O YESAYA 26
26
Ma Jou Madutu aha wahidöaka o utumu Ai umatika
1O öraha gënanga o nyawa aha ihinyanyi o nyanyi nënanga o Yehuda matonakoka:
”Hokokia makuata tongone nanga kota;
ma Jou Madutu mahirete wohigoko mabebeno
o mehele, nenangoka ngone hohalamati.
2Nia helenga hagala o ngorana maago-agomo,
hupaya yowohama o hoana deo berera yososatia,
o hoana deo berera yadodiai manga Jou Madutu Aimau.
3Jou, Ngona nohidöaka o dame deʼ o lola
o nyawa manga hininga i bitu-bitumika,
hababu ünanga woningaku Ngonaika.
4Niwingaku ma Jouika hokogenangika,
hababu o Jou ma Jou Madutu hokogenangika wonä hohongino ngone.
5Ma Jou wahikauku o nyawa manga hininga ikokurutil̄e;
Unanga wawedere toönanga manga kota mabebeno o mehele,
deʼ wohirataika de o tonaka.
6Hagala o mihikini manyawa deʼ yohohangihara, aha yapito-pitoko.”
7O nyawa yorikoto imadagi o ngekomo iriko-rikotoka,
hababu Ngona, Jou, o ngekomo nahihira onangika.
8Ngomi mianïki Ani putuhu, ya Jou,
deʼ minidodamä Ngona;
Ngona la o higiriri deʼ tongomi miahininga inimömau-mau.
9Ahi jiwa inimau Ngona maöraha o hutu-hutu,
ahihininga duru inimau Ngona maöraha o ngorumino.
Dama maöraha Ngona najuru hakimi o dunia,
o dunia manyawa aha ihioriki okia madiai.
10Ngaroka o nyawa madorou iwihidiai de yaoa-oa,
ünanga womadotokua dika okia madiai.
O negara hukumokaö ünanga wodiai iadilua,
deʼ woluku wohigoungu ma Jou Aikuaha.
11 #
Ibr. 10:27
Jou, Ngona nomahidiaioka nähukumu Ani haturu,
maöraha i hiorikua.
Mal̄aika önanga duru yämal̄eke yamake Ani dora Ani umatika.
Mal̄aika önanga yobinaha yomata mangale o hukumanga Nasosadia mangale önanga.
12Jou, Ngona aha nadiai ngomi milola;
hagala ngomi mia kokarajanga,
Ngona nadodiai mangale ngomi.
13Ngomi mamoi iböto imikuaha o tua-tuanga mahomoa,
mä duga-duga Ngona ngomi minihigoungu,
ya Jou tongomi mia Jou Madutu!
14Onanga yohonengoka deʼ aha yowango wangokauaoli,
mangawomaha aha imomikokaua.
Hababu önanga Nabinaha namata-mataka
deʼ Naehe anihohiningaka.
15Ngona nomidogo miwöeoka ngomi Ani umati, ya Jou,
deʼ nawoatika tongomi miadaera,
karana gënanga Ngona minihimulia.
16Ngona nomi hukumoka ngomi;
o dehehoto magoronaka ngomi mimaidulu Ngonaika,
deʼ mimaniata Ngonaika, Jou.
17Hokä o ngoheka momau mongohaka
momahirikiti deʼ mopöaka mahiri,
hoko genangö ngomi Ani himangoka, Jou.
18Ngomi miröehe deʼ mihirikiti mahiri,
mä okia-kiaua mihingohaka;
ngomi mihidöakua o halamati o duniaika,
miodogoua o manyawa yogogogere.
19Ani umati yohone-honengoka aha yowangookaoli,
hagala toönanga manga maiyeti aha imomikoli.
O nyawa yäjere-jereoka o tonaka magoronaka aha yomomiki deʼ imauli-ulili.
Hokä o dumunitara yasanangi o dunia, Ngona nahiwango Ani umati madekanoka yahö hone-honenge.
Ma Jou wajuruhakimi deʼ wohigilio hoi hira-hirali
20Niwohama niatau magoronaika, hei Ahi hoana, daha niabeno o ngorana. Nimangiunika o öraha mahuhutulu hiädono ma Jou Ai dohata itouroka. 21Ma Jou aha wouti ai ngï Wogogogere o horogaka de wauku mangale wahukumu o dunia yogogogere karana toönanga manga baradoha. O doma önanga yadodiai de kaima ngiu-ngiunu aha wahelenga. O tonaka yapohukokauaoli hagala o nyawa yohonenge yatoma.
