इब्रानी 2
2
महान उद्धार
1तैही लागा हाम्हां तिंयां गल्ला बडी धैन-मन्न लाई करनी ज़ुंण हाम्हैं शूणीं दी आसा, ताकि हाम्हैं सत्ता का दूर निं डेओए।
2ज़ुंण समाद परमेशरै स्वर्ग दूता बाती दैनअ तेता करै हुअ हर बगत सत्त प्रगट, अर बधाने ज़ुंण बी गल्ला लोगै नांईं मनी तेता लै भेटी तिन्नां सज़ा। 3इहअ किज़ै आसा ज़ुंण हाम्हैं इहअ सोठा कि एऊ महान उद्धारे गल्ला नांईं मनी कै हाम्हैं बच़ी जाणैं ज़ुंण प्रभू ईशू आप्पै आसा खोज़अ द? अह उद्धारो समाद आसा हाम्हां लै तिन्नैं खोज़अ द ज़ुंणी सह तेऊ का आसा शूणअ द। 4आपणैं दिला-मन्नें साबै ज़ेभै परमेशरै च़ाहअ तेऊ दैनअ नछ़ैण, नुआहरै काम, च़मत्कार अर पबित्र आत्मों दान दैई एऊ उद्धारे समादो सबूत।
म्हारअ उद्धार करनै आल़अ
5परमेशरै निं सह आजू एछणैं आल़अ संसार, ज़ेते बारै हाम्हैं लिखदै आसा लागै, तेतो हक निं तेऊ स्वर्ग दूता लै दैनअ पर सह दैनअ प्रभू ईशू लै। 6पबित्र शास्त्रा दी आसा एकी ज़ैगा परमेशरा लै इहअ बोलअ द,
“कोहै मणछ निं एता जोगी आथी कि तूह तिन्नें बारै सोठे?
नां कुंण मणछो शोहरू एता जोगी आथी कि तूह तेऊए हेर-सभाल़ करे?
7तंऐं बणाअं मणछ स्वर्ग दूता का धख ई होछ़अ,
तंऐं दैनअ तेऊ लै इज़त अर अदरो मुगट। तेऊ लै दैनअ तंऐं तेऊए हाथे कामां दी हक।
8तंऐं दैनअ तेऊ लै सोभी गल्ला दी हक।”
इधी ज़ाण्हिंआं इहअ कि परमेशरै किई सोभै गल्ला मणछे बशै। एही निं किछ़ै गल्ला छ़ुटी ज़ुंण तिन्नें बशै निं किई। पर हाम्हां का शुझिआ आझ़ इहअ कि सोभै गल्ला निं मणछे बशै आथी।#भज. 8:6; 1 करि. 15:27
9पर हाम्हैं भाल़ा ईशू! सह किअ थोल़ी घल़ी स्वर्ग दूता का धख होछ़अ ताकि सह परमेशरे झींणा करै सह सोभिए तैणीं मरे। तेऊ ज़िरअ दुख अर सह मूंअ, अर तेऊ लै दैनअ प्रतप्प अर अदरो मुगट। 10परमेशरै बणाईं सोभै गल्ला अर सोभै गल्ला डाही तेऊ आप्पू लै ज़िऊंदी। एता लै किअ परमेशरै इहअ बच़ार कि प्रभू ईशू दुख ज़िरे अर सोभी गल्ला दी सिध्द होए ताकि खास्सै मणछ तेऊए प्रतप्पा दी साझ़ू होए। किल्हैकि सह आसा ईशू ई ज़ुंण तिन्नां लै उद्धार सका दैई।
11किल्हैकि ज़ुंण पाप दूर करी पबित्र करा अर ज़ुंण पापा का छ़ुटी पबित्र हुऐ, तिन्नां सोभिओ बाब आसा एक्कै ई, तैही निं ईशू तिन्नां लै आपणैं भाई अर बैहणी बोल़णा लै शरम लागदी। 12मसीहा बोला परमेशरा लै एते बारै इहअ,#भज. 22:22
“ज़ुंण तंऐं किअ, मुंह खोज़णअ तेते बारै आपणैं सोभी लोगा का
मुंह तिन्नें सभा दी तेरी ज़ै-ज़ैकार।”
13तेखअ बोला सह इहअ बी,#ईशा. 8:17-18; 12:2
“मुंह डाहणअ ताह दी भरोस्सअ।”
तेखअ बोला सह भिई इहअ,
“हुंह आसा तिन्नां मणछा संघै ज़ुंण मुल्है परमेशरै दैनै, ईंयां आसा लान्हैं ज़िहै।”
14ज़ै कि परमेशर ज़हा लै आपणैं लान्हैं बोला तिंयां बी आसा मणछ अर ईशू बी बणअ तिन्नां ई ज़िहअ मास्सा-लोहू आल़अ मणछ। राख्सा का आसा शगती कि मौते डअर रहैऊई करै डरैओए पर मसीहा बणअ मणछ एते तैणीं कि तेऊए मौत होए अर मौता हारी करै सह राख्से शगती खतम करे
15अर ज़ेतरै मौतै डरा संघै सारी ज़िन्दगी गलामा ज़िहै तै, सह तिन्नां आज़ाद करे।#रोम. 8:3; कुलू. 2:15
16किल्हैकि प्रभू ईशू निं स्वर्ग दूते हेर-सभाल़ करदअ, पर सह करा आबरामे खिंबे हेर-सभाल़।#गल. 3:29; ईशा. 41:8-10
17एते ई तैणीं लोल़ी त तेऊ कि सोभी गल्ला दी आपणैं होरी भाई-बैहणी ज़िहअ मणछ बणें, ज़िहअ करै सह परमेशरो इहअ माहा प्रोहत बणें ज़ुंण झणैल़ू अर शुचअ-पाक्कअ होए। ताकि ज़ुंण बल़ीदान तेऊ तिन्नां लै किअ तेता करै तिन्नें पाप माफ होए। 18किल्हैकि सह परखअ अर तेऊ ज़िरअ दुख, तैही सका सह खरी दी पल़ै दै मणछे मज़त करी।
Seçili Olanlar:
इब्रानी 2: OSJ
Vurgu
Kopyala
Karşılaştır
Paylaş
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
This work is licensed under Creative Commons Attribution-ShareAlike 4.0 License.