जोहन्ना 5
5
ठत्ती साला ओर्ही बमार मणछ किअ नरोगअ
1इना गल्ला बाद हुअ यहूदी मणछो एक थैर अर ईशू डेऊअ एरुशलेम नगरी लै। 2एरुशलेम नगरी आसा भेड़ प्रऊल़ी सेटा एक सअर, तेता लै बोला इब्रानी बोली दी “बैतसैदा।” तिधी थिऐ पांज़ च़ऊंरै बणैं दै।
3तेथ सअरा फेर रहा तै कई कांणै, लाट्टै, शुक्कै दै आंगा आल़ै पाणीं खदमांऊदै न्हैल़ै लाम्मै पल़ी। 4ज़ेभै साईत हआ ती तेभै होथा त तिधी परमेशरो स्वर्ग दूत सअरा भितरी पाणीं खदमाऊंदअ। ज़ांऊं पाणीं खदमाईंआं, तेभै ज़ुंण सोभी का आजी पाणीं दी पेठे, सह हआ त बमारी का नरोगअ। च़ाऐ सह ज़ेही बी बमारी होए।
5तिधी त एक मणछ ठत्ती साला ओर्ही त तिधी बमार पल़अ द। 6ईशू भाल़अ सह तिधी अर तेऊ का गअ थोघ लागी कि अह आसा खास्सी साला ओर्ही इधी पल़अ द। ईशू पुछ़अ तेऊ का, “कै तूह ठीक हणअ च़ाहा?”
7तेखअ बोलअ तेऊ बमार मणछै ईशू लै इहअ, “हे प्रभू, मुखा निं इहअ कोहै मणछ आथी ज़ुंण मुंह च़की पाणीं दी पाए, ज़ेभै पाणीं खदमाईंआं, तेता का आजी जाआ कुंण होर सअरै पेशी ज़ेभै तैणीं घिसरदी-घिसरदी हुंह पुजा, अर हुंह हआ भाल़अ?”
8तेखअ बोलअ ईशू तेऊ दरंगे मरीज़ा लै, “हुंह बोला ताल्है, उझ़ू आपणैं एऊ बछ़ाऊणैं च़क संघा डेऊ आपणैं घअरा लै।”
9सह मरीज़ उझ़ुअ तेभी सोभी नदरी खल़अ, संघा लागअ सह आपणैं बछ़ाऊणैं च़फल़ी करै हांढदअ-फिरदअ। सह थिई बशैघे धैल़ी।#5:9 बशैघे धैल़ी। ऐहा धैल़ी निं यहूदी परमेशरे पूज़ा का सुआई होर किछ़ काम करदै तै।
10ज़ुंण सह मणछ नरोगअ हुअ त, यहूदी सैणैं बोलअ तेऊ लै, “आझ़ आसा बशैघे धैल़ी अर बधाने साबै निं तेरै ईंयां बछ़ाऊणैं च़कणै ठीक आथी।”#जेर. 17:21
11तेऊ दैनअ तिन्नां लै ज़बाब, “ज़ुंणी हुंह ठीक किअ, तेऊ बोलअ मुल्है इहअ कि आपणैं बछ़ाऊणैं च़क अर हांढदअ लाग।”
12तिन्नैं पुछ़अ तेऊ का, “सह कुंण आसा ज़ुंणी ताल्है इहअ बोलअ, बछ़ाऊणैं च़की लाग हांढदअ?” 13पर ज़ुंण सह नरोगअ हुअ त, तेऊ का निं थोघै त कि सह कुंण आसा, तिधी थिऐ खास्सै मणछ अर ईशू गअ त तिधा का डेऊई।
14तेखअ भेटअ ईशू सह भबनै, संघा बोलअ ईशू तेऊ लै इहअ, “भाल़ तूह आसा गअ द ऐबै नरोगअ हई, हेरे, ऐबै निं भिई पाप करी, इहअ निं हआ कि ताह होर बी बूरी दाह लागे।”
15तेखअ खोज़अ तेऊ मणछै तिधा का डेऊई तेऊ सोभी यहूदी सैणैं का, “ज़ुंणी हुंह नरोगअ किअ, सह आसा ईशू।” 16एता पिछ़ू लागै यहूदी ईशू तंग करदै, किल्हैकि सह करा त इना इहै कामां बशैघे धैल़ी। 17ऐहा गल्ला लै बोलअ ईशू तिन्नां लै, “मेरअ बाब करा अज़ी बी काम अर हुंबी करा।”
18तैही लागै यहूदी ईशू मारने भरपूर कोशिशा करदै कि सह एकी बाखा, बशैघे धैल़ीओ बधान चोल़ा, संघा बोला दुजी बाखा इहअ कि परमेशर आसा एऊओ बाब, अर आप्पू समझ़ा तिंयां परमेशरा बराबर।
शोहरूओ हक
19ऐहा गल्ला शूणीं बोलअ ईशू तिन्नां लै, “हुंह खोज़ा तम्हां का सत्त कि पूत निं आप्पै किछ़ै करी सकदअ। पर सह भाल़ा आपणैं बाब करदै, ज़ुंण-ज़ुंण काम तेऊओ बाब करा, पूत करा तेऊ ई साबै।
20 “किल्हैकि बाब डाहा आपणैं पूता संघै झ़ूरी अर ज़ुंण काम सह आप्पू करा, तिन्नां रहैऊआ सह पूता का बी। तेऊ रहैऊंणै नरोगै करनै का बी बडै काम ताकि तम्हां रहैनी होए।
21 “ज़िहअ बाब मूंऐं दै मणछा ज़िऊंदै करा, तिहअ ई करा पूत बी ज़हा सह च़ाहा तिन्नां ज़िऊंदै।
22 “बाब निं कोहिओ नसाफ करदअ, तेऊ सभाल़ी अह सज़ा दैणें ज़िम्मैंबारी मुंह तेऊए पूता का। 23एते तैणीं कि ज़िहअ सोभ लोग बाबो अदर करा, तिहअ ई पूतो बी करे। ज़ुंण पूतो अदर नांईं करदअ, सह निं तेऊ बाबो बी अदर करदअ ज़ुंणी सह छ़ाडअ द आसा।
24 “हुंह खोज़ा तम्हां का सत्त कि ज़ुंण मेरअ बैण शूणीं मुंह छ़ाडणैं आल़ै दी विश्वास करा, सदा रहणैं आल़ी ज़िन्दगी आसा तेऊए अर तेऊ लै निं सज़ा हणीं। पर सह मुक्कअ मौता पार करी सदा रहणैं आल़ी ज़िन्दगी लै डेऊई।
25 “हुंह खोज़ा तम्हां का सत्त कि इहअ बगत आसा एभै अर इहअ ई हणअ कि मूंऐं दै शुणनअ परमेशरो बैण, अर तेता शूणीं हणैं तिंयां ज़िऊंदै।
26 “ज़िहअ बाब ज़िन्दगी दैणैंओ मूल़ आसा, तिहअ ई बणाअं तेऊ आपणअ पूत बी ज़िन्दगी दैणैंओ मूल़। 27इधी तैणीं कि मुंह मणछे पूता लै आसा सोभी लोगा प्रैंदै नसाफ करनैओ हक बी दैनअ द।
28 “ऐहा गल्ला शूणीं तम्हैं रहैन निं हआ, अज़ी एछणअ इहअ बगत बी, ज़ेतरै घोरी दाबै दै आसा, तेऊओ बैण शूणीं निखल़णैं बागा लै। 29ज़ुंणी भलाई किई दी होए, तिंयां ज़िन्दगी ज़िऊंणें तैणीं ज़िऊंदै, अर ज़ुंणी बूराई होए किई दी, तिंयां हणैं जम्परीए सज़ा पाणें तैणीं ज़िऊंदै।”#5:29 दान. 12:2
ईशूए बारै शाजत
30 “हुंह निं आपणीं बाखा किछ़ै करदअ, हुंह आसा मेरै बाब छ़ाडअ द, अर तेऊ खोज़अ मुखा कि किहअ नसाफ करनअ। मेरअ नसाफ आसा शुचअ इहअ करै कि हुंह निं आपणीं मरज़ी करदअ पर हुंह च़ाहा तेऊए मरज़ी पूरी करनअ ज़ुंणी हुंह स्वर्गा का आसा छ़ाडअ द।
31 “ज़ै हुंह आपणैं बारै आप्पै खोज़ूं, मेरी शाजत निं शुची हणीं। 32पर एक होर आसा ज़ुंण मेरै बारै खोज़ा, मुखा आसा थोघ कि ज़ुंण सह बोला, सह शाजत आसा शुची। 33तम्हैं बझ़ैल़अ पुछ़-ज़ाच़ करनै आल़ै जोहन्ना डुबकी दैणैं आल़ै सेटा अर तेऊ दैनी मेरै बारै शुची शाजत।
34 “पर हुंह निं आपणैं बारै कहा मणछे शाजत च़ाहंदअ, तैबी खोज़ी मंऐं ईंयां गल्ला एते तैणीं कि तम्हां लोल़ी उद्धार भेटअ।
35 “सह ज़ुंण ज़ल़दअ अर च़मकदअ दीअ थिअ, तम्हां लागअ तेऊए प्रैश्शै दी मगन रहणअ बधिया। 36पर मुखा आसा एही शाजत ज़ुंण जोहन्ने शाजत का बी बडी आसा।
“ज़ुंण काम बाब परमेशरै पूरअ करना लै मुखा आसा सभाल़अ द, मतलब ज़ुंण काम हुंह करा। तिंयां आसा मेरै शाजत कि बाब परमेशरै आसा हुंह छ़ाडअ द।
37 “मेरै बाब परमेशरै ज़ुंणी हुंह आसा छ़ाडअ द, तेऊ ई दैनी मेरी शाजत। तम्हैं नां तेऊओ बैण शूणअ अर नां तेऊओ रूप आपणीं आछी आथी भाल़अ द। 38नां तम्हैं तेऊए बैणा आपणैं मन्नैं च़की डाहंदै। किल्हैकि ज़ुंण तेऊ आसा छ़ाडअ द, तम्हैं निं तेऊओ विश्वास करदै।
39 “तम्हैं लोल़ा पबित्र शास्त्रा दी, इहअ समझ़ी कि सदा रहणैं आल़ी ज़िन्दगी भेटणीं तम्हां, अर अह आसा सह ई ज़ुंण मेरी शाजत दैआ।
40 “पर तैबी निं तम्हैं सदा रहणैं आल़ी ज़िन्दगी पाणा लै मुंह सेटा एछणअ च़ाहंदै। 41हुंह निं मणछा का अदर च़ाहंदअ। 42पर मुखा आसा थारअ थोघ कि तम्हां दी निं परमेशरे झ़ूरी आथी।
43 “हुंह आसा आपणैं बाब परमेशरे नाओंऐं आअ द, पर तम्हैं निं मुंह मंदै आथी। ज़ै कुंण आपणैं ई नाओंआं करै एछा, सह हेरनअ तम्हां मनी।
44 “तम्हैं च़ाहा एकी-दुजै का अदर। पर ज़ुंण अदर पबित्र परमेशरा का एछा, तेऊ निं च़ाहंदै, नां कोई गल्लो विश्वास करदै! 45इहअ निं समझ़ा कि मुंह लाणअ आपणैं बाब सेटा तम्हां लै कोई दोश। तम्हां लै दोशा लाणैं आल़अ आसा सह ई मोसा गूरो बधान ज़ेथ थारी आशा आसा।
46 “किल्हैकि, ज़ै तम्हैं मोसा गूरो शुणदै, तै करनअ त तम्हां मेरअ बी विश्वास, इहअ करै कि तेऊ आसा मेरै बारै लिखअ द।#5:46 लूक. 24:27 47पर ज़ै तम्हैं तेऊए बधाना दी लिखी गल्ला दी विश्वास नांईं करदै, तै मेरी गल्ला दी किहअ करै लाअ तम्हैं विश्वास करी!”
Seçili Olanlar:
जोहन्ना 5: OSJ
Vurgu
Kopyala
Karşılaştır
Paylaş
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
This work is licensed under Creative Commons Attribution-ShareAlike 4.0 License.
