SAMWELI 3
3
Nyasaye Yalaanga Samweli
1Mumatukhu kenako, lwa mwana Samweli yali narumishilanga Mwami Nyasaye, Eli namwivaalilanga khuli akhola mihinzilu, likhuva liu Mwami Nyasaye liali nilishili khuhulilikhanakhu; khandi malolo khurula khuye shikaliho manyishi tawe. 2Litukhu lindi vutukhu, Eli wali niyavekhula, yali nakoni isiisi wewe munzu mwemwe; 3Samweli yali nakoni mu Litempeli liu Mwami Nyasaye, ha Lisanduku li Lilakano litakatifu liali niliavikhwa. Lwa itaaha yali nishiakhanga, nuvushili khu shia mu mavwevwe, 4Nyasaye yalaanga Samweli. Samweli yachipa, “Ndi hanu!” 5Niyilukhaka natsia khu Eli, navoola, “Ndi hanu, shichila unanji.”
Navutswa Eli yamuvoolela, “Shiali ninzi ukhulaanji tawe; kalukha utsi khukona.” Khulwa yako, Samweli yakalukha natsia khukona.
6Mwami Nyasaye yamulaanga khandi, “Samweli!” Samweli yavukha natsia khu Eli, navoola, “Ndi hanu, shichila unanji.”
Eli yamuvoolela, “Mwana wanje, shiali ninzi ukhulaanji tawe; kalukha utsi khukona.”
7Samweli shiyali wamanyakhu Mwami Nyasaye tawe: khandi yali nashili khuvoolelwakhu likhuva liu Mwami Nyasaye.
8Mwami Nyasaye yalaanga Samweli lwa khavaka; ma Samweli navukha mu tsindolo, natsia khu Eli, navoola, “Ndi hanu, shichila unanji.”
Eli yamanya ndi Mwami Nyasaye neye walaanganga mwana wi shiyayi mwenoyo. 9Nalwo lwa Eli yavoolela Samweli, “Kalukha utsi khukona tsindolo, khandi niiva alakhulaanga, khutukha uvoole, ‘Mwami Nyasaye, lomoloma, shichila inzi murumishi wowo mbulishitsanga.’ ” Khulwa yako, Samweli yasimukha natsia khukona tsindolo havundu ha yakonanga.
10Mwami Nyasaye yitsa, nasinjilaho; khandi nalaanga khuli yali namulaanji yolo, “Samweli! Samweli!”
Samweli yachipa, “Lomoloma, inzi murumishi wowo mbulishitsanga.”
11Mwami Nyasaye yavoolela Samweli, “Lola, ndi himbi khukhola shindu mu shivala shia Israeli shilitsa khukhola mundu ulihulila makhuva khulondokhanakhu alichenyinywa. 12Khulitukhu lienelo, niitsa khurweshitsila Eli shia shindu shiosi shitamanu shiu khurishitsa shia navoola shiliitsa khwikholekha khu vandu vi inzu yeye, muliraanga khutukha mulimalilikha. 13Mbele nimuvoolele ndi nzitsanga khusalilitsa vandu vi inzu yeye khumatukhu koosi, shichila vaana veve vi shiyayi valomolome vindu vitamanu khulondokhana khwinzi. Eli yali wamanya vakholanga kenako, navutswa yali wa yambakhana khuvakaya. 14Khulwa yako, nzisuuhilanga vandu vi inzu ya Eli ndi khali musango inoho shihanwa shivulakhuho, shinyala khurulitsaho vutamanu vurulananga khu vwoni vutamanu yuvu.”
15Samweli yakona mushitali khutukha mu mavwevwe; navukha niyikula miliango chi inzu yu Mwami Nyasaye. Yaria khuvoolela Eli malolo kenako, 16navutswa Eli yamulaanga navoola, “Mwana wanje, Samweli.”
Samweli yamuchipa, “Ndi hanu.”
17Eli yamureeva, “Ni shina shiu Mwami Nyasaye akhuvoolele? Ukhambisakhu khali shindu shiosi tawe. Nyasaye alakhusalilitsa vululu muno, niiva ulambakhana khumbolela shia shindu shiosi shiakhuvoolele.” 18Khulwa yako, Samweli yamuvoolela shia shindu shiosi. Samweli shiyamuvisakhu shia shindu shiosi tawe. Eli yavoola, “Ye mwene nu Mwami Nyasaye. Lekha mwene akhole shialolanga ni shilahi khuye.”
19Lwa Samweli yali nashihindilanga, Mwami Nyasaye yali halala naye khandi narweshitsa shia shindu shiosi shia yali navooli. 20Vaisraeli voosi, khuraanjila khuluveka lulala lwi shivala khutukha khu lundi, vamanya ndi ni kilikali, Samweli nu muprofeti wu Mwami Nyasaye. 21Mwami Nyasaye yatsililila khuloleshela mu litaala lia Shilo, ha yalolekha khu Samweli khandi nalomoloma khuye. Lwa Samweli yalomoloma, Vaisraeli voosi vamuhulishitsa.
© The Bible Society of Kenya, 2013