Jemụsị 1
1
1 #
Mat 13.55; Mak 6.3; Fịr 15.13; Gal 1.19 Jemusị, Tamụnọ na KỊNỊNYANAḄỌ Jizọsị Kịrayịsị na fịrịmẹnjịḅọ ḅe ḅara ḅo ḍiri mẹ:
Ḅii-ḅịḅị sime Tamụnọ atomi ma tẹ bebe tomikiri mẹ ḅụ gala-gala wararị apụ mamgba pịrịị.
Minini Na Nimi Na
2Ị̀ amịnapụ, ọmịnị ọmịna aḅụụ kẹ iḅi fụḅara nyana apụ ọkịị, daaḍiki ḅara, ḅara ḅo, ḅo ọ́ laarị ḅẹḅẹ, 3kẹ gotẹ ọkọ ḍukoarị, ó nimi ḅara ḅụ, ọmịna minini daaḍiki da-tolu-ḅọrọ tẹ ḅẹḅẹ, anị dogi-ḅo ḅarịye anie, ịnyọ nyana tẹ akụye inema alama. 4Ọmịnị ẹrị mịnẹ ọmịna ye-inema ó dogi tọrọkọ mu lamam, ọḅụ da-a ḅara ḅụ, mịẹtẹ ó bebe tẹ kara-gbasị tẹ ḅara sime ḅẹ ḅara, gberie-sọ ọmịna ḅara kọn-a ḅara. 5Kụma ọmịna ḅụ nimi nyana-a ḅọ emi-emii, mḅọ Tamụnọ tẹkẹẹ, ori anị kẹ mḅọ pịrị ḅa; kẹ gotẹ ọkọ ḍukoarị, Tamụnọ anie tọn-a ḅara na ḍiki-ḅụụjịrị nyana ḅara na kẹ ye kẹ kịnị mamgba pịrịarị ye. 6Kụma ị́ tẹkẹarị sakị, minini kụrọma, tẹ ḅio maaịn, maaịn tọnma gbala-gbala. Ḅio maaịn, maaịn tọn-arị ḅọ mẹ kịkarị ye anie abajị ḅio ḅẹ ọnụngọ, tẹ fẹrụ ḅakụ iwo-na-ideri-naarị ye. 7Ọkọ sime tomḅọ mẹ mḅọ kuroma ma mịnẹ mḅọ KỊNỊNYANAḄỌ ḅe ḅara nyana ḅẹ ye emi; 8mḅọ anie maa ḅioḅẹngbọ sụa wararị tomḅọ, inetẹ gbọrụ kiri sịẹ-a ḅọ.
Igoin Na Ngọ Na
9Kịrayịsị ḍukamẹnjịḅọ tẹ igoin kiri ḅụ Tamụnọ saakị-gelema ḅọ mẹ, mḅọ ḅioḅẹlẹẹ, 10#Ayị 40.6,7anịsakị ngọ-kọn wararị Kịrayịsị ḍukamẹnjịḅọ mẹ Tamụnọ mḅọ sin iderima sakị mḅọ ḅioḅẹlẹẹ. Kẹ gotẹ ọkọ ḍukoarị, ngọ-kọn ḅọ mẹ piri-ḅio-ḅẹ fịlawa kpatụ fa ḅara mie mḅọ ḅọrọ-so ḅarịye. 11Ịrụa paka tẹ anị ḅẹ ọfịrị mẹmgba kẹ ḅịya sịn mẹ sarama tẹ anị dọkịmarị; anịtẹso anị ḅẹ fịlawa mẹ siin-koro tẹ anị ḅẹ iḅi mẹ gulugulumam. Anị gbọrụ ḅara mẹ mie ngọ-kọnḅọ mẹ gulugulu ḅarị ḅara, mḅọ amịna tuḅo kọn ma ḅọrọarị ogbo.
Sọkịrị-ḍiki Na Daaḍiki Na
12Ḅioḅẹlẹ sime anị ḅọ mẹ pịrịị, anie ịn sọkịrị ḍiki fama tẹ paa amịna minini ḅụ sịẹ-kụrọ wararị ḅọ mẹ, kẹ gotẹ ọkọ ḍukoarị, ọkọ sime sọkịrị mẹ ḅụ tolu-ḅọrọ tẹ ḅọ mẹ mḅọ Tamụnọ minini ọ̀ ḅẹlẹma apụ ma pịrị gbẹẹ-ye mẹ nyana ḅa. 13Ini ọkọ sime asọkịrị kẹ tomḅọ daaḍikiarị ḅẹḅẹ, mḅọ ḅẹẹ ma, “Mị daaḍiki mẹ Tamụnọ ḅara ḅoarị.” Kẹ gotẹ ọkọ ḍukoarị, gbọrụ siye sọ inetẹ Tamụnọ daaḍiki ḅịa, anịsakị ọ̀ pịkị siye kẹ gbọrụḅọ-sọ daaḍiki ḍiki-a. 14Kụma tomḅọ mịẹ ḅẹ-ḅiiarị siye ḅẹ kuroma mie mḅọ fọnọ mu daaḍiki ḍiein ḅio koromarị ye. 15Siye kẹ ḅioḅẹngbọ sụa wẹrị mẹ kịkarị ye fura; anị iyiarị ye si; tẹ si mẹ ḍụḅa paka-ḅo tẹ ḅẹḅẹ, anị nwẹnị fị iyiarị.
16Ị̀ iḅi amịnapụ, ọ́ ḍụkụ tẹ gberie-sọ oḅori kẹ ọ́ sịn ma. 17Iḅi ye pịrị ḅara goyegoye na, iḅi ḍiepịrịye goyegoye na So-ḅio ḅoarị; Tamụnọ, So-ḅio ḅẹ abele ma Tẹmẹḅọ, tẹ ḍima ḍima-a ḅọ ḅe, anịanịa vuunma pịkị tẹ kanakana pakama-a ḅọ ḅe, ḅara ḅụ mie anị sime tẹ koro-ḅoarị. 18Ọ̀ ḅụụ-ḅẹlẹ ḅara ḅụ ori ḅarana wa kẹ ḅo ḍumo wararị atomi mịẹm, ọ̀ karakara ẹkwẹn mẹ ḅụ, mịẹtẹ ọ̀ tẹmẹ aị mamgba ḅụ wamịnị tarị kiri ọkị ḅẹ ḅara.
Naa Na Mịẹ Na
19Ị̀ iḅi amịnapụ, ó miemẹ kẹ ḅiokoromaa! Ọrụḅọ-ọrụḅọ sarasarama ye naa, kụma mḅọ fọnya ẹkwẹn ma, pịkị fọnya ịganịma. 20Tomḅọ ịganị kẹ Tamụnọ ye tọn ḅara ḅẹ karakara mịẹ mịẹ-a. 21Ọkọẹrẹsị, ọ́ sịḅị-ngụngụnma amịẹaị kẹ mịẹ-mịẹye sọma na, si-sịḅịḅio ḍumo na wẹrị ḅelema ọmịna aḅụụ. Ọ́ sịḅị-tuu Tamụnọ pịrị, tẹ ori ọmịna aḅioḅẹngbọ ḅụ ḍiḅiarị ẹkwẹn mẹ daa-ọkị, anị inetẹ ọ́ ḅọrọma ḅa.
22Ọmịnị oḅori kẹ ọmịna aḅụụ sịn tẹ ẹkwẹn mẹ poki ngẹrị mịẹ ma; ọ́ pịkị anị kẹ mịẹye ḅụ suu. 23Papaa ẹkwẹn mẹ poki tẹ anị kẹ mịẹye ḅụ suu-a ḅọ mẹ kịkarị ḅọ anie tẹmẹ-ḍikiye ḅio amịna ḅụụ ḍikiarịḅọ. 24Mḅọ iḅiọkụ amịna ḅụụ ḍikiarị, tẹ mḅọ sikima gbọrụ sakị mḅọ mḅọ sime-ḅara kẹ ḅioḅọrọma tẹ. 25Kụma ḅẹḅọ-ḅẹḅọ tẹ kweinma omoni ḅara-ḅio kịnị pakama-ḅoarị kara-gbasịtẹ oloko mẹ ḅio ḍiki tẹ, sakị mamgba anị kẹ ḅiokoromarị, tẹ poki ngẹrị poki tẹ kẹ ḅioḅọrọmaa ḅọ, kụma anị kẹ mịẹye ḅụ suuarị ḅọ, anị tomḅọ mẹ anie Tamụnọ boma ḅarị ḅọ, mḅọ mịẹarị ye ḅụ.
26Tụḅọ emi tẹ ḅẹẹarị mḅọ Tamụnọ nimi wararị? Mḅọ amịna ḅẹlẹ ọlọ-a ḅẹḅẹ, mḅọ Tamụnọ nimi mẹ ye ḅụ ofori, tẹ mḅọ pịkị oḅori kẹ amịna ḅụụ sịn-arị. 27Tamụnọ Ḍaḅọ ḅe kẹ kpaịn tẹ, karakara Tamụnọ nimi sịn-arị ye anie mie: ḍapụ na iyingi apụ na fịtẹ awọmẹ na, diapụ-fịtẹ-ereme na, ḍikiḍiki ịna tọrụsiẹrị ḅụ, tẹ pịkị mị tomikiri mẹ ḅụ fịafịa ḅara kẹ ḅụụ wẹrị.
(C) The Bible Society of Nigeria