O YESAYA 7
7
Moi o behehongo mangale ma Koano Ahas
1 #
2Kok. 16:5; 2Taw. 28:5-6 Ma koano Ahas ganga o Yotam aingohaka o nauru deʼ o Uzia aidanongo. Maöraha ünanga wapareta o Yehuda, idadi o parangi. O Rezin ma koano Siria, deʼ o Pekah o Remalya o Israeloka manga koano aingohaka o nauru, yoboa yaparangi o Yerusalem. Mä önanga yakunua yaora o kota gënanga.
2Maöraha ma koano Yehuda woihene o Siria manga tentara ma duduono yowohamoka o Israel madaeraika hokä imahi koboa, ünanga deʼ ainyawa duru yohawana, hiädono önanga yohahara hokä o gota yagiwi o hidal̄oko.
3Ma Jou witemo o Yesayaika, ”Niao ani ngohaka o Syear-Yasyub deʼ nioiki nimaka make ma Koano Ahas. Ngona aha nimake ünanga o guhu mabaiti mabarenoka mal̄okuil̄e idaduoka, manga manarama yofoka-foka manga ngï. 4Nahetongo ma koanoika ünanga kiani womagoana womahi dodiai mä kahirahi womarirïdi. Unanga ngarouha wohawana ekola wobingu. Manga dohata ma Koano Pekah deʼ ma Koano Rezin de aitentara hagala o Siria manyawa gënanga iholoiua ibahaya o uku magota madino hinotoino il̄ofo-l̄ofo. 5O Siria yorimoi yodiaioka o doomu madorou de o Israeloka deʼ manga koano. 6Onanga yomau yaparangi o Yehuda deʼ yahawa-hawana manyawa, hupaya yahiboa onangino daha iwigoraka o Tabeel aingohaka o nauru wodadi o koano.
7Mä Ngohi, o Jou, tohimatoko o hali gënanga aha idadiua, 8karana o Siria iholoiua ikuata de o Damsyik makota ma titi, deʼ o Damsyik iholoiua ikuata de ma Koano Rezin. Enahioko maöraha o taongo moributanga de motoa magoronaka, o Israeloka aha yokoki kerewoto hiädono yakunua imatumungu hokä o hoana deo berera manyawa. 9O Israeloka iholoiua yokuata de manga kota matiti, o Samaria, deʼ o Samaria iholoiua ikuata de ma Koano Pekah. Nako ngini niagou-goungu ningaku Ngohino, maraioka ngini niakunu nimatumungu.”
O Imanuel manonako
10Ma Jou wohiadono o behehongo mahomoa o Ahasika: 11”Nogahoko hupaya ma Jou ani Jou Madutu wohidöaka o nonako ngonaika, boteka o nyawa yohone-honenge manga duniaino matimioka ekola daku o dihanguku.”
12O Ahas wohaluhu, ”Ngohi toluku togahoko o nonako. Ngohi toluku titaili ma Jou.”
13Daha ma nabi Yesaya wotemo, ”Nako hoko gënanga, noihene hei Koano Daud aidifauku! Iyaoauahi ngini niauji o nyawa manga sabari, hiädono ngini nia uji ahi Jou Madutu o aisabari? 14#Mat. 1:23 O öraha nënanga, ma Jou mahirete aha wohidöaka o nonako ngonaika: Momatengo o moholehe o ngoheka mohiao o nyawa, aha mihingohaka womatengo o ngohaka o nauru iwihiromanga o Imanuel. 15Maöraha ünanga yaoaka wolamoko, mangale wakunu wal̄ë maputuhu mahirete, o bereraka gënanga aha mata-mata kadema ënanga. 16Hababu ma orahauahi gënanga iboa, o berera hinoto yapöpareta o kokoano namodo-modongo gënanga aha yamal̄aika ihomoa.
17Ma Jou aha wihiboaino ma Koano Asyur, daha ngona deʼ ani tau manyawa ingodumu ikali anikawaha aha niamao hagala o wange iomanga o dehehoto iholoi hoborohono ngaro de okia mamoi iböto ngini niamao mamulaenge o Israel deʼ o Yehuda mapareta iregu.
18-19O oraha gënanga ma Jou aha wäahoko o Mesir manyawa de o Asyur manyawa, daha o hoana deo berera hinoto gënanga yoboa hokä o guhuru de matika deo hungu ihidoomuino hagala o wai ibako-bakoro deo helewo madonga-dongaika. Onanga aha yätamunu o momo mahohihika yogetongo deʼ o ngï mamomomoka yogetongo.
20Ma Jou aha wihewa ma koano Asyur mangale wahidiai o Israeloka hokä womatengo wokori-kori wamata wakori mata-mata manga tadauru deʼ manga gogo mangaröehoka.
21O öraha gënanga, nako womatengoani wopaliara o hapi magö o dutu moi deʼ o kabingi o dutu hinoto dika, 22o aiwani o gigini gënanga ihihasili o susu ihoholoiuku mangale hagala o nyawa mahou o bereraka gënanga. I goungu, önanga aha yokere o susu deʼ o madu.
23Maöraha gënanga hagala o angguru madumule moi-moi yodatomo o angguru mautu o ribuhu moi de maija o tiwi o haaka o ribuhu moi, aha yongango o momo irubu-rubu mahohihika. 24O nyawa yoi-oiki dokengika kiani imagao o toimi mal̄eha de madoto, hababu o berera yamode-modekika gënanga i omanga o momo marubu-rubu mahohihika. 25Deʼ madaera de mal̄oku mabuturungoka biaha yatumule deʼ yodatomo, iomanga o momo irubu-rubu de mahohihika, hiädono o nyawa yobaraniua dokengika. O tonaka gënanga duga-duga mabaraguna hokä o ngï o hapi deʼ o duba mangale o momo i ol̄omo.”
