इफिसी 6
6
ईज-बाब अर लान्हैं
1-3ए लान्हैंओ, पबित्र शास्त्र बोला इहअ, “आपणैं ईज-बाबो करा अदर इहअ करै हणीं तम्हां लै सोभै गल्ला भली अर थारी हणीं पृथूई दी लाम्मी अमर।” अह आसा पैहलअ हुकम ज़ुंण परमेशरै करारा संघै आसा दैनअ द। तम्हैं लान्हैं ज़ुंण प्रभू दी विश्वास करा तम्हां लै आसा इहअ ई ठीक कि तम्हैं हआ आपणैं ईज-बाबे हर गल्ला शुणनै मनणै आल़ै।#कुलू. 3:20; लुआ. 20:12; बधा. 5:16
4ओ शोहरू-माठै आल़ैओ, आपणैं शोहरू लै निं धैल़ रोश्श काढा, पर तिन्नां धाचा-पाल़ा प्रभूए शिक्षा अर चतैनगी दैई करै।#कुलू. 3:2; बधा. 6:7; सैणीं. 3:11-12; 19:18; 22:6
मालक अर दास
5ए दासो, ज़ुंण लोग एऊ संसारै थारै मालक आसा तिन्नें शूणां अदर अर मानदार रही ज़ेही तम्हैं मसीहे मना। 6इहअ निं कि ज़ेभै तिंयां भाल़ै आसा लागै दै सिधअ तेभै मना तम्हां तिन्नें हर गल्ला ताकि तिंयां खुश होए, पर तम्हैं आसा मसीहे दास, तम्हां लागा दिला का तिहअ करनअ ज़िहअ परमेशर च़ाहा कि तम्हैं करे। 7खुशी-खुशी रहा आपणअ च़ाकरी इहअ समझ़ी करदै लागी कि तम्हैं निं कहा मणछे च़ाकरी आथी लागै दै पर तम्हैं आसा प्रभूए च़ाकरी करदै लागै दै। 8किल्हैकि तम्हां का आसा थोघ कि च़ाहे सह गलाम होए या आज़ाद, ज़ुंण बी शोभलअ काम करे तेऊ भेटणअ प्रभू का तेतो तिहअ ई फल।
9हे मालको, तम्हैं बी निं आपणैं गलामा लै धमकी दैंदै लागा पर तम्हैं बी करा तिन्नां संघै तिहअ भलअ बभार ज़िहअ मंऐं बोलअ द आसा। किल्हैकि तम्हां का बी आसा थोघ कि तिन्नों अर थारअ आसा दुहीओ मालक स्वर्गै। सह निं कोही लै पक्षपात करदअ।#लूक. 6:31; बधा. 10:17; 2 इति. 19:7
आत्मिक जुधे अस्त्र-शस्त्र
10खिरी बोला हुंह तम्हां लै इहअ कि प्रभू अर तेऊए महान बला करै हआ जोधै। 11ज़िहअ एक जोधअ आपणैं जुधा करने अस्त्र-शस्त्र कशा, तम्हैं बी कशा परमेशरै दैनै दै सोभी अस्त्र-शस्त्रा ताकि ज़ेभै तम्हां लै राख्स च़लाकी करने कोशिश करे तेभै तम्हैं तेऊओ मकाबलअ करी सके।
12किल्हैकि म्हारअ अह जुध निं लोहू अर मणछा संघै आथी, पर म्हारअ मल्ल जुध आसा एऊ संसारे कदुष्ट आत्में राज़ै संघै ज़ुंण न्हैरै संसारै राज़ करा अर तिन्नां बूरी आत्में सैना संघै ज़ुंण सरगै आसा।
13तैही कशा परमेशरे सारै अस्त्र-शस्त्र ताकि ज़ेभै तम्हां लै बूरै धैल़ै बी एछे तेभै ज़ुंण बी तम्हां का हई सके तिन्नां सोभै गल्ला पूरी करी पाक्कै रही सके। 14ज़िहअ एक जोधअ आपणीं कुछी गाची अर हिक्का हीकबंद बान्हीं जुधा लै तैर्हिआ तम्हैं बी तैर्हिआ परमेशरो सत्त अर धर्मों हीकबंद बान्हीं राख्सा संघै जुधा करना लै।#ईशा. 11:5; 59:17
15ज़िहअ एक जोधअ बूट बान्हीं जुधा लै तैर्हिआ, थारी परमेशरा संघै मेल़-ज़ोल़ करने खुशीए समादा खोज़णें च़ाहा लोल़ी तेही हुई।#ईशा. 52:7; नहू. 1:15
16एता संघै आसा एक होर च़ीज़, ज़िहअ एक जोधअ आप्पू संघै ढाल़ निंयां ताकि सह दुशमणे कतीरा का आप्पू बच़ाऊई सके, तिहअ ई डाहा मसीहा दी पाक्कअ विश्वास ताकि तम्हां राख्से कतीर नां लागे। 17परमेशरो उद्धार लोल़ी तम्हां लै थारी फाज़त करनै आल़ै टोपा ज़िहअ बान्हअ अर परमेशरो बैण ढाकै तम्हैं पबित्र आत्में तलबारा ज़िहअ।#इब्रा. 4:12; ईशा. 49:2; 59:17
18ता, हर बगत रहा अर सोभी साबै प्राथणां अर अरज़ करदै लागी ज़ेऊ साबै पबित्र आत्मां तम्हां का रहैऊआ। एता ई लै रहा बिहुदै कि सोभी पबित्र लोगा लै रहा कबल्लै प्राथणां अरज़ करदै लागी।
19मुल्है बी रहा प्राथणां करदै लागी कि ज़ेभै हुंह बोले, प्रभू लोल़ी आप्पै मेरै मन्नैं तिंयां गल्ला पाई ताकि तिन्नां मणछा मांझ़ै मुंह हिम्मत एछे अर मसीहे खुशीए समादो भेद सोभी का खोज़ी सकूं। 20हुंह आसा मसीहो राज़दूत अर तेता पिछ़ू आसा हुंह शांघल़ी लोहै लाई कैद किअ द। ऐहा गल्ला लै बी करै प्राथणां, “ज़ेभै हुंह लोगा का मसीहे बारै खोज़े तेभै लोल़ी मुंह एही हिम्मत आई कि ज़ेऊ साबै मुंह गल्ला करनी तिंयां लोल़ी मंऐं तेही ई बोली।”
खिरी अदर करनअ
21प्रभू दी शुचअ-पाक्कअ रहणैं आल़अ दास तुखिकुस, ज़ुंण विश्वासा दी मेरअ पैरअ भाई आसा, तेऊ खोज़णीं तम्हां का सोभै गल्ला, कि तम्हां का बी मेरी दशा थोघ लागे कि हुंह केही हालता दी आसा रहंदअ लागअ द। 22सह आसा मंऐं तम्हां सेटा लै एते तैणीं छ़ाडअ द कि तम्हां का थोघ लागे कि म्हारी केही दशा आसा, सह थारै दिला लै शांती दैए अर मसीहा दी विश्वास करना लै तम्हां होर बी पाक्कै करे।
23हुंह करा परमेशर म्हारै बाब अर म्हारै प्रभू ईशू मसीहा का प्राथणां कि सह तम्हां सोभी विश्वासी भाई-बैहणी लै शांती दैए। ताकि थारी आप्पू मांझ़ै झ़ूरी बढे अर थारअ विश्वास मसीहा दी पाक्कअ रहे।
24म्हारै प्रभू ईशू संघै शुची झ़ूरी करनै आल़ै लै लोल़ी परमेशरो जश सदा रहअ।
Seçili Olanlar:
इफिसी 6: OSJ
Vurgu
Kopyala
Karşılaştır
Paylaş
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
This work is licensed under Creative Commons Attribution-ShareAlike 4.0 License.