एजकेल 17

स्वर्ग दूत अर दाखे बेल

1बिधाता बोलअ मुल्है भिई इहअ, 2“मणछा, इज़राईली का खोज़ कहाबत। 3तिन्‍नां का लोल़ी थोघ लागअ कि हुंह मालक बिधाता बोला तिन्‍नां लै इहअ, ‘एक त बडअ मुक्षरलअ, तेऊए तै लाम्मै अर बिरलै फैंख। तिंयां फैंख तै रंग-बरंगै अर हेरनै बेघै बित्तै। सह मुक्षरलअ आअ लाबानोन धारा बाखा लै डैअ दैई संघा बेठअ एकी केल़ुईए च़ुंडी। 4तेऊ पाई केल़ुईए च़ुंडी चोल़ी संघा निंईं तेऊ देशे नगरी लै ज़िधी बपारी बेच़ा अर मोल लआ तै। तेऊ डाही सह च़ुंडी तिधी रोही। 5तेखअ च़ुंघअ तेऊ मुक्षरलै इज़राईल देशा का एक बेज़ैओ दाणअ सह त टिर्खुई गअ द। तेऊ डाहअ सह पाणीं नेल़ पज़दी ज़ैगा मधनूं ज़िहअ रोही। 6सह बेज़अ टिर्खुअ बधिया अर सह बणअ एही दाखे बेला ज़िहअ ज़ेते बेला धरनीं सारै दी छिंघिआ। तैहा बेला का बझ़ी शाण्हटी संघा फिरी तेऊ बाज़ा बाखा लै अर तेते ज़लैल़ै राझ़ै धरनीं डुघै। तैहा बेला का टिर्खुई फेर खास्सी बेला संघा भर्हुई पाचा करै।

7“‘तेथ त होर एक बडअ मुक्षरलअ, तेऊए बी तै बडै-बडै फैंख अर तेथ तै घणैं फुफू। तैहा बेला छिंगै आपणैं ज़लैल़ै तेऊ दुजै बाज़ा बाखा अर बेला बी फरेऊई एही आशा डाही तेऊ बाखा कि ज़िधी सह रोही दी आसा, तिधी सह दुजअ मुक्षरलअ पाणीं छ़ाडे। 8पर सह दाखे बेल ती पैहलै ई का राम्बल़ी पज़दी ज़ैगा पाणींए बाढै लाई दी। सह ती तेथ बधिया लागी दी बझ़दी अर फल़दी लागी दी। तेता का थिई खास्सी बेला लागी दी अर सह सका ती सोभी का बधिया फल़णैं आल़ी बेल हई।

9“‘तैही बोला हुंह मालक बिधाता कि ऐबै निं अह बेल बझ़दी अर नां फल़दी! तेऊ नऊंऐं बाज़ा पाणीं अह बेल गोधी का पेच़ी! तेते हरै-हरै पाच शुक्‍कणैं पठी। तैहा बेला पेच़णा लै निं खास्सअ ज़ोर ई लागणअ, नां तेता गोधी का पेच़णा लै खास्सै लोगे ज़रुरत पल़णीं। 10ज़ै तैहा बेला पेच़ी करै किधी दुजी ज़ैगा लाए, सह निं तिधी राझ़णी! सह निं तिधी फुलणीं-फल़णीं! ज़ांऊं तेथ पुर्बा बाखे बागरी लागणीं, सह शुक्‍कणीं तेथ पठी।’”

कथ्यो फल

11बिधाता बोलअ मुल्है इहअ, 12#2 राज़. 24:15-20; 2 इति. 36:10-13“इना द्रोही इज़राईली का पुछ़ कि तिंयां ऐहा कथ्यो फल बी समझ़ै? इना का खोज़ कि सह पैहलअ मुक्षरलअ आसा राज़अ नबूकदनेसर। सह आअ राज़धानी एरुशलेम संघा निंयैं यहूदा मुल्खो राज़अ अर तेऊए कार-करिंदै बाबेल देशा लै। 13नबूकदनेसरै छ़ांटअ यहूदा मुल्खे राज़ घरानै का एक मणछ संघा किई तेऊ#17:13 तेऊ नबूकदनेसरै छ़ांटअ राज़ै जेहोकीनो च़ाच़ू सिदकिया यहूदा मुल्खो राज़अ संघै करार। तेऊ का बझ़ैल़ै सोह खाणैं कि तिन्‍नां प्रैंदै हणअ सिधअ बाबेल देशे राज़ैओ राज़। यहूदा मुल्खे सोभ सैणैं बी थिऐ बाबेल देशे राज़ै कैद करी निंयैं दै। 14सह च़ाहा त इहअ यहूदा मुल्ख बलबान नां रहे अर कधि तेऊए मकाबलै लै खल़ै नां होए अर ज़ेही करार आसा हुई दी, तेऊ साबै आजू सदा रहे। 15पर यहूदा मुल्खे राज़ै किअ द्रोह अर तेऊ छ़ाडै मिसर देशा लै आपणैं दूत संघा मांगै तिधा का खास्सै रथ-घोल़ै अर बडी सैना। इहअ करी निं सह कधि सफल हई सकदअ! नां सह तेता करै बच़ी सकदअ। इहअ निं हई सकदअ कि करार चोल़ी करै तेऊ सज़ा निं भेटे!

16“हुंह आसा सोभिओ मालक बिधाता, हुंह बोला आपणैं सोह खाई इहअ, ‘सह राज़अ मरनअ बाबेल देशै, किल्हैकि तेऊ किअ तैहा करारा लै द्रोह ज़ुंण तेऊ बाबेल देशे राज़ै संघै किई ती, ज़ुंणी सह यहूदा मुल्खे राज़गाद्दी दी बशैल़अ त। 17मिसर देशो माहा राज़अ अर तेऊए बलबान सैना बी निं तेऊ बच़ाऊई सकदी। बाबेल देशे सैना गोटणी नगरी फेरा-फेर संघा च़िणनै चेच। तिन्‍नां पाणै मेरी परज़ा मांझ़ै कई लोग मारी। 18ज़ुंण तेऊ सोह खाऐ तै, तिंयां समझ़ै तेऊ बृथा। ज़ुंण तेऊ बाबेल देशे राज़ै संघै करार किई ती, तेता लै किअ तेऊ द्रोह।’”

19मालक बिधाता बोलअ इहअ, “हुंह बोला आपणैं सोह खाई, ‘ज़ुंण करार सिदकिया चोल़ी, तेता लै दैणीं मुंह तेऊ लै सज़ा, किल्हैकि तेता लै तै तेऊ मेरै सोह खाऐ दै। 20मुंह छ़ैणअ तेऊ लै शकारीओ ज़ज़ाल़ संघा शाचणअ सिदकिया तेथ। सह निंणअ मुंह बाबेल देशा लै, तेऊ लै सज़ा दैणी मुंह तिधी, किल्हैकि तेऊ किअ मुल्है विश्वास घात। 21तेऊए राम्बल़ै का राम्बल़ै जोधै पाणै जुधा दी तलबारा करै मारी। ज़ुंण तेता का बच़े तिंयां ठुर्हनै सातै-बातै। तेखअ लागणअ तम्हां का थोघ कि ईंयां गल्‍ला ती मंऐं बिधाता बोली डाही दी।’”

बिधाते ज़बान अर आजू लै आशा

22मालक बिधाता बोला इहअ,

“मुंह काढणीं केल़ुईए च़ुंडी का एक शाण्हटी,

संघा डाहणीं मुंह सह उछ़टी धारा रोही।

23सह लाणीं मुंह इज़राईले सोभी का उछ़टी धारा,

तिधी बझ़णी सह अर तेथ लागणीं बडी-बडी शाण्हीं अर बेज़अ,

सह बणनी सोभी केल़ुई दी महान।

तेथ बस्सणै सोभी रंगे च़ेल्‍लू-पखीरू

अर तिंयां रहणैं तेते छ़ैल्‍ली दी राज्ज़ी-मौज़ी।#भज. 92:12

24तेखअ लागणअ तेऊ बणें सोभी डाल़ा-बूटा का थोघ कि

हुंह आसा बिधाता।

हुंह सका लाम्मै-लाम्मै बूटा होछ़ै करी अर

होछ़ै बूटा लै दैआ हुंह एही बझ़ कि तिंयां लाम्मै होए।

हुंह सका हरै बूटा शकेऊई अर

शुक्‍कै बूटा सका हुंह भिई हरै करी।

“ईंयां गल्‍ला डाही मंऐं बिधाता बोली। ज़िहअ हुंह बोला, तेता लआ हुंह तिहअ ई करी।”

Seçili Olanlar:

एजकेल 17: OSJ

Vurgu

Kopyala

Karşılaştır

Paylaş

Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın

This work is licensed under Creative Commons Attribution-ShareAlike 4.0 License.

बाघली सराज़ी बोली दी पबित्र शास्त्र Hakkında Daha Fazlasını Öğrenin

एजकेल 17