2 करिन्थी 3
3
नऊंईं करारे दास
1हाम्हां निं दखाअ करने ज़रुरत आथी कि म्हारै काम आसा भलै। कई च़ाहा इहअ कि होर तिन्नां लै एही च़िठी भेज़े ज़ेथ तिन्नें कामें सर्राफी होए! हाम्हां निं तम्हां लै तेही च़िठी तम्हां सेटा दैणीं अर नां हाम्हैं आप्पू च़ाहंदै कि तम्हैं हाम्हां लै एही च़िठी लिखे। 2मेरै आसा तम्हैं ई च़िठी ज़िहै ज़ेता करै मेरै परमेशरा लै काम करनैओ थोघ सोभी का लागा। सोभै सका तम्हां पहल़ी अर म्हारै भलै काम सका तम्हां दी बछ़ैणीं। 3अह आसा शुझदअ कि थारी बदल़ी दी ज़िन्दगी आसा च़िठी ज़ुंण मसीहा आसा लिखी दी। तेऊए अह च़िठी लिखणी आसा म्हारै कामों फल। ईंयां निं सैही करै या पात्थरे तगती दी आथी लिखी दी पर ईंयां आसा ज़िऊंदै परमेशरे आत्मां करै मणछे दिले तगती दी लिखी दी।#लुआ. 24:12; जेर. 31:33; एज. 11:19-20
4हाम्हैं डाहा मसीहा ई करै परमेशरा दी इहअ ई भरोस्सअ। 5हाम्हैं निं आपणैं बलबुतै दी किछ़ै करी सकदै। हाम्हां लै बल दैणैं आल़अ आसा परमेशर। तैही निं हाम्हैं बोली सकदै कि हाम्हैं आसा एता जोगी। सह परमेशर ई बणाआं हाम्हां आपणीं च़ाकरी करनै जोगी। 6ज़ुंणी हाम्हैं नऊंईं करारे दास हणैं जोगी किऐ, बधाने दास निं पर पबित्र आत्में दास किल्हैकि मोसा गूरै लिखै बधाना करै भेटा मौत पर पबित्र आत्मां करै भेटा नऊंईं ज़िन्दगी।#लुआ. 24:8; जेर. 31:31; 32:40
7परमेशरे शास्त्रा दी लिखै दै पराणैं बधाना करै एछा मौत अर तेऊ दैनअ सह पात्थरे तगती दी लिखी करै मोसा गूरे हाथै, तेता का थिअ इहअ झ़ामण लागअ द कि इज़राईली निं तेऊए मुंह भाल़ी सकदै तै। 8तेखअ अह आत्में करार होर बी प्रतप्पा आल़ी किल्है निं हणीं?
9ज़ै सह दोशी बणाणैं आल़ी करार प्रतप्पा आल़ी थिई, अह धर्मीं बणाणैं आल़ी नऊंईं करार होर बी खास्सी प्रतप्पा आल़ी किल्है निं हणीं आथी? 10असली गल्ल आसा एही कि एऊ नऊंईं करारे प्रतप्पा सम्हनै निं पराणीं करारो प्रतप्प किछ़ै रहअ।#लुआ. 34:29-30
11किल्हैकि मोसा गूरे बधान ज़ुंण कबल्लअ घटदअ रहअ, ज़ै तेथ एतरअ प्रतप्प थिअ, तै सह नऊंईं करार ज़ुंण सदा बणी रहणीं, तेथ ता होर बी खास्सअ प्रतप्प हणअ?
12इहअ करै बोला हाम्हैं एतरी आशा अर हैअ डाही करै। 13हाम्हैं निं मोसा ज़िहै आथी, ज़ुंणी आपणैं मुंहां दी पल्दअ थिअ पाअ द, कि इज़राईली मणछै निं लोल़ी सह घटणैं आल़अ झ़ामण भाल़अ।#लुआ. 34:33
14पर तिंयां हुऐ बेसमझ़, किल्हैकि आझ़ तैणीं बी आसा तिन्नां लै पराणैं बधाना पहल़दा बारी तिन्नें दिला दी सह ई पल्दअ पल़अ द। पर मसीहा दी विश्वास करी उझ़िआ सह पल्दअ उझै। 15आझ़ तैणीं बी ज़ेभै मोसा गूरे कताबा पहल़ा, तिन्नें दिलै रहा पल्दअ पल़ी अर तिंयां निं एता राम्बल़ै करै समझ़ी सकदै। 16पर ज़ेभै तेऊओ दिल प्रभू बाखा लै फिरी मसीहा दी विश्वास करे, तेभै जाणअ सह पल्दअ उंधै खुल्ही।#लुआ. 34:34; ईशा. 25:7
17प्रभू; आत्मां आसा अर ज़िधी प्रभूए आत्मां आसा, तिधी आसा बधाना का आज़ादी। 18पर ज़ेभै म्हारै नांगै मुंहां का प्रभूओ झ़ामण शुझिआ इहअ कि ज़िहअ हाम्हैं आर्शू दी भाल़ा। प्रभू संघै ज़ुंण आत्मां आसा, हाम्हैं रहा तेऊ ई च़मकिल्लै रुपा दी कणीं-कणीं हई बदल़दै लागी।
Seçili Olanlar:
2 करिन्थी 3: OSJ
Vurgu
Kopyala
Karşılaştır
Paylaş
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
This work is licensed under Creative Commons Attribution-ShareAlike 4.0 License.