लूका 10

सत्तर च़ेल्‍लै आप्पू आजू छ़ाडणैं

1इना गल्‍ला हणैं का बाद छ़ांटै प्रभू ईशू भतर होर च़ेल्‍लै अर तेऊ छ़ाडै तिंयां आप्पू का आजू दूई-दूई मणछे ज़ोल़ी बणाईं करै तिन्‍नां गराऊंआं अर नगरी लै ज़िधा लै तेऊ बादा का डेऊणअ त सोठअ द।

2तिन्‍नां छ़ाडणैं का आजी बोलअ तेऊ तिन्‍नां लै इहअ, “मुंह दी विश्वास करना लै आसा खास्सै मणछ न्हैल़ै लागै दै पर तिन्‍नां सेटा खुशीए समादा पजैल़णैं आल़ै आसा थोल़ै। तिंयां आसा एही खास्सी फसला ज़िहै ज़ुंण लऊंणा लै गई हई पर लऊंणै आल़ै आसा थोल़ै। एता लै करा खेचे मालका का अरज़ कि होर मज़दूर छ़ाड।

3 “डेओआ, मंऐं लाऐ तम्हैं भेडा ज़िहै धेल़णै-च़िरनैं आल़ै रुहले छ़ुंढा जैंदरी छ़ाडी। 4तैही निं तम्हैं आप्पू संघै ढबैओ थैल्‍लू निंईं, नां झ़ोल़ी, नां पोलल़ै अर नां बाता हांढदी राज्ज़ी-खुशी पुछ़णा लै बगत ज़ांऐं करी।#10:4 मोत्त. 10:9; 2 राज़. 4:29

5 “ज़हा घअरै बी तम्हैं डेओए, पैहलै लऐ तेऊ घअरे बर्गत दैई। 6ज़ै तिधी कुंण बर्गता जोगी होए, तै रहणीं थारी बर्गत तिधी, नांईं ता एछणी सह बापस फिरी। 7तेखअ तम्हैं रहै बी तेऊ ई घअरै अर ज़ुंण बी तिंयां दैए तेता ई खाए-पिए, किल्हैकि मज़दूरा लोल़ी तेऊए मज़दूरी ज़रूर भेटी। तेखअ निं घअरै-घअरै ठुल़्दै लागी।

8 “ज़हा नगरी तम्हैं डेओए, अर तिधे लोग तम्हां लै बेशणा लै बोले, तम्हैं खाए-पिए तेता ई ज़ुंण तिंयां तम्हां आजू डाहे। 9ज़ुंण तिधी रोगी होए, तिन्‍नां करै नरोगै संघा बोलै तिन्‍नां लै इहअ, ‘परमेशरो राज़ आअ तम्हां नेल़।’ 10पर ज़हा नगरी तम्हैं डेओए अर तिधे लोग तम्हां नांईं मने, तिधी डेओऐ तम्हैं बज़ारै बोल्दै, 11‘थारी नगरीओ धूल़अ बी ज़ुंण म्हारै खूरै शाचअ त, अह ठुल़्हकअ हाम्हैं तम्हां नदरी, तैबी ऐहा गल्‍ला लऐ तम्हैं समझ़ी कि परमेशरो राज़ आसा पुजअ द तम्हां नेल़।’

12 # 10:12 मूल. 19:24-25 “हुंह खोज़ा तम्हां का सत्त कि नसाफ हणें धैल़ै हणीं तैहा नगरीए लोगे दशा, सदोम नगरीए लोगा का बी बूरी दशा।

विश्वास नांईं करनै आल़ी नगरी लै एछणी खरी!

(मोत्ती 11:20-24)

13 “खुराजीन अर बैतसैदा नगरीए लोगो तम्हां लै आसा आफ़त! ज़ुंण महान नछ़ैण अर च़मत्कारे काम तम्हां जैंदरी किऐ, ज़ै तिंयां काम सूर अर सैदा नगरीए होरी ज़ातीए लोगा मांझ़ै किऐ हंदै, तिन्‍नां करनअ त घेरी खिंथल़ै पल़ेटी अर छ़ारे रूल़ी प्रैंदै बेशी आपणैं पापा लै प्राश्त। 14#10:14 जोए. 3:4-8; जक. 9:2-4 ज़ेभै नसाफ करने धैल़ी परमेशरा सूर अर सैदा देशे पापी मणछा लै ज़ेतरी सज़ा दैणीं, थारी हणीं तेता का बी खास्सी बूरी दशा। किल्हैकि तम्हैं निं स्वर्गे नछ़ैण अर च़मत्कार भाल़ी बी नां मेरअ अदर किअ अर नां विश्वास किअ।

15 “हे कफरनहूम नगरीए लोगो, तम्हैं निं इहअ सोठा कि थारअ हणअ स्वर्गै होरी लोगा का खास्सअ अदर? पर तम्हैं डेऊणैं उंधै जम्परी लै ज़िधी तम्हां सज़ा भेटणीं। # 10:15 ईशा. 14:13,15

16 “ज़ुंण थारी गल्‍ले कदर करे सह करा मेरी गल्‍ले कदर। ज़ुंण तम्हां बृथा समझ़ा सह समझ़ा मुंह बृथा। ज़ुंण मुंह बृथा समझ़ा सह समझ़ा तेऊ बी बृथा ज़ुंणी हुंह संसारा लै आसा छ़ाडअ द।”

सत्तर च़ेल्‍लेओ बापस फिरनअ

17तिंयां सत्तर ज़ण्हैं आऐ बडै खुशी-खुशी करै ईशू सेटा लै फिरी अर तिन्‍नैं बोलअ ईशू का, “हे प्रभू, हाम्हैं किऐ भूत काढणैं बी तेरै नाओंआं करै आपणैं बशै।” 18ईशू बोलअ तिन्‍नां लै, “हुंह त राख्सा भाल़अ लागअ द, सह भाल़अ मंऐं सरगा का बिज़ल़ी ज़िहअ पल़अ धरना लै।#10:18 प्रका. 12:7-9; ईशा. 14:12 19भाल़ा, मंऐं दैनअ तम्हां लै दानुईं अर बिंच़ू जैंटणेंओ, अर दुशमणे सारी शगती दी हक अर थारअ निं किछ़ी करै बूरअ हणअ।#10:19 भज. 91:13 20तैबी निं तम्हैं एता करै खास्सै खुशी हई कि भूत काढणैं आसा थारै बशै। पर तम्हैं हऐ ऐहा गल्‍ला लै खुशी कि थारै नाअं आसा स्वर्गै लिखै दै।”

ईशूओ खुश हणअ

(मोत्ती 11:25-27; 13:16,17)

21तैहा ई घल़ी भर्हुअ ईशू पबित्र आत्मां करै बडै नंदा दी संघा बोलअ इहअ, “हे मेरै बाब परमेशर, स्वर्गै अर पृथूईए मालक। हुंह करा तेरअ शूकर कि तंऐं डाही ईंयां गल्‍ला ज्ञैनी अर समझ़कार मणछा का च़ोरी अर इना लान्हैं दी किई तंऐं प्रगट। हाँ मेरै बाब, किल्हैकि ताह भाऊंआ इहअ ई।”

22तेखअ बोलअ ईशू, “मेरै बाब आसा सभाल़ी दी मुखा सोभ गल्‍ला। पूता निं बाबा का सुआई कोहै बछ़ैणदअ। बाबा बी निं पूता का सुआई कोह बछ़ैणदअ, तिन्‍नां बी हेरअ बछ़ैणीं ज़हा का पूत खोज़े।”

23तेखअ बोलअ ईशू च़ेल्‍लै बाखा फिरी कांगनरांगै दी, “परमेशरै दैनअ तम्हां लै इना गल्‍ला आपणीं आछी भाल़णेंओ मोक्‍कअ ज़ुंण मंऐं किई। 24किल्हैकि हुंह खोज़ा तम्हां का कि परमेशरे कई गूरै अर राज़ै बी च़ाहअ कि ज़ुंण गल्‍ला तम्हैं भाल़ा, तिंयां बी भाल़े, पर तिंयां निं भाल़ी सकै, अर ज़ुंण गल्‍ला तम्हैं शूणां; तिंयां बी शुणें, पर तिंयां निं शूणीं सकै।”

झणैल़ू सामरी मणछे कथ्या

25एकी धैल़ै आअ तिधी एक शास्त्री अर सह लागअ ईशू लै इहअ बोली परखदअ, “हे गूरू, सदा रहणैं आल़ी ज़िन्दगी पाणा लै हुंह कै करूं?” 26ईशू बोलअ तेऊ लै, “बधाना दी किज़ै आसा लिखअ द? अर तूह एता किहअ समझ़ा?”

27तेऊ मणछै दैनअ ज़बाब, “तूह करै आपणैं परमेशर बिधाता लै आपणअ सारअ मन्‍न, प्राण अर सारी अक्ल अर सारअ ज़ोर लाई झ़ूरी। आपणैं साथी-संघी लै बी झ़ूरै तिहअ ई ज़िहअ तूह आप्पू लै झ़ूरा।”#मोत्त. 22:37-40; बधा. 6:5; 10:2; ज़ैह. 22:5

28ईशू बोलअ तेऊ लै, “तंऐं बोलअ बिलकुल ठीक, इहअ ई करै, तै रहणअ तूह ज़िऊंदअ।”#10:28 लेब. 18:5

29पर सह बणअ आप्पू इहअ शुचअ कि हुंह आसा पैहलै ई धर्मीं, तेऊ पुछ़अ ईशू का, “तै मुंह नेल़ रहणैं आल़अ कुंण आसा?”

30ईशू दैनअ तेऊ लै एक कथ्या खोज़ी ज़बाब, “एकी बारीए गल्‍ल आसा एही कि एक मणछ डेऊअ एरुशलेम नगरी का जेरिहो नगरी लै। बाता गोटअ सह डाकू अर सह लुटअ तिन्‍नैं। तेऊए झिकल़ै बी निंयैं तिन्‍नैं खोल्ही अर च़िक्‍की-मारी करै डाहअ सह मूंअ नां ज़िऊंदअ बाता शोटी।

31 “तेखअ हुअ इहअ कि तैहा ई बाता डेऊअ एक प्रोहत, पर सह लागअ तेऊ भाल़ी हांढदअ। 32इहअ ई एक लेबी #10:32 लेबी ज़ुंण भबने हेर-सभाल़ करनैओ काम करा तै बी डेऊअ तैहा बाता अर सह बी लागअ तेऊ भाल़ी हांढदअ। 33पर एक सामरी#10:33 सामरी यहूदी नांईं तै सामरी लोगा संघै खांदै पिंदै नां तिन्‍नें घअरै डेऊंदै तै तिन्‍नां समझ़ा तै यहूदी होछ़ी ज़ातीए मुल्खो मसाफर आअ तैहा बाता अर तेऊ भाल़ी फिरी तेऊ सामरी मणछा झींण। 34सह सामरी मणछ आअ तेऊ सेटा लै अर तेऊए ज़खमा दी दाखो रस अर तेल पाई बान्हीं शाट्टी अर आपणीं शुंआरी दी बशैल़ी करै निंयं एकी सराईं लै। तेखअ किई तेऊए खास्सी च़ाकरी। 35दुजै धैल़ै दैनै तेऊ सराईंए मालका लै लाज़ा-पुआई करना लै च़ंदीए सिक्‍कै अर तेखअ डाहअ तेऊ लै इहअ बोली, ‘एऊ ज़खमी मणछे करै च़ाकरी, होर बी ज़ेतरअ खर्च़अ लागे, तेता दैंऊं हुंह ताल्है बापस फिरदी।’”

36तेखअ पुछ़अ ईशू तिन्‍नां का, “ऐबै थारी समझ़ा दी अह ज़ुंण डाकू ज़खमी किअ थिअ, इना चिई मांझ़ै कुंण आसा एऊ नेल़ रहणैं आल़अ शुचअ साथी?”

37तेऊ दैनअ ज़बाब, “सह ई आसा ज़ुंणी तेऊ लै झींण किई।”

ईशू बोलअ, “तूह बी कर इहअ ई।”

मार्था अर मरिअमे घअरै ईशू

38तेखअ डेऊऐ ईशू अर तेऊए च़ेल्‍लै एकी गराऊंऐं। मार्था नाओंए एकी बेटल़ी बशैल़अ ईशू आपणैं घअरै। 39मरिअम नाओंए ती तेसे एक बैहण, सह लागी प्रभू सेटा बेठी करै शिक्षा शूणीं। 40पर मार्था थकी च़ाकरी करी-करी अर सह लागी ईशू सेटा एछी बोल्दी, “हे प्रभू, तम्हां निं किछ़ै फिकर आथी भाल़ी कि मेरी बैहणी आसा डाही दी हुंह एक्‍कै ज़ण्हीं च़ाकरी करदी लाई? ऐहा लै बी बोल हैनूं कि मुंह संघै बी कर धख काम-काज़।” 41पर प्रभू बोलअ तैहा लै, “हे मार्था, तूह करा खास्सी गल्‍लो फिकर अर तेखअ थका तूह। 42पर एक गल्‍ल आसा ज़रूरी, अर सह बधिया भाग आसा मरिअमै छ़ांटअ द, ज़ुंण ऐहा का कोहै निं छ़ड़ैऊई सकदअ।”

Seçili Olanlar:

लूका 10: OSJ

Vurgu

Kopyala

Karşılaştır

Paylaş