Mayịka 6
6
KỊNỊNYANAḄỌ Nyana Izirẹlị Ḅẹ Apụ Pịrị Ḅẹrẹ
1Mayịka nwẹnị Izirẹlịapụ ma ḅẹẹ,
“Ọ́ KỊNỊNYANAḄỌ ḅe nyana ọ́ pịrị ḅẹrẹ mẹ pokii!”
“Saakịị, Yei KỊNỊNYANAḄỌ,
tẹ ị́ nyana Izirẹlị pịrị ḅẹrẹ mẹ ḍukoo;
tụndụ ma tọrọkọ anị ḍukoo,
tẹ yee tụndụ ma sọ ị́ pọkọ naa.”
2Ọmịnị tụndụ, ọmịnị tomikiri mẹ ḅẹ sime gbamaso sukutarị-aḍụḅarị,
ọ́ KỊNỊNYANAḄỌ ḅe ḅẹrẹ mẹ pokii!
KỊNỊNYANAḄỌ ḅe ḅẹrẹ nyana ori atomi pịrị wararị,
ori ọ̀ kẹ Izirẹlị ọgọnọ gbana ye mẹ ḍuko ḅẹ tẹẹ.
3KỊNỊNYANAḄỌ ḅe mẹẹ,
“yei ị̀ atomi, à tiye kẹ ọ́ mịẹ?
À tọ-ḅara kẹ ḅụụ-palịmaye sọ ọ́ pịrị?
Ọmịnị ị̀ pakịrịị!
4 #
Pks 12.50,51;
Pks 4.10-16;
Pks 15.20
Kẹ gotẹ ọkọ ḅẹẹarị,
Arị Ijiputi ama ḅio ọ́ pakama-ḅom,
tẹ ọmịnị omoni-sọ anga mẹ ḅụ ọ́ pakịrị ọkịm;
etela kẹ ó ḍie gotẹ à Mozizi na, Erọnị na,
Mirihamụ na kẹ ọ́ fịrịmam.
5 #
Kịẹ 22.2—24.25;
Jọs 3.1—4.19
Yei, ị̀ atomi, Mohabụ ḅẹ amadaḅọ Balakị ọ́ mịẹ ḅẹ tọn ye,
tẹ Bẹyọ owiḅọtụḅọ Balamụ ḅe kẹ ọ̀ pakịrị ye
ó gbeke kẹ ḅiokoroma?
Sitimu ḅụ ọkị mu Giligalị la ḅụ
Akasiya ḅẹ Akpụrụ-warị ḅụ paka ye mẹ
ó gbeke kẹ ḅiokoroma?
Ọ́ mịna aị ma kẹ ḅiokoroma,
tẹ ọ́ ḅọrọma gotẹ à kọrị aị ma lekirii.”
KỊNỊNYANAḄỌ Ḅe Izirẹlị Ḅẹ Apụ Ḅara Ḅii Ye
6Ḅụụ-ḅalaḅala ḅụ Izirẹlị ḅẹ jen-apụ nwẹnị
sịḅị-sịḅị ḅụ ḅẹẹ,
“À tiye kẹ KỊNỊNYANAḄỌ, So-ḅio ḅẹ Tamụnọ ḅe tọrọkọ ḅo ḅẹ,
à ḅo sunsin ọ̀ pịrị ḅẹ sakị?
À gbọrụ kụra sịḅị ḅụ ḅọrọtẹ asambịrịma anambulo
kẹ dọkịma-agba mịẹ ḅẹ mụnọọ?”
7“Àrị ejimina maa ẹndẹ oyia asi finji kẹ agba mịẹ,
anịanịa pulo aposini arụ-arụ kẹ agba mịẹ tẹ
anị KỊNỊNYANAḄỌ ḅe ḅụụ ḅẹlẹ ḅẹ?
Anịanịa à ḅọrọ ị̀ tarị tụḅọ kẹ à kan oloko ma gotẹ agba mịẹ,
anịanịa arị iyi tụḅọ kẹ ị̀ ḅara ḅẹ asi ma
gotẹ agba mịẹ ḅẹ mụnọọ?”
8Mayịka nwẹnị ịn ḅẹ mịnẹ ọkọ-a,
yei Izirẹlịapụ, KỊNỊNYANAḄỌ ḅe kọkọ
wa mịẹ ḅẹ iḅiye mẹ kẹ wa ḍie,
tẹ ọ̀ wamịna ḅara ḅii ye ḍuko wa pịrị tẹ;
arị aị ma anie: karakara ḅẹrẹkọn na,
iḅi-yemịẹ-ḅara na ḅẹlẹma na nyana jụmọ-jụmọ pịrị
pịkị ḅụụ iderima ḅara kẹ wamịna Tamụnọ ḅe
na gbọrụ ḅụụ sime.
9KỊNỊNYANAḄỌ ḅe nwẹnị ẹkwẹn opu ama mẹ pịrị tẹ ḅẹẹ,
“Ị̀ ẹrẹ mẹ ḍiki ḅalafa mẹ anie gburo-gburotẹ opu nimi;
Anịẹrẹsị ọ́ naa, yei ọmịnị furo tẹ opu ama mẹ ḅio kobiriarị apụ!
10À tọ-ḅara kẹ si-mịẹapụ ma awarị ọ́ furu nyana ngọ ma na,
la-a ye-tọn-aị tẹ à ḍiki-ḅioḅu aị ma kẹ tọn aị ma na kẹ ḅioḅọrọma ḅẹ?
11À tọ-ḅara kẹ la-a ye-tọn-aị kẹ ye tọn-tọn tẹ,
oḅori kẹ amịna pembema tomi sịn-arị ye-tọn-aị
nyana-a apụ ma wẹrịso tẹ in so ḅẹ?
12Ọmịna ngọ-kọn apụ ma ḅụụ igoin-apụ inoma ḅakam,
anịsakị ọmịna ama mẹ ḅẹ apụ mamgba iruo apụ famam
tẹ ịna ḅịḅị-ḅio oḅori-kẹ-kịnịsịn ḅẹlẹ nyana wararị.”
Izirẹlị Ḅẹ Apụ Fomu-Ḅara
13Anịẹrẹsị à saakị ọ́ fomu tẹẹ;
mịẹtẹ ọmịna asi ma ẹrẹsị ọ́ fatẹ yọ sọ.
14Ó fịye fị ḅa, kụma ọmịna afuro ḅin ḅịa,
ḅuru paa ọmịna oju ḅio ḅụ ọ́ tarị ḅa;
ó ye saakị-saakị pakama ḅa,
kụma ọmịnị inetẹ ḍọkị-ḍọkị koko ḅịa;
anịsakị ó koko ḅẹ aị ma,
ọmụ ḅụ àrị arị sima fama ḅa.
15Ọ́ fịaị ḍiḅi ḅa, kụma ó soku ḅịa;
ọmịna olivu pulo mịẹ pakama-ḅo ḅa,
kụma ọmịnị anị ọkị tẹ kẹ gberie-sọ mịẹ ḅịa;
ọmịnị iru mịẹ pakama-ḅo ḅa,
kụma gbala-gbala ọmịnị anị ḅuu ḅịa.
16 #
1 Ama 16.23-28;
1 Ama 16.29-34; 21.25,26 Miemẹ mịẹ ḅa, kẹ gotẹ ọkọ ḅẹẹarị,
Ama-da Omuri kan wararị oloko ma na,
ori owiḅọtụḅọ Ama-da Ehabụ warị mẹ ḅẹ si amịẹaị
mie ó koko tẹ mịẹarị,
tẹ ịna atoluma-aị ma ḍiki-mẹnjị tẹ;
ọkọẹrẹsị arị ọ́ kẹ fatẹ yọ sọma ḅa,
tẹ ḅẹḅọ-ḅẹḅọ ó ḍiki-sima ḅa.
Ḅẹẹ-anga ḅẹẹ-anga ḅụ tomi-kụlọkụlọ ma ḅarị ọ́ kẹ ye sịn ḅịa.
(C) The Bible Society of Nigeria