O YOSUA 1
1
Ma Jou Madutu wï hüloko o Yosua wa ora o Kanaan
1O Musa, ma Jou Ai gilaongo gënanga wohonenge ipaha ika, ma Jou wïtemo o Musa aiwakilika, enagënanga o Yosua o Nun aingohaka. 2Ma Jou wato, ”O Musa Ahi giläongo wohonengoka. Done o öraha nënanga kayao deʼ ngona deʼ yongodumu o Israel manyawa nima hidiai mangale niatöbongo o Yordan ma Ngairi, deʼ niongöhama o berera Tahidöa-döaka onangika. 3#Ul. 11:24-25 Ngohi ta hetongoka o Musaika moi-moi o daera niö agu-aguroka Tohidöakoka ngonaika, Yosua, deʼ yongodumu Ahi umatika. 4Nia daera aha imahöheika o tönaka ikokakahaka deʼ yaino o koreharail̄e idaduoka hiädono o Libanon mal̄oku o koremieuku deʼ o Efrat ma Ngairi maämo-ämokoka gënanga de yaino o wange mahiwaroko i gila-gila yakilolitïno o Het manyawa manga berera hiädono o Ngöto i Kokoronaika o wange madumuniha. 5#Ul. 31:6, 8; Ibr. 13:5 Ka o nyawa moi ö ma aha koyakunua ini hïhanga ngona, Yosua, hoani wowängo ma umuru. Hababu Ngohi aha salalu toni datekuku hokä mahira Ngohi tidatekuku o Musa. Ngohi tonimal̄aikaua ngona. 6#Ul. 31:6, 7, 23 Kokiani ngona nongaku nagöu-göungu deʼ nobarani, hababu ngona aha nä tuda o höana deʼ o berera manyawa nënanga maöraha önanga yö gögere o berera ta hijäjajioka toönanga mangaete deʼ manga tohoraika. 7Duga-duga kokiani ngona i göu-göungu nongaku deʼ no barani. Ngona kokiani nö göana hupaya ngona nohingounu o tita i ngödumu wohidöa-döaka o Musa Ahi gilaongo gënanga ngona ika, ka ma huhutulö mauha ngona ko nö lega ika ua, done ngona aha no häsili. 8O tita ma buku gënanga kokiani salalu nä da basa Ahi umatika. No nä dötoko o buku gënanga o hutu deʼ o wange, hupaya salalu ngona na diai mata-mata ta to tüli-tülihi ma goronaka. Nako ngona nadiai mata-mata gënanga, aniwowängo aha okia ua iküranga deʼ nohasili. 9Nö hohininga, Ngohi toni hiparetaka ngonaika hupaya ngona i göu-göungu nongaku deʼ nobarani. Uha ngona nohawana ekola iküranga nonauru, hababu ngohi ma Jou ani Jou Madutu tonidatekuku ngona kia ika dika ngona nöiki.”
O Yosua wohidöaka o pareta deʼ o hidümutu o Israel manyawaika
10Deʼ o Yosua wahipareta o Israel manyawa manga tutüda-tutüda 11hupaya yakilöliti o Israeloka manga tau-tau madoomu yamöde-mödekika deʼ wohidöaka o pareta nënanga, ”Nia sadia o biläono, karana o wange hangeohi ngini kokiani niatöbongo o Yordan ma Ngäiri mangale niögögere o berera ma Jou nia Jou Madutu winihidöa-döakoka nginika.”
12 #
Bil. 32:28-32; Ul. 3:18-20; Yos. 22:1-6 O Ruben, deʼ o Gad manga hoanika deʼ o Manasye aihöana ma hononga, o Yosua wätemo, 13”Niöhohininga! O Musa ma Jou Ai gilaongo gënanga wahëtongoka nginika o tönaka o Yordan ma Ngairi mawange mahiwaröko idaduoka gënanga ma Jou nia Jou Madutu winihidoäkoka nginika la idadi niaberera. 14Mata-mata niahekata deʼ niangohaka deʼ niaaiwani o gigini yakunu igögögere nënangokadau, mä yopoparangi kokiani ima hidiai yoparangi deʼ yähihira o Israel manyawa mahomoa yatöbongo o Yordan ma Ngairi. Ngini kokiani niariwo önanga 15hiädono önanga yogögere o tönaka o Yordan ma Ngairi mawange madumuniha idaduoka nënanga ma Jou nia Jou Madutu wahiöak-döaka onangika. Ma Jou wohidöaka irörirïdi ihuru-haraua yongödumu o Israel manyawaika deʼ ipaha dahaö ngini yakunu nilio niatönaka mahireteika o Yordan o wange mahiwaroko idaduoka nënanga, winihidöa-döaka o Musa ma Jou aigilaongo gënanga nginika.”
16Done o Ruben deʼ o Gad manga höana, deʼ o Manasye aihöana mahononga gënanga yahäluhu, ”Okiadika ngona nohipareta ngomino, ngomi aha miadiai, deʼ okiaika dika ngona nomïhüloko ngomi miöiki, ngomi aha miöiki. 17Ngomi aha mihingounu ngonaika imatero hoka hokä ngomi ö salalu mihingounu o Musaika. Tanu ma Jou Madutu wonidatekuku hokä ”Unanga wïdatekuku o Musa! 18Moi-moi o nyawa yöluku imaponu anikuahaika, ekola yamotekua ani pareta, aha yä hükumu yähohonenge. Kokiani ngona igou-goungu nongaku deʼ nobarani!”
