Ḅẹrẹkọn-apụ 2
2
KỊNỊNYANAḄỌ Ḅe Enjẹlị Ḅe Bokimu Ḅụ
1Mịọkụ KỊNỊNYANAḄỌ ḅe enjẹlị Giligalị ḅụ so Bokimu mum. Ọ̀ nwẹnị ḅẹẹ, “Yẹrị Ijiputi ḅụ ọmịnị ọkị-ḅo ama mẹ tẹ á kẹ ọmịna aḍapụ pịrị ḅẹ karị ama mẹ ḅio suu tẹ. À ḅẹẹm, à gbala-gbala arị ọmịnị na fị wararị ị̀ ọḅọkụ mẹ kan ḅịa, 2#Pks 34.12,13; Dit 7.2-5anịsakị ọ́ ḅarị mị ama mẹ ḅẹ apụ ma na ọḅọkụ fị ḅịa. Ọmịnị ịna ebeka ma kan sara ḅa. Kụma à tọn ọ́ pịrị ye mẹ ó poki-a. Ọ́ nwẹn mịẹ ye mẹ ó tiye mịẹ? 3Anieḅụ mịọkụ à ḅẹẹm, à ḅarị ọmịna tọrọkọ ịn dee ḅịa; kụma ịn ḅo ọmịnị na fịya-a apụ sọ ḅa, anịsakị ịna oru-atamụnọ ma ḍiein sọ ọ́ pịrị ḅa.” 4KỊNỊNYANAḄỌ ḅe enjẹlị mịna ẹkwẹn-aḅịḅị ma kọn Izirẹlịapụ mamgba pịrị tẹso, tomi ma nwẹnị ịna apọkọ saakị tẹ tẹmẹ-la ḅara kẹ owu. 5Ịn nwẹnị Bokimu kẹ ẹrẹ kẹ anịjụ mẹ koro; tẹ ini anịjụ agba mịẹ KỊNỊNYANAḄỌ ḅe pịrịm.
Jọsụwa Fịị Na Ò Ḍiḅi Na
6Jọsụwa tomi ma ḅẹẹ tẹ in so tẹso, Izirẹlịapụ ma ọrụḅọ-ọrụḅọ mu mḅọ sime anga ọkị nyana ḅẹ mum. 7Anịsakị Jọsụwa ene mamgba ḅụ na, omongiapụ ma tẹ kpọọ Jọsụwa nẹngị apụ ma tẹ gburo-gburotẹ kọrịnama mẹmgba tẹ KỊNỊNYANAḄỌ ḅe kọrị Izirẹlị pịrị tẹ ye mẹ ẹrị apụ ma ene mamgba ḅụ tomi ma fịrịmẹnjị KỊNỊNYANAḄỌ ḅe pịrịm. 8Tẹ Jọsụwa, Nọnị owiḅọtụḅọ, KỊNỊNYANAḄỌ ḅe fịrịmẹnjịḅọ ḅe nwẹnị kụra sọnọa si oyi finji ọ̀ sịḅị ḅọrọ tẹso, ḅụ fịị. 9#Jọs 19.49,50Ịn nwẹnị Iferemu tụndụ ọgọnọ ḅẹ opu sịẹ mẹ ḅio, Gahasi Tụndụ mẹ ọgọnọ-jụ ò sime anga mẹ ḅio. Timinatị Heresị ḅio ḅụ ò ḍiḅi. 10Anị bebe ḅụọ mẹmgba sọ nwẹnị kobiri so ịna aḍapụ ma ḍọkụma-mu, inima tẹ KỊNỊNYANAḄỌ ḅe nimi-a, anịanịa, kọrịnama mẹ tẹ, ọ̀ kọrị Izirẹlị pịrị tẹ ye mẹ nimi-a jen ḅụọ nwẹnị ịn ḅọrọ tẹso, saakị.
Izirẹlị Sunsin KỊNỊNYANAḄỌ Ḅe Pịrị Dasịẹmam
11Izirẹlịapụ ma KỊNỊNYANAḄỌ ḅe ḍiki-tọrụ ḅụ siye mịẹm tẹ fịrịmẹnjị Balị ma pịrịm. 12Ịn KỊNỊNYANAḄỌ ḅe, ịna aḍapụ ma Tamụnọ ḅe tẹ Ijiputi ḅẹ ama mẹ ḅio ịn pakama-ḅo ḅọ ḅe sịkịm; ịn tomi ma tẹ ini ikelema-koro wararị apụ ma oru-atamụnọ ma ogbo-ḅio ḅụ oru-atamụnọ ḍukamẹnjịm, tẹ sịḅị-tuu ịn pịrịm, tẹ ịn nwẹnị KỊNỊNYANAḄỌ ḅe ịganị sịn saakị. 13Ịn KỊNỊNYANAḄỌ ḅe sịkịm, tẹ fịrịmẹnjị Balị ma na, Asịtarọtị ma na pịrịm. 14Anieḅụ KỊNỊNYANAḄỌ ḅe ịganị kẹngẹma Izirẹlị ọgọnọ saram tẹ ori ịn kẹ inima tẹ kụrọ ḅara kẹ ngọ fọịn-arị apụ ma ḅara-ḅio suu, tẹ ini ịn fọịnm; ọ̀ pịkị ịn kẹ ini na fịya-a tẹ ini ikelema-koro wararị apụ ma kụrọ ḅio dẹrịmam, anie mịẹtẹ ini inetẹ ḅarị ini na fịya-a apụ ma kuḅu sịẹ-a. 15Ịn mẹnjị paka sakị, paka sakị KỊNỊNYANAḄỌ ḅe ḅara mẹ siye kẹ ịn da-pakam, ọ̀ wẹrịtẹ ịna ḅeri nụnụ tẹ ḅara na, KỊNỊNYANAḄỌ ḅe kẹ ye karị ịn pịrị tẹ ḅara na ḅụ, tẹ ịn ḅo opu ḅụụ-ḅalaḅala ḅụ sọm.
KỊNỊNYANAḄỌ Ḅe Ḅẹrẹkọn-apụ Saakị Pakama-ḅom
16Anịtẹso KỊNỊNYANAḄỌ ḅe nwẹnị ḅẹrẹkọn-apụ saakị pakama-ḅo, inima tẹ kụrọ ḅara kẹ ngọ fọịn-arị apụ ma kụrọ mẹ ḅụ ịn ḅọrọma pakama-ḅo apụ ma. 17Anịsọ ini ịna ḅẹrẹkọn-apụ ma poki-a, gbala ịn sịḅị-tuu-tuu oru-atamụnọ ma pịrị sẹfị mẹnjị mẹ kọn-arị ẹrẹsị; ala-a sakị ḅụ ini etela mẹ tẹ ịna aḍapụ ma tẹ KỊNỊNYANAḄỌ ḅe tọn aị ma poki apụ ma mẹnjị tẹ ye mẹ ḅụ pịkị jen anga dam, tẹ ḅarị ọkọ mịẹ-a. 18KỊNỊNYANAḄỌ ḅe ḅẹrẹkọn-apụ saakị pakama-ḅo ịn pịrị sakị, pịrị sakị, KỊNỊNYANAḄỌ ḅe ḅẹrẹkọnḅọ ḅe na emii, tẹ ori inina fịya-a apụ ma ḅara mẹ ḅụ ịn ḅọrọmam ḅẹrẹkọnḅọ ḅe ene mamgba ḅụ, gbala inima tẹ ḅụụ-fụka kẹ ịn pịrị, tẹ ịn ponomarị apụ ma gotẹ ịn kọn-arị ịna iningi mẹ KỊNỊNYANAḄỌ ḅe mịẹ tẹ ọ̀ sịḅị-kụrụkụrụarị ẹrẹsị. 19Kụma ḅẹrẹkọnḅọ ḅe fịị sakị fịị sakị, ini ọḅụ pịkị mu sii ịna aḍapụ mịẹ ḅara nẹngị ḅara mịẹm, oru-atamụnọ ḍukamẹnjị na fịrịmẹnjị ịn pịrị, tẹ sịḅị-tuu-tu ịn pịrị ḅụ; ịna amịẹaị tẹ ịn mịẹ-mịẹ aị ma ḅụ, anịanịa ịna etela ma tẹ kịnị na kura-a aị ma ḅụ gberie-sọ ịn wẹrịso-a. 20Anieḅụ KỊNỊNYANAḄỌ ḅe ịganị kẹngẹma Izirẹlị ọgọnọ saram, tẹ ọ̀ nwẹnị ḅẹẹ, “Mịna atomi ma arị ịna aḍapụ na fị ọḅọkụ tẹ tọn ịn piri aị ma kan tẹ, tẹ ḅarị ị̀ pọkọ poki-a ẹrẹsị, 21mịọkụ saakị tọrọkọ mu, Jọsụwa fịị sakị ḅụ ò dee kọnma wararị opu asịẹ ma ḅụ à ḅarị ịna tọrọkọ gberie-sọ dee pakama ḅịa, 22mịẹtẹ ịna aḅụụ ḅụ àrị Izirẹlị daaḍiki ḅẹ ḅara ịn ḅụụ ẹbị tẹ ịna aḍapụ ma wẹrịtẹ mịẹ ḅara ḅụ KỊNỊNYANAḄỌ ḅe etela mẹ ḅụ mẹnjị, anịanịa mẹnjị ḅịa ḅoto.” 23Anieḅụ KỊNỊNYANAḄỌ ḅe arị opu asịẹ ma wẹrịsom tẹ anị gbọrụ sakị ḅụ ịn dee pakama-a, ọ̀ pịkị ịn kẹ Jọsụwa kụrọ mẹ ḅio suu-a.
(C) The Bible Society of Nigeria