23ज़ांऊं ईशू किश्ती दी बेठअ, तेऊए च़ेल्लै बी लागै तेऊ संघै हांढदै। 24समुंदरै आई खास्सी ढिश-बागर, अर किश्ती लै उझ़ुई बडी-बडी छ़ाल्ली, तेखअ तिंयां च़ाल्लै किश्ती संघी पाणीं दी डुबी! ईशू थिअ पिछ़ू सुत्तअ द। 25तेखअ आऐ च़ेल्लै ईशू सेटा, संघा लागै लैल़ा-पकारा पाई बोल्दै, “हे प्रभू, हाम्हां बच़ाऊ हाम्हैं च़ाल्लै खतम हई, किश्ती च़ाल्ली डुबी।”
26ईशू बोलअ तिन्नां लै, “तम्हैं विश्वास किल्है निं करदै, तम्हैं किल्है डरा?” इहअ बोली उझ़ुअ ईशू खल़अ संघा काढी ढिश-बागर अर समुंदरे छ़ाल्ली नैरना लै काढी झांश, “शांत हअ,” ढिश-बागर अर छ़ाल्ली हुई तेभी शांत। 27च़ेल्लै हुऐ रहैन संघा लागै इहअ बोल्दै, “अह किहअ मणछ आसा कि एऊए गल्ला शूणां ढिश-बागर अर समुंदरे छ़ाल्ली बी!”
भूत शाचै दै मणछ किऐ राम्बल़ै
(मार्कुस 5:1-20; लूका 8:26-39)
28तिंयां पुजै समुंदरा पार गरासेनी मुल्खै, तिधी आऐ दूई मणछ मल्थाना का, तिन्नां दी थिऐ भूत शाचै दै, तिंयां मणछ थिऐ एतरै बूरै कि तिन्नां डरै निं तैहा बाता कोहै डेऊई सकदअ त।
29ज़ांऊं तिन्नां का ईशू शुझुअ, तिन्नैं बोलअ बडी-बडी लैल़ा पाई ईशू लै, “हे परमेशरे पूता, तूह इधी किज़ू आअ? तंऐं कै म्हारअ बगत एछणैं का आजी लाई हाम्हां लै सज़ा दैई?”#लूक. 4:34
30तिन्नां का दूर ज़िहअ त तिधी धारठी एक सुंगरो बडअ छ़ुंड च़रदअ लागअ द। 31तिन्नैं भूतै किई ईशू का एही अरज़, “ज़ै तंऐं हाम्हैं इना मणछा का पोर्ही लाई काढी, तै दै हाम्हां इना सुंगरे छ़ुंडा दी डेऊणे ज़ाज़त।”
32ईशू बोलअ तिन्नां लै, “डेओआ,” अर तिंयां पेठी सुंगरे छ़ुंडा दी। सह सुंगरो छ़ुंड हुअ बेगरअ अर तिन्नैं दैनी समुंदरा लै छ़ाहल़ा। इहअ करै सारअ सुंगरो छ़ुंड हुअ पाणीं जैंदरी मरी खतम।
33इहअ भाल़ी ठुर्है तिंयां सुंगरा गुआल़ै तिधा का। घअरै डेऊई खोज़अ तिन्नैं सारी नगरी तिन्नां भूता आल़ै मणछो हाल कि किहअ-किहअ हुअ। 34इना गल्ला शूणीं आऐ सारी नगरीए लोग ईशू सेटा अर तिंयां सोभ लोग लागै ईशू का एही अरज़ करदै “म्हारै एऊ मुल्खा का डेऊ बागै।”
Seçili Olanlar:
मोत्ती 8: OSJ
Vurgu
Kopyala
Karşılaştır
Paylaş
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
This work is licensed under Creative Commons Attribution-ShareAlike 4.0 License.
