O SAMUEL MAHINOTOKA 7
7
O Natan ai behehongo o Daudika
(1Taw. 17:1-15)
1Ma Jou wihohongino ma Koano Daud hagala manga ruaë ai haturuino, hiädono ünanga wakunu wotatapu ai kadato ma goronaka. 2Ma koano witemo ma Nabi Natanika, ”Nolega, nënanga togogere o kadatoka yododiai o liwewuru magota o Libanonino, ena hioko ma Jou Ai Jaji ma Peti duga-duga igogono o hubayanga matau magoronaka dika!”
3O Natan wohaluhu, ”Nadiai hagala ani mau Jou Koano, hababu ma Jou woniriwo Jou Koano.”
4Mä o hutu gënanga ma Jou witemo o Natanika, 5”Noiki de nohi ädono ahi gilaongika o Daud, Ahi behehongo nënanga, ’Kiaka yakunu ngona nohigoko o tau Ngohino. 6Mamulaenge o Israel manyawa tahihupu o Mesirino hiädono o öraha nënanga, komaiwahi Ngohi to gogere o tau moi magoronaka, mä hoko genangika todagi tongika-ngino deʼ togogere o tau-tauoka moi. 7Madekana Todagi tongika-ngino mimaki nïki o Israeloka manyawa, komaiwahi Ngohi taleha o tutuda-tutudaika Taö iri-irikoka, okia mahababu önanga ihigokoua o tau-tau o liwewuru magota Libanonino mangale Ngohi.’
8Hababu gënanga, Natan, nihi ngahu Ahi gilaongika o Daud, Ngohi, ma Jou Toko Kuaha, titemo unangika, ’Ngona toni l̄ëoka ani manaramino o duba nogoa-goana o tonaka malua-luasoka deʼ toni goraka nodadi o koano Ahi umatoka o Israel. 9Ngohi toni tomotekoka ngona kiaika dika ngona noiki, deʼ hagala ani haturu Tabinahaka maöraha ngona nimateke parangi. Ngona aha toni diai ini nako hokä o tutuda-tutuda duru yolamo-amoko o duniaka. 10-11Ikali, Ahi umatoka o Israel Tasadiaoka o ngï de Tahuloko önanga yotatapu genangoka, hupaya önanga yotatapu genangoka, hupaya önanga yakunu yowango yorïdi, koyaruaë okauaoli. Kadeʼ mulaenge toönanga manga böa o tonakino nënanga mahira, deʼ Tagoraka o tutuda-tutuda mangale önanga, önanga yaparangioka hagala o nyawa yoigo ima poputurungu, mä o hali gënanga aha idadi okauaoli. Ngohi tojaji ngona aha norïdi hagala ani ahaturuino deʼ Tonihi döaka ngonaika o ngohaka deʼ o danongo. 12-13Dama, nako ani ajali yadono, deʼ ngona ini lungunu ani ete deʼ ani tohora manga jereoka, woma tengo ani ngohakino aha tigoroka wodadi o koano. Unanga aha wohi goko o tau mangale Ngohi. Ai pareta aha Tohi kuata deʼ mangale kahi ädo-ädonika womatengo aidifauku aha wopareta hokä o koano. 14#2Kor. 6:18; Ibr. 1:5 Ngohi aha todadi ai Ama, de ünanga aha wodadi Ahi ngohaka o nauru. Maöraha okia ünanga wodiai o howono, ünanga aha Tihukumu hokä womatengo o Ama wihukumu aingohaka. 15Mä Ngohi aha tatapu todiai o oa-oa unangika imamoteke deʼ Ahi jaji. Ahi jaji unangika aha kahirahi Tasösö, hokä Tadodiaiua o Saulika Tihi rehenoka ai kuruhi oka hupaya ngona yakunu nodadi o koano. 16Ngona aha hoko genangika deʼ tongona ani difauku, deʼ Ngohi aha tadiai ani pareta itongohono kahi ädo-ädonika. Mangale kahi ädo-ädonika womatengo ani difauku aha wopareta hokä o koano.’ ”
17Daha o Natan wohi ngahu o Daudika hagala wohinyö nyata-nyata ma Jou Madutu unangika.
O Daud ai syukur manoniata
(1Taw. 17:16-27)
18Daha ma Koano Daud wowohama ma Jou Ai Tau magoronakaika. Unanga wogogere deʼ woma niata, ”Ya Jou Nokö Kurutil̄e, ngohi deʼ ahi tau manyawa ipatutua mia tarima hagala o oa-oa Nohidö dumu-dumutu ngohino madekanino nënanga. 19Ngona nodiaioka o jaji ima korona ahi difauku mangale maöraha aha iboa. deʼ Ngona nohihi matokoka o hali gënanga ngohino, ngaroka ngohi duga-duga kao nyawa, ya Jou No ko Kurutil̄e! 20Okiahi yakunu totemo Ngonaika? Ngona nohi öriki hagala mata-mata mangale ani gilaongo nënanga. 21Deʼ Ani jaji deʼ mangale Ani mau mahirete Ngona nodiaioka o manarama-o manarama ma ago-agomo gënanga mangale nohï dotoko Ani gilaongo nënanga. 22Ngona igoungu nolamoko, ya Jou Madutu! Duga-duga Ngona Jou Madutu, koiwa imake tero dede Ngona. Ngomi mihi öriki o hali gënanga hababu imihi ngahuoka ka ma hirahi. 23O dunia ingodumu koiwa o hoana hokä o Israeloka. O Israeloka kagenangö moi o hoana Nahi lapahioka o gilaongino mangale yodadi Ani umati mahirete. Hagala o manarama ma ago-agomo deʼ ihera-heranga Ngona nadodiaioka onangika, yadiai Ani romanga yanako o duniaka ingodumu. Hagala o hoana mahomoa ima nïki toönanga manga goma-gomanga Naduhuoka maöraha Ani umati yoiki yoparangi. 24O Israeloka manyawa nahi dadioka Ani umati mahirete mangale kahi ädo-ädonika, deʼ Ngona ya Jou, nodadi toönanga manga Jou Madutu.
25Deʼ o öraha nënanga, ya Jou madutu, noigo Ngona nohi kuata mangale kahi ädo-ädonika o jaji Nohidö demo-demoka imakorona ahi diri deʼ ahi gutiuku. Noigo na diai Nohi jajioka gënanga. 26Kiaka honanga o nyawa aha hoko genangika ihi mulia Ani romanga deʼ yotemo, ’Ma Jou Duru woko Kuaha enagënanga ma Jou Madutu mangale o Israeloka.’ Done mangale kahi ädo-ädonika womatengo ahi gutiukuino aha wopareta hokä o koano mangale o hoana nënanga. 27Jou Duru woko Kuaha! Ngohi tohibarani ahi diri tohi doa ahi niata nënanga Ngonail̄e, hahabu Ngona mahirete nohingahuoka ngohino ahi ngohaka deʼ ahi danongo de ahi gutiuku Nahi dadi o koano mangale o hoana nënanga.
28Ya Jou Duru noko Kurutil̄e, Ngonaö ma Jou Madutu; mata-mata Ani jaji Natotomo, deʼ o hali mahohailoa gënanga nohi jajioka ngohino. 29Hababu gënanga ngohi togahoko, noigo nahibarakati ahi difauku hupaya önanga yamao Ani dora kahi ädo-ädonika. Ya Jou Duru noko Kurutil̄e, mata-mata gënanga nohijä jajioka, done ahi gutiuku aha kahirahi Nahibarakati mangale ka hi ado-adonika.”
