Ayịzaya 50
50
1KỊNỊNYANAḄỌ ḅe mẹẹ,
Í kuromarị à diḅọ na siya tẹ ẹrẹḅọ
ḅara kẹ ị̀ atomi ḅẹẹ tẹ in so?
Nwẹnị ọkọ kụma ndẹẹ ḅọrọ siya aḍiri ma?
Ó kuromarị arị ọ́ kẹ dẹrị tẹ ini tomḅọ
amịna awọmẹ kẹ omoni ḅara dẹrị ḅara?
Ẹn-ẹn, ọmịna asi mie ó gotẹ kun ḅio sọ yee;
ọmịna asi mịẹ-aị ẹrẹsị ini ọ́ kẹ ala-jụ fịrịmam.
2Tiye ẹrẹsị ị̀ atomi ị̀ na gbọrụ-ḅịḅị-fiea so
àrị in ḅọrọma ḅẹ mu sakị?
Tiye ẹrẹsị ini ị̀ ḅịḅị ọkị-a arị in sịn sakị?
Àrị à kẹ in ḅọrọma ḅẹ ịnyọ nyana-a mụnọọ?
Àrị inetẹ tọn tẹ abajị mẹ samụnọ ḅa,
tẹ tọrụ ma pịkị-ḅo ịkpa sọma ḅa,
mie tẹ arị ḅio ḅẹ inji ma minji ofori mẹ kẹ fịị ḅa.
3Àrị inetẹ mịẹ tẹ So-tọrụ mẹ kanakana ḅa,
gbala kịnị fịị apụ ḍuuarị ye ọkụ.
KỊNỊNYANAḄỌ ḅe Fịrịmẹnjịḅọ ḅịḅịpoki mẹ
4Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe kẹ ì toluma tẹ
à ḍuko ḅẹ ye mịẹ tẹ arị ịnyọ ḅụụ ḅụ fa tẹ ḅọ mẹ mịẹ kụrọma ḅẹ ḅara.
Dede goyegoye ori ị̀ mịẹ tẹ à ḅio-sẹsẹarị,
ọ̀ kẹ ì toluma ḅẹ ye na ḅẹ ḅara gotẹ.
5KỊNỊNYANAḄỌ ḅe yefieye naa kẹ ị̀ pịrị tẹẹ,
amụ à pịkị kọngọ kụrọma-a anịanịa ọ̀ ḅụụ pịkị-so.
6 #
Mat 26.67; Mak 14.65 Arị ì oḅukulo finji tẹ kẹ ì fomu apụ ma pịrịm.
Àrị in kiki-a ini ị̀ mịẹ-simarị sakị,
ini ì ḅekeke ḅẹ mpọrị pịọnị sin-sin tẹ
fịla kẹ ị̀ tọrụ isiarị sakị sọ.
7Kụma ịna mịẹ-sima ma ị̀ ịnọ-a
Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe
ḅarasụa kẹ ị̀ pịrịarị ẹrẹsị.
Arị ị̀ ḅụụ mịẹ kụrọma tẹ arị inemam.
À nimim ị̀ tọrụ-tuu ḅịa,
8 #
Rom 8.33,34 KỊNỊNYANAḄỌ ḅe ị̀ na kpeki wararị gotẹ,
ọ̀ pịkị mịẹtẹ à mịẹ ye ofori mẹ giregire ḅa.
Tọrụ pakama tẹ ḅẹrẹ ḍuko ị̀ ọgọnọ gbana ḅẹ ḅọ emi?
Yee wa gbọrụ ḅụọ kẹ ḅẹrẹkọn-siri mu!
Yee mḅọ kẹ ị̀ sịḅị sẹịn ḅẹ ye mẹ ọkị-ḅo!
9Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe ḅarana ị̀ ḍụarị,
ọkọ kụma ndẹẹ inetẹ ḅẹrẹ ị̀ ḅara siinm ḅẹ ye
ḍuko pakama ḅẹ ḅọ?
Ḅẹrẹ kẹ ị̀ sịḅị sẹịn-arị apụ mamgba kịnị ḅarị ini ẹrị ḅịa.
Ini ịmaịn-faa ḅa akarakaraḅa pẹị sin tẹ ḅịtẹ ọkụ.
10Ọmịnị-mgba tẹ KỊNỊNYANAḄỌ ḅe kụn-arị apụ
tẹ ọ̀ fịrịmẹnjịḅọ ḅe ẹkwẹn ma poki tẹ mịẹarị apụ,
Ọ́ mẹnjịarị etela mẹ kanakana ḅo anị gbaịn ḅarị-o,
kụma ọ́ KỊNỊNYANAḄỌ ḅe kẹ ḅiokpọmaa
ọmịnị ọmịna Tamụnọ ḅụ sịrẹrẹẹ!
11Ọmịnị-mgba tẹ jen-apụ ḅaa guluguluma ḅẹ ḅiyarị apụ,
ó ḅiya ḅo aị ma ọ́ ḅaa guluguluma ḅa.
KỊNỊNYANAḄỌ ḅe ḅioju mịẹ tẹ miemẹ paka ḅa;
ó sime ọ́ pịrị sịḅị-jịrịma tọrụsiẹrị ẹrị ḅa.
(C) The Bible Society of Nigeria