1 थिस्सलूणी 4
4
एही ज़िन्दगी ज़ुंण परमेशरा खुश करे
1भाईओ, हाम्हैं करा तम्हां का अरज़ अर तम्हां समझ़ाऊआ हाम्हैं प्रभू ईशू दी कि ज़ेही तम्हैं हाम्हां का ठीक च़ाल-च़लणीं, परमेशर खुश करनअ आसा शिखल़अ द, अर ज़िहअ तम्हैं च़ला बी, तिहै ई होर बी लागा तम्हैं बझ़दै। 2किल्हैकि तम्हां का आसा थोघ कि हाम्हैं प्रभू ईशू बाखा तम्हां लै कुंण-कुंण हुकम पजैल़ै।
3किल्हैकि परमेशर च़ाहा इहअ कि तम्हैं हआ पबित्र मतलब-कंज़रैई का रहै दूर 4अर तम्हां मांझ़ै लोल़ी सोभी का थोघ हुअ कि आपणीं बेटल़ी संघै किहअ करै रहणअ, ज़िहअ करै तेसो अदर हआ अर तैहा छ़ाडी बागै डेऊणेओ पाप निं करी। 5एऊ कामां निं सिधअ आपणीं देही खुश करने च़ाहा पूरी करना लै करी, अर नां तिन्नां होरी ज़ाती ज़िहअ हई ज़हा का परमेशरो थोघ निं आथी। 6आपणीं देही डाहणीं आपणैं बशै अर नां आपणीं देहीए भुखा लै आपणैं भाई ठगी अर नां तेऊ लै कोई दाअ-पेच़ च़लाऊई। किल्हैकि प्रभू दैणीं इना सोभी गल्ला पिछ़ू सज़ा, ज़िहअ कि हाम्हैं पैहलै बी तम्हां का बोलअ अर चतैनगी बी दैनी।#भज. 94:1
7किल्हैकि परमेशरै निं हाम्हैं छ़ोतलै हणां लै आथी शादै दै पर हाम्हैं आसा पबित्र हणां लै शादै दै। 8एते ई बज़्हा ज़ुंण ऐहा चतैनगी बृथा समझ़ा, सह निं मणछा बृथा समझ़दअ पर सह समझ़ा परमेशरा बृथा ज़ुंण तम्हां लै आपणअ पबित्र आत्मां दैआ।
9आपणैं साथी-भाई संघै झ़ूरी डाहणें बारै लिखणे निं मुंह ज़रुरत आथी। किल्हैकि आप्पू मांझ़ै झ़ूरी डाहणीं आसा तम्हैं आप्पै परमेशरा का शिखल़ी दी।#जोह. 3:11; रोम. 12:10
10तेतो बी आसा सोभी का थोघ कि मकिदुनिया मुल्खै सोभी विश्वासी भाई लै आसा थारै दिलै झ़ूरी, पर भाईओ, हाम्हैं समझ़ाऊआ तम्हां इहअ कि होर बी लागा आजू बझ़दै।
11ज़िहअ हाम्हैं तम्हां लै हुकम आसा दैनअ द, तिहै ई रहा च़ुप्प-च़ुप्पै आपणैं काम-काज़ करदै अर आपणैं-आपणैं हाथै रहा खटदै लागी। 12बागै होरी लोगा मांझ़ै बी लोल़ी थारअ शोभलअ बर्ताअ हुअ ताकि तिंयां बी थारअ अदर करे अर तम्हां निं किछ़ू गल्ले काम्मी लोल़ी रही कि तम्हैं होरीए भरोस्सै रहे।
ईशूओ भिई फिरी एछणअ
13भाईओ, हाम्हैं निं च़ाहंदै कि तम्हैं तिन्नें बारै ज़ुंण मरी आसा गऐ दै, तिन्नें बारै नज़ाण रहे, इहअ निं हआ कि तम्हैं होरी ज़िहअ शोग करे, ज़हा मरनै का बाद आशा ई निं आथी। 14किल्हैकि, ज़ै हाम्हैं भरोस्सअ करा कि प्रभू ईशू मूंअ अर ज़िऊंदअ बी हुअ, तिहअ ई ज़ुंण मसीहा दी मूंऐं दै आसा तिंयां बी आणनैं परमेशरा मसीहा संघै बापस।
15किल्हैकि हाम्हैं बोला प्रभूए बैणे साबै तम्हां लै कि हाम्हैं ज़ुंण अज़ी बी ज़िऊंदै आसा, ज़ेभै प्रभू फिरी एछणअ तेभै निं हाम्हैं तेऊ सेटा मिलदै तिन्नां का आजू डेऊणैं ज़ुंण विश्वासी मरी आसा गऐ दै।
16किल्हैकि प्रभू ईशू मसीहा होथणअ आप्पै स्वर्गा का, तेभै शुणनअ अर प्रधान स्वर्ग दूतो बोल अर परमेशरे नाद बाज़णीं, अर ज़ुंण विश्वासी मरी आसा गऐ दै, तिंयां हणैं पैहलै ज़िऊंदै। 17तेखअ हाम्हैं ज़ुंण ज़िऊंदै अर बच़ै दै आसा, तेखअ च़कणै हाम्हैं बी तिन्नां संघै उझै बादल़ा दी प्रभू सेटा मिलदै अर तेभा पोर्ही रहणैं हाम्हैं सदा प्रभू संघै। 18इहअ करै करा इना गल्ला करै एकी-दुजै लै हैअ दैई।
Seçili Olanlar:
1 थिस्सलूणी 4: OSJ
Vurgu
Kopyala
Karşılaştır
Paylaş
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
This work is licensed under Creative Commons Attribution-ShareAlike 4.0 License.