Devidi-Anume 78
78
Tamụnọ Na Ori Atomi Na
1Ị̀ atomi, ọmịnị à tolumarị ye mẹ pokii,
ọ̀ pịkị ḅeri-tokoloma à ḍukoarị ye mẹ pịrị.
2 #
Mat 13.35
Nimi gboloma mie à kọn ḅẹ-yearị
tẹ kẹ kikima wararị elemu sakị ḅẹ aị ma puu-finji,
3wa naa tẹ pịkị nimi tẹ aị,
wamịna aḍapụ ḍuko wa pịrị tẹ aị ma.
4Wa arị kẹ wamịna awọmẹ ḅọịma ḅịa;
wa ḍuko tọrọkọ ḅo ḅarị ḅụọ ḅẹ apụ ma pịrị ḅa
KỊNỊNYANAḄỌ ḅe kụrọ na ọ̀ kọrị tẹ opu akọrịnama na gbolomaye
pịkị ọ̀ mịẹ tẹ ḅụụ-buama-aị ma na.
5Ori oloko sụa-sụa Izirẹlịapụ ma pịrịm,
ọ̀ tọn-tọn Jekọbụ furo-ḅẹ-apụ ma pịrị-aị ma.
Ò ḍuko wamịna elemu aḍapụ ma pịrịm
mịnẹ ini ori oloko ma kẹ ịna awọmẹ toluma,
6mịẹ tẹ tọrọkọ ḅo ḅarị ḅụọ ḅẹ apụ ma arị ḍawọ ḅẹ ḅara
tẹ ini pịkị kẹ ịna awọmẹ toluma ḅa ịna sakị ḅụ.
7Mị-ḅara ḅụ ini sọ Tamụnọ kẹ ḅiokpọma ḅa,
tẹ ḅarị ọ̀ kọrị tẹ aị ma kẹ ḅioḅọrọma ḅịa,
kụma sakị mamgba ọ̀ tọn kuroma aị ma poki tẹ mị.
8Ini ịna elemu aḍapụ ma kịka ḅịa ḅara,
anie kọngọ kụrọma na ḅịḅịpoki-a na atomi ma,
gbala-gbala Tamụnọ kẹ ḅiokpọma kuroma-kuroma-a apụ ma,
tẹ ḅioḅẹngbọ-kẹ-sịrẹrẹ-niḅi ḅara kẹ koro-sime ọ̀ pịrị-a apụ ma.
9Iferemu warị ḅẹ apụ, iboli na ḍịn na kẹ owu sọ ḅẹ tẹ ḍọkị apụ ma
mangị-som ọmụ koro ene mẹ ḅụ.
10In Tamụnọ na ini na fị ọḅọkụ mẹ koko-a;
ịn ḍụkụ tẹ ọ̀ tọn kuroma aị ma poki tẹ mịẹ-a.
11Ọ̀ kọrị tẹ aị ma ịn kẹ ḅioḅọrọmam,
ọ̀ mịẹ tẹ ịn tọrụngbọ kẹ ẹrị ḅụụ-buama-aị ma.
12 #
Pks 7.8—12.32
Ịna elemu aḍapụ ma ḍikiarị ogbo,
Tamụnọ ḅụụ-buama-aị mịẹm
Zohanị ḅẹ ele ḅio ḅụ, Ijiputi sịẹ mẹ ḅẹ kiri ḅụ.
13 #
Pks 14.21,22 Ọ̀ tọrụ mẹ kẹ maa anga puu tẹ ini ọkị mẹnjị-tolum anị ogboku;
ọ̀ mịẹ tẹ minji ma sịẹ tẹ onu kịkam.
14 #
Pks 13.21,22 Eneḅaka ḅụ ori oḅuto kẹ ịna tọrọkọ-sụnm
tẹ bebe ḍin mẹ kọrị fịnị.
15Ịkpa mẹ ḅio ori ịkụ ma puu finji
tẹ pokolo ayọ ḅụ paka-ḅo minji kẹ ịn pịrị ḅuum.
16 #
Pks 17.1-7; Kịẹ 20.2-13 Ọ̀ mịẹ tẹ ịkụ mẹ ḅụ ogilolo puu-paka ḅọrọ
tẹ minji nwẹnị tọrụkuḅu ḅẹ minji kịka tẹ mẹnjị.
17Kụma ịn paa si kẹ Tamụnọ mịẹ tọrọkọ, tọrọkọ mum,
tẹ ịkpa mẹ ḅio ḅụ kọngọ-kụrọma Gele Tẹịnḅọ ḅe pịrịm.
18 #
Pks 16.2-15; Kịẹ 11.4-23,31-35 Ịn tọrụ-gelegele Tamụnọ daaḍikim
ịn fị ḅẹ ḅii fịye kẹ ịn pịrị-pịrị ịgbanị ḅụ.
19Ịn nwẹnị Tamụnọ na tụḅụrụ ḅara kẹ ẹkwẹn ọ̀ pịrị tẹ ḅẹ,
“Ịkpa mẹ ḅio Tamụnọ inetẹ fịye kẹ kịnị pịrị fị ḅa aro?
20Ò ye kẹ ịkụ mẹ gbolom mẹ karakaraye,
tẹ minji sara paka-ḅo owiarị tọrụ sọm;
kụma ori inetẹ pịkị fịturu kẹ wa pịrị fị tẹ
pịkị nama kẹ ori atomi pịrị pẹị ḅẹ?”
21Anie ḅụ KỊNỊNYANAḄỌ ḅe ịganịm ori ịn ḍuko ye naa sakị;
ọ̀ nwẹnị fịnị kẹ owu kẹ ori atomi paka,
tẹ ori ịganị ịna ḅụ owim,
22ini ọ̀ ḅụụ minini nyana-a ẹrẹsị
in minini-a mịnẹ ori ịn ḅọrọma ḅẹm.
23Kụma ori ẹkwẹn ọgọnọ-jụ So-tọrụ mẹ pịrị
tẹ tọn anị ḅẹ aḅọkọ ma pịrịm arị finjii;
24 #
Jọn 6.31
So-ḅio mie ori mgbọlị afịaị kẹ sara ịn pịrịye,
mana kẹ fịrịma kuroma ịn pịrị fị ḅụ.
25Mie ḅụ ini enjẹlị apụ fịye fịm,
tẹ Tamụnọ in ḅii aị mamgba kẹ ịn pịrịm.
26Ọ̀ pịkị mịẹ tẹ ịrụa sakị paka-ḅoarị anga mẹ ḅụ fẹrụ fiem,
tẹ ọ̀ kụrọ ḅụ ọ̀ pịkị abajị fẹrụ fiemam;
27tẹ ò feni kẹ ori atomi fịrịma tẹ ini ideri-ḅom,
ịna kịẹn-ḅịḅị nimi ḅọ, tuḅu ọgọnọ ḅẹ onwimgbọlị ma kịẹn-ḅịḅị nimi tẹ;
28akpụrụ-awarị ma ikelema-koro wararị
ogboku mẹ ḅụ arị afeni ma koro ḅom.
29Anie ḅụ tomi ma fị furo ḅinmam;
Tamụnọ in ḅii ye kẹ ịn pịrịm.
30Kụma ịna pọkọ sịkịrị la ḅara ḅụ ịn ta-a
tẹ ịn paa fị simem.
31Anị sakị mẹ ḅụ Tamụnọ in ḍiki-ịganị
tẹ ịna ḅụ kụrọ tẹịn atomi ma ḅaam,
Izirẹlị ḅụ iḅitẹịn asawọ ma.
32Mie mamgba ḅụ sọ tomi ma paa si mịẹ, mịẹ-mịẹm;
ọ̀ mịẹ tẹ ḅụụ-buama-aị ma ḅụ sọ ịn paa ḅioḅẹngbọ kẹ ọ̀ ḅụụ gbana-a.
33Ọkọẹrẹsị ori ịna ene ma kpụlụmam
gbọrụ ḅịḅị kẹ sara pakama ọwụ ọkụ,
tẹ ịna aḍumo kẹ ḅiotọn-a opu fa ḅụ suum.
34Ori ịna ḅụ ḅẹ ja apụ ḅaa sakị, ḅaa sakị,
kirikọn-apụ pịkị ọ̀ dama-ḅo;
in si ḅụ pịkị tẹ tẹmẹ-la ḅara kẹ ọ̀ tẹkẹm.
35In nwẹnị kẹ ḅiokoroma mịnẹ Tamụnọ mie in gbaịn, gbaịn ḅọ;
mịnẹ Kụrọ mamgba Nyanaḅọ ḅo ḅe ḅarasụa ịn pịrị, pịrịm.
36Kụma ịna ẹkwẹn ma iruo aị famam;
ini ḍuko tẹ ịna tẹmẹ-la ye ofori.
37 #
Fịr 8.21
Ịn sịḅị-tuu ọ̀ pịrị, pịrị-a;
ini ori na fị ọḅọkụ mẹ ḅụ in ḅioḅẹngbọ
kẹ ḅụụ ḅụ gbana na-iḅi ḅara sime-a.
38Kụma Tamụnọ ori atomi ma ḍiki-tọrụ-kụrụkụrụm.
Ori ịna si-wẹrịso ịn pịrị
tẹ ịn ḅaa guluguluma-a.
Tọnwa asakị ọ̀ nwẹn kẹ ori ịganị da ọ̀ ḅụụ pịrị
tẹ ori owi ịganị mẹ ḅụ ọ̀ ḅụụ ọlọm.
39Ọ̀ kẹ ḅiokoromam mịnẹ ini ma fịị, fịị oju sụa papaa atomi,
fiema ḅọrọ-soarị fẹrụ sime ọkụ.
40Ịkpa mẹ ḅio ịn kẹ kọngọ kụrọma ọ̀ pịrị asakị, kịẹnkịẹn-ọkụ-ofori ḅara;
tọnwa asakị ịn nwẹn kẹ ò kururumam!
41Sakị-sakị ḅụ ịn Tamụnọ daaḍiki
tẹ Izirẹlị tẹkẹarị Fịafịa Tamụnọ ḅe ḅioḅẹngbọ fụkamam.
42Ini ori opu kụrọ mẹ kẹ ḅioḅọrọmam,
pịkị ori ini na fịya-a apụ ḅara-ḅio ịn ḅọrọma ene mẹ sọ,
43tẹ ọ̀ nwẹnị opu akọrịnama ma na ḅụụ-buama-aị ma na mị
Zohanị ele mẹ ḅio, Ijiputi sịẹ mẹ ḅio.
44 #
Pks 7.17-21
Ọ̀ mịẹ tẹ tọrụ ma ọmbie ḍim,
tẹ Ijiputi-ḅẹ-apụ ma ḅarị ḅuu, ḅuu minji nyana-a.
45 #
Pks 8.20-24;
Pks 8.1-6
Ọ̀ tọnwa ḅara kẹ ọmọmọ kẹ ịna ama ḅio suu tẹ arị ịna ḅụụ-fụkamam,
na ngụ amẹẹ na, tẹ arị ịna amakiri mẹ gulugulumam.
46 #
Pks 10.12-15
Ori igurube amẹẹ kẹ fịrịma tẹ arị in ḍiḅi
tẹ ịwọma so-pakarị afịaị ma fị siinm, pịkị ịna ye ḍiḅi akiri ma gulugulumam.
47 #
Pks 9.22-25
Ori mgbọlị kụrọ mgbọlị ḅara kẹ koroarị eene kẹ ịna asịn ma ḅaam,
tẹ oḅoku ḅụra tẹ igirigi kẹ ịna ịla asịn ma ḅaam.
48Ori mgbọlị-mgbọlị ḅara kẹ koroarị eene kẹ ịna opu anama ma ḅaam,
tẹ ịna anama ogbo-ogbo ma sọ so-alagba ịn tẹịn ḅaam.
49Ọ̀ kpọma opu ḅụụ-fụka kẹ ịn pịrịm
ori ori opu ịganị ọsụma ịna
ọgọnọ sara ye ḅụ,
anị nwẹnị fịị dogi-ḅo.
50Ori ịganị mẹ ọ̀ dasịẹma-a
anịanịa ịna aḍumo mẹ wẹrị,
kụma si-obi mie ọ̀ kẹ ịn ḅaa ye.
51 #
Pks 12.29
Ijiputi ḅẹ awarị mamgba ḅụ
ori mgbe ma ḅaam.
52 #
Pks 13.17-22
Anịtẹso ọ̀ tọrọkọ-sụn ori atomi ma pịrị tẹ ịn kẹ pakam, anana-ḍikiḍikiḅọ ọkụ,
tẹ nwẹnị ịn datụkụma ịkpa mẹ ḅụ mẹnjị-toluḅọrọ.
53 #
Pks 14.26-28
Ye ịn la-a ḅara mie ọ̀ kẹ tọrọkọ-sụn
tẹ ịn ḅalafa-a ye;
kụma tọrụ mẹ mbelembele ḅo si kẹ ịn tọn apụ ma gbaịnm.
54 #
Pks 15.17; Jọs 3.14-17 Ori ịn kẹ ḅo ọ̀ fịafịa amakiri mẹ lam,
ḅo ori ḅarana owu-ḅara-iḅi ḅụ nyana ọkị tụndụ ma lam.
55 #
Jọs 11.16-23
Ori atomi ma ḅo kpekiarị sakị, ori anị yọ anga apụ ma dee-dee pakamarị;
ori ịna kiri mẹ ḍie Izirẹlị afuro ma pịrị
tẹ ịna anga ayọ ma kẹ ori atomi pịrịm.
56 #
Ḅẹr 2.11-15
Kụma ịn kọngọ kụrọma Kụrọ mamgba Nyana Tamụnọ ḅe pịrị
tẹ ọ̀ daaḍikim.
Ọ̀ tọn kuroma aị ma in poki tẹ mịẹ-a,
57kụma ini ịna aḍapụ ma kịka tẹ kọngọ kụrọma tẹ sịḅị-tuu ọ̀ pịrị-a,
kpịkịma-kpịkịmatẹ ḍiein tẹ tẹịnḅọ ḅiotọn anga da-mu mu-a ye ọkụ.
58Oru tẹkẹ-ayọ tẹ ịn nama ḅụụ pịrị-aị ma ori ịganịmam,
ini oru-afụḅara tẹmẹ ye mẹ pịkị kpọma ori ịganị owimam.
59Tamụnọ ịganịm ori anị ẹrị sakị,
ọkọẹrẹsị ori ori atomi ma sịkị simam.
60 #
Jọs 18.1; Jer 7.12-14; 26.6 Ọ̀ Silo ḅẹ Tamụnọ-warị mẹ sịkịm,
anie ọ̀ kẹ ò sime-yọ mịẹ sime anga mẹ wamịna ogboku ḅụ.
61 #
1 Sam 4.4-22
Ò minini si kẹ wa tọn apụ ma pịrị tẹ
ini Ọḅọkụ fị Igbe mẹ pụkọ-ọkịm,
anie ọ̀ kụrọ na ori ebube na elekima mẹ.
62Ori ịganị nyana ọ̀ ḅara-kuḅu ḅẹ atomi ma pịrị
tẹ ịn wẹrịso si kẹ ịn tọn apụ ma pịrị tẹ ini ịn ḅaam.
63Asawọ amẹẹ ma ọmụ ḅio fịịm,
tẹ iriawọ amẹẹ ma ḅarị in sime ḅẹ gbọrụḅọ-sọ nyana-a.
64Agbamịẹapụ ma gbiri-gbiri-gbiri ḅio fịịm,
tẹ ịn ḍụkụ tẹ ịna ereme ma in ḍuu-a.
65Kunoma ḅụ KỊNỊNYANAḄỌ ḅe saakịm gbala ò mono sime ye ọkụ;
ori iru tọrụ-ḅaa tẹ owiarị kụrọ ḅọ kịkam.
66Ò si kẹ ọ̀ tọn apụ ma dee pịkịm
ene la ḅẹ ḅụụ-jịrịma owu-ḅara-sii ḅụ.
67Kụma ò Josẹfụ furo-ḅẹ-apụ ma sịkịm;
Iferemu furo mẹ sọ ọ̀ sẹlẹ ọkị-a.
68Anie nakara ò Juda furo mẹ sẹlẹ ọkịm
na Zayọnị Tụndụ mẹ na, anie ọ̀ kpọma ḅẹlẹmarị anga mẹ.
69Anịanga mie ori ọ̀ Warị nama
tẹ kẹ ò So-ḅio ḅẹ sime-yọ mẹ kịkama ye;
ori anị mịẹ kụrọma kiri mẹ
ḅioju kịkamam, sakị mamgba anị kụrọ sịẹ sime wararị.
70 #
1 Sam 16.11,12; 2 Sam 7.8; 1 Pkị 17.7 Ọ̀ nwẹnị ọ̀ fịrịmẹnjịḅọ Devidi sẹlẹ ọkị;
anana ḍikiḍiki anga ḅụ ori ọ̀ saakị ọkịm,
71ò sime tẹ ori anana ogbo-ogbo ma ḍikiḍikiarị ogbo,
tẹ ọ̀ kẹ Izirẹlị ḍaḅọ mịẹm,
Tamụnọ atomi ma ḍikiḍikiḅọ, gbala anana ogbo ọkụ.
72Devidi nwẹnị fọịn ḅụụ pịrị-a iḅi ḅara kẹ in ḍikiḍiki
tẹ nimi kẹ tọrọkọ-sụn ịn pịrị.
(C) The Bible Society of Nigeria