O NGO RUT 1
1
O Elimelekh deʼ ai tau manyawa ima tururu o Moabika
1-2Maöraha mahira o Israel koiwahi toönanga manga koano womatengo, o Kanaan maberera yabänga o balä o habirokata. O öraha gënanga naga o nauru womatengo ai romanga o Elimelekh. Unanga o Efrataino manyawa, deʼ wogogere o Betlehemoka o Yehuda madairaoka. Karana o balä o habirokata gënanga, ünanga woiki o Moab ma bereraika ima kinïki ngoi hekata, o ngo Naomi, deʼ ai ngohaka o nauru yahinoto: o Mahlon deʼ o Kilyon. Daha önanga yogogere dokengoka. Maöraha önanga dokengokahi, 3O Elimelekh wohonenge. Yogogogere o ngo Naomi deʼ ami ngohaka yahinoto. 4Ami ngohaka yahinoto gënanga yokawingi deʼ o Moab manga moholehe, manga romanga o ngo Orpa deʼ o ngo Rut. O taongo ngimoi ipahaika, 5o ngo Naomi ami ngohaka o nauru yahinoto gënanga, yohonengoli, hiädono o ngo Naomi koiwaka yaoa ami rokata yaoa ami ngohaka yahinoto.
O ngo Naomi deʼ o ngo Rut yolio o Betlehemika
6Oraha muruono naga ipaha, o ngo Naomi moihene ma Jou wahi döakoka o barakati o Israel manyawaika deʼ manga gugutuku ma hasili ma oa-oa. Karana gënanga o ngo Naomi deʼ ngomi hunungu yahinoto ima hidiai hupaya yamal̄a o Moab. 7Onanga ima goraka ima kinïki yolio o Yehudaika. O ngekomo mahi dogoronaka, 8o ngo Naomi mätemo ngomi hunungu yahinotoika gënanga, ”Ngini nilio dika nia Ayo manga tauika. Tanu ma Jou kaya oa-oa nginika hokä ngini kaya oa-oa ngohino deʼ onangika yohö hone-honengoka gënanga. 9Tanu ma Jou Ai hininga yadae-daene winihi döaka nginika hupaya ngini nikawingoli.”
Matemo iböto hoko gënanga, o ngo Naomi moma hilooa onangika deʼ ma ame önanga. Mä o ngo Orpa deʼ ongo Rut yoari ima pöa-pöaka, 10deʼ yotemo o ngo Naomika, ”Kowali Ayo! Ngomi mini nïki homa kao dede ngona Ayo ani nyawaika.”
11”Uha, ngohaka!” o ngo Naomi mohaluhu, ïholoi yaoa ngini nilio. Mangale okia ngini nihinïki dede ngohi! Koigoungua ngohi takunokaua tohidadi o ngohaka mangale idadi nia rokata? 12Nilio, ngohaka, hababu ngohi duru ihi timonoka mangale tokawingoli. De hohi ade kanagahiö o nganono mangale ngohi to kawingi o hutu nënanga dika deʼ tamake o ngohaka o nauru, 13boteka ngini nimau nia damä hiädono önanga yolamoko? Onagona yato karana o hali gënanga ngini nikawingua deʼ o nyawa mahomoa? Kowali, ahi ngohaka, uha hoko gënanga! Ngohi tamao ahi hininga ihuha aha o kia ngini kiani nia ohana karana ma Jou Ai hukumanga ngohino.”
14O ngo Rut deʼ o ngo Orpa yoarioli yakua-kuatil̄e ipaha o ngo Orpa moma hilooa deʼ momi ame ngomi hunungu daha munanga molio. Mä o ngo Rut moluku momi tingaka ngomi hunungu gënanga. 15O ngo Naomi momitemo munangika, ”Rut, nomi lega! Ngoni tiopo molioka ami nyawaika deʼ ami goma-gomangika. Ngonaö noiki, ngohaka, nomi nïki munanga molio!”
16Mä o ngo Rut mohaluhu, ”Ayo, uha Ayo nohihuloko ngohi tolio deʼ toni mal̄a Ayo! Ngohi tomau toni nïki dede ngona Ayo. Kiaikaö Ayo noiki, genangika ngohi toiki. Kiakaö Ayo nogogere, genangokaö ngohi tomau togogere. Ayo ani nyawa, gënanga kato ngohi ahi nyawa. Ma Jou Madutu Ayo nihuba-huba, aha ngohiö tihuba. 17Kiakaö Ayo nohonenge, genangokaö ngohi tomau tohonenge deʼ toma lungunu. Tanu ma Jou wohi hukumu ngohi watotubuho, nako ngohi tomau toma tingaka deʼ Ayo, sawaliua o honenge inahiki tingaka deʼ ngona!”
18O ngo Naomi momimake o Rut moma togowini mangale momi nïki, ho, munanga o kia-kia okauaoli motemo.
19Onanga ihi gila-gila manga dodagi hiädono ima ihi ädono o Betlehemika. Hoko gënanga önanga imahi ädono dokengoka, o kota gënanga ingodumu yotodokana. O ngongoheka dokengoka yotemo, ”Igoungu munanga gënanga o ngo Naomi?”
20O ngo Naomi mato, ”Uha nihi ahoko ngohi o ngo Naomi, nihi ahoko dika o ngo Mara, hababu ma Jou woko Kuaha wohi mal̄aika ngohi towango io manga deʼ o mali. 21Maöraha ngohi nenangoka deʼ toiki ngohi deʼ ma enangoka, mä o öraha nënanga ma Jou wohi ao wohihigilio ngohi deʼ ahi giama mahomoa. Ma hababu gënanga uha ngini nihi hetongo ngohi o ngo Naomiohi, karana ma Jou woko Kuaha wohi hukumoka ngohi deʼ o hangihara kohangoë!”
22Hoko gënanga majarita sarakia o ngo Naomi molio o Moab deʼ maino ima nïki deʼ ngomi hunungu o Moab manyawa gënanga. Onanga ima hiädono o Betlehemika maöraha o mulaenge o gandum youtuku.
