शधाणूं 28
28
माल्टा टापू दी पल़सी
1ज़ांऊं हाम्हैं सोभै राज्ज़ी-राम्बल़ै बच़ी बाढै पुजै, तेखअ लागअ हाम्हां का थोघ कि एऊ टापू लै बोला माल्टा टापू। 2तिधे बशिंदै हुऐ हाम्हां लै खास्सै झणैल़ू, अर सह ती हाम्हां लै नुआहरी गल्ल। किल्हैकि हिंऊंदे धैल़ै त सरग लागअ द अर शेल़ै-ठांढै ज़ाल़ी तिन्नैं हाम्हां सोभी लै आग संघा डाहै हाम्हैं आप्पू सेटा।
3ज़ांऊं पल़सी झ़ुको बरिंडअ झाल़ी करै आगीए घैनै दी पाअ, एक झ़रीली दानअ निखल़ी आगीए गरमीं करै अर सह पल़ेठुई पल़सीए हाथै। 4ज़ांऊं तिन्नैं तिधे बशिंदै सह दानअ तेऊए हाथै च़ुंढुई दी भाल़ी, तिंयां लागै आप्पू मांझ़ै एही गल्ला करदै, “अह आसा सच्च़ी हत्या करनै आल़अ, समुंदरै डुबणै का ता गअ अह बच़ी पर म्हारी नसाफ करनै आल़ी देबी निं च़ाहंदी कि अह ज़िऊंदअ रहे।”
5तेखअ शोटी पल़सी सह दानअ आगी जैंदरी, अर तेऊ निं किछ़ै हान्नी हुई। 6पर तिंयां रहै न्हैल़ै लागी कि अह शुआणअ-धुआणअ अर तेभी बदल़णअ धरनीं अर तेखअ शोटणै एऊ प्राण। पर ज़ांऊं तिंयां खास्सी घल़ी भाल़ै रहै लागी अर तिन्नैं भाल़अ कि तेऊ निं किछ़ै हुअ, तिन्नैं सोठअ आपणैं मन्नैं इहअ कि अह आसा कोई देअ।
7तैहा ज़ैगा ओरी-पोरी ती पुबलिऊस नाओंऐं तेऊ टापूए प्रधाने ज़िम्मीं, तेऊ निंयैं हाम्हैं आपणैं घअरा लै, संघा किई चिई धैल़ी धैल़ै तैणीं म्हारी प्राहुंणच़ारी अर खास्सअ अदर-भाअ।
8पुबलिऊस प्रधाने बाब त ज़अर अर दस्त लागै दै अर सह च़ैन्नै दी पल़अ द, पल़सी तेऊए घअरै डेऊई किई तेऊ लै प्राथणां, अर तेऊ दी हाथ लाई करै किअ सह राम्बल़अ। 9ज़ांऊं इहअ हुअ, तेऊ टापूए आऐ होर बमार बी सोभ पल़सी सेटा अर तिंयां बी किऐ तेऊ नरोगै। 10तिन्नैं सोभी किई म्हारी इज़त, अर ज़ांऊं हाम्हैं तिधा का आजू च़ाल्लै तै डेऊई, ज़ुंण किछ़ बी हाम्हां ज़रुरत ती, तिन्नैं डाही तिंयां सोभै गल्ला ज़हाज़ा दी।
माल्टा टापू का रोम देशा बाखा लै
11माल्टा टापू दी चिई भिन्नैं बाद बेठै हाम्हैं सकंदरीआ नगरीए एकी ज़हाज़ा दी अर च़लै आजू, सह ज़हाज़ त तेऊ टापू दी हिंऊंदे धैल़ै काटदअ खल़्हुअ द। तेऊ ज़हाज़े मोहरै दी त नछ़ैण “दोगल़ भाई” देअए मुहुर्ती। 12सारकुस नगरी पुजी रहै हाम्हैं लंगर पाई चिई धैल़ै तिधी। 13तिधा का आऐ हाम्हैं फेर दैई रेगियम नगरी अर एकी धैल़ै बाद च़ली दखण बाखा बागरी अर तेखअ पुजै दुजै धैल़ै पुतियुली नगरी। 14तिधी मिलै हाम्हैं होरी विश्वासी भाई का अर तिन्नें बोल़णैं दी रहै हाम्हैं एकी हबतै तिधी, तिधा का पुजै हाम्हैं खिरी मसा जाई करै रोम।
15तिधा का आऐ विश्वासी भाई म्हारअ समाद शूणीं गराऊंए च़फै चिई सराईं नगरी तैणीं हाम्हां मिलदै। तिन्नां भाल़ी किअ पल़सी परमेशरो शूकर अर तिन्नां लै दैनअ हैअ विश्वास।
16ज़ांऊं हाम्हैं रोम पुजै, पल़सी लै दैनअ तेऊ सपाही संघै ज़ुदै ज़िहै एकी रहणैंओ हुकम ज़ुंण तेऊए हेर-सभाल़ करा त।
रोम देशै पल़सी
17चिई धैल़ै बाद शादै तेऊ यहूदी मणछे बडै लोग अर ज़ांऊं तिंयां कठा हुऐ, तिन्नां का बोलअ, “भाईओ, मंऐं निं आपणैं लोगा अर आपणैं दादा-बाबे बभारे खलाफ किछ़ै किअ, तैबी सभाल़अ कैदी हई हुंह एरुशलेम नगरी का रोम सरकारी सपाही का। 18तिन्नैं च़ाहअ हुंह मेरी पुछ़-ज़ाच़ करी छ़ाडणअ बी, किल्हैकि मुल्है निं मौत दैणैं जोगी किछ़ै दोश त।
19“पर ज़ांऊं यहूदी सैणैं एते खलाफ बोल्दै लागै तेखअ पल़ी मुंह माहा राज़ै सेटा एछणें अरज़ करनी। एते तैणीं निं कि मुंह शाचअ आपणैं लोगा लै दोश लाणअ त। 20तैही आसा मंऐं तम्हैं शादै दै कि तम्हां का मिलूं अर ऐहा गल्ला खोज़ी सकूं कि हुंह आसा एता पिछ़ू शांघल़ी करै बान्हीं डाहअ द। किल्हैकि हुंह करा विश्वास कि मसीहा मुक्कअ एछी, ज़हा एछणें आशा इज़राईल आसा।”
21तिन्नैं यहूदी सैणैं बोलअ पल़सी लै, “नां हाम्हां तेरै बारै यहूदा मुल्खा का च़िठी भेटी, नां होरी भाई मांझ़ै तेरै बारै किज़ै खोज़अ अर नां बूरअ बोलअ। 22सह च़ाहा हाम्हैं ताखा शुणनअ, किल्हैकि हाम्हां का आसा थोघ कि कई ज़ैगा बोला एऊ मत्ते बारै लोग खलाफ गल्ला।”
23तेखअ काढी तिन्नैं तेऊ लै एक धैल़ी अर पांडा हुऐ खास्सै मणछ तेऊ सेटा कठा। पल़सी रहअ परमेशरे राज़े शाजत दैंदी, अर परमेशरे गूर मोसा खोज़ै दै बधाना अर परमेशरे होरी गूरे कताबा का प्रभू ईशूए बारै समझ़ाऊंदी दोत्ती का उडै तैणीं रह खोज़दअ लागी। 24तेखअ मनी कई तिंयां गल्ला, अर कई निं विश्वास किअ।
25इहअ करै निं तिंयां आप्पू मांझ़ै एक मत्त हई सकै। तेखअ डेऊऐ तिंयां पल़सीए ऐहा गल्ले बोल़णैं दी तिधा का, “पबित्र आत्मां आसा परमेशरे गूर ईशायाहे कताबा दी थारै दादा-बाबा का ठीक ई बोलअ द,#ईशा. 6:9-10
‘डेऊ इना लोगा लै बोल,
26तम्हैं शुणदै ता रहणैं,
पर तम्हां निं समझ़ पल़णीं
तम्हैं भाल़ै ता रहणैं,
पर तम्हां का निं थोघ लागणअ कि
किज़ै आसा हंदअ लागणअ।
27किल्हैकि इना लोगो मन्न आसा काठअ
अर इने कान आसा गर्कै हुऐ दै।
इनै आसा आपणीं आछी बंद डाही दी करी।
इहअ निं हआ कि तिंयां आपणीं आछी का भाल़े,
काना का शुणें अर मना का समझ़े,
अर मुंह बाखा फिरे
अर हुंह तिन्नां राम्बल़ै करूं!’
28“तै तम्हैं समझ़ा, कि परमेशरे एऊ उद्धारे कथ्या छ़ाडी होरी ज़ाती सेटा लै अर तिन्नां शुणनी बी मनणी बी।”#भज. 67:2; 98:3; ईशा. 40:5
29ज़ांऊं पल़सी इहअ बोलअ, यहूदी लागै आप्पू मांझ़ै हठल़दै अर तिधा का डेऊऐ। 30तेखअ रहअ पल़सी पूरी दूई साला तैणीं आपणैं कराऊऐ दैई एकी घअरा दी।
31ज़ुंण तेऊ सेटा एछा तै, सह रहअ तिन्नां संघै मिलदअ लागी अर नधड़क परमेशरे राज़ो प्रच़ार करदअ लागी अर मसीहा ईशू प्रभूए गल्ला सखाऊंदअ लागी, तेऊ निं तेता लै कोहै रोक्कदअ आथी त।
Seçili Olanlar:
शधाणूं 28: OSJ
Vurgu
Kopyala
Karşılaştır
Paylaş
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
This work is licensed under Creative Commons Attribution-ShareAlike 4.0 License.
