Ayịzaya 42
42
KỊNỊNYANAḄỌ Ḅe Fịrịmẹnjịḅọ
1 #
Mat 3.17; 17.5; Mak 1.11; Luk 3.22; 9.35 #
Mat 12.18-21
KỊNỊNYANAḄỌ ḅe mẹẹ: Ị̀ fịrịmẹnjịḅọ mịanga emi, anie à mịẹ kụrọmarị ḅọ ḅe
À sẹlẹ ọkị gbọrụḅọ ḅe, mịẹ ị̀ ḅụụ-ḅẹlẹma ḅọ ḅe,
Àrị ị̀ tẹmẹ kẹ ọ̀ ḅụụ ḅio suu ḅinma tẹ,
Ọ̀ karakara ḅẹrẹkọn ọkị-ḅo sịẹ-sịẹ ma pịrị ḅa.
2Ori oloku ḅịa, anịanịa ọ̀ pọkọ saakị
anịanịa etela ma ḅụ oloku-oloku ẹkwẹn.
3Penge wararị okporo mẹ ori anyịma ḅịa
anịanịa gbọrsịḅị kọrị-kọrị biin-arị tọnjọ mẹ biinma.
Ori inoma ofori ḅara kẹ anga tọrọkọ-tọrọkọ mu
alama ọkị-ḅo tomi mamgba pịrị ḅa.
4Ò ḅiokpọmaye anịanịa ḅiokpọ fama ḅịa;
Ọ̀ mịẹ tẹ tomikiri mẹ ḅụ ọrụḅọ-ọrụḅọ
mḅọ la kiri nyana wẹrị ḅa.
Sụma-yọ simearị amakiri ma ḅẹ apụ
ḅio-sẹsẹ ḅara kẹ ò tolumaye koruarị.
5 #
Fịr 17.24,25 Tamụnọ So-tọrụ mẹ tẹmẹ tẹ anị kẹ anị
finji mu la anga lamam;
Ori tomikiri mẹ na anị ọgọnọ angarị aị mamgba na mịẹm;
Ori ḍumo na ọwụ-sara na kẹ ori atomi pịrịm.
Tẹ mịọkụ KỊNỊNYANA-TAMỤNỌ ḅe ọ̀ fịrịmẹnjịḅọ ḅẹẹarị,
6 #
Ayị 49.6; Luk 2.32; Fịr 13.47; 26.23 Yẹrị, anie KỊNỊNYANAḄỌ ḅee; àrị ị́ sịn tẹ kụrọ kẹ ị́ pịrị tẹẹ.
Ẹrị mịnẹ tomikiri ini ọrụḅọ-ọrụḅọ la kiri kẹ mḅọ pịrịm.
Ị́ ḅụụ à ḅọrọtẹ kịnị mamgba na ọḅọkụ fị ḅa;
ị́ ḅụụ à ḅọrọ tẹ bele ọkị-ḅo sịẹ-sịẹ ma pịrị ḅa.
7Ị́ tọrụngbọ-pụụntẹ-apụ ma tọrụngbọ finji ḅa,
pịkị kanakana ikoli awarị ḅio lẹgị wararị apụ ma pakama-ḅo ḅa.
8“Yẹrị kịngẹ anie KỊNỊNYANAḄỌ ị́ Tamụnọ ḅe.
Jen tamụnọ ị̀ na ì ebube nyana ḅịa;
À ḍụkụ tẹ oru-afụḅara ì tokini nyana ḅịa.
9À ḍuko wẹrị aị ma ḅo paka tẹ mịọkụ.
Mịọkụ arị ịwọ aị ḍuko ị́ pịrị ḅa
amụ arị paka ḅẹ sakị la-a ogbo.”
Tokini Nume
10Ịwọ nume-su KỊNỊNYANAḄỌ ḅe pịrịị;
bebe tomikiri mẹ su ò tokinii!
Ò tokinii, ọmịnị tọrụ dọkụarịapụ; ò tokinii, tẹmẹ-aị mamgba tọrụ ḅio ḅụ
Ó suu, sụma-yọ ḅẹ ama ma na arị anga ḅụ
angarị apụ mamgba na!
11Yee ịkpa mẹ na arịḅẹ ama ma na Tamụnọ tokini;
yee Keda ḅẹ apụ ò tokini!
Yee Sẹla ḅẹ opu ama mẹ ḅio angarị apụ
ma ḍereku ḅụ oloku tụndụ ma ọgọnọ-jụ ḅụ!
12Yee sụma-jụ ḅẹ ama ma ḅụ angarị apụ ma
tokini na ebube na kẹ KỊNỊNYANAḄỌ ḅe pịrị!
13KỊNỊNYANAḄỌ ḅe ọmụḅọ kịka tẹ paka owu-sọ ḅẹ muarị;
Ọ̀ tẹlẹma tẹ ḅio-sẹsẹ ọmụgbin pịrị wararị;
Ori ọmụ oloku kọn-arị, owu koro tẹ anị ḍụrụkụ-ḍụrụkụ ḅara;
Ori ọ̀ kụrọ ḍie-pakamarị si kẹ ọ̀ tọn apụ ma ọgọnọ.
Tamụnọ Ḅarasụa Ori Atomi Pịrị Minini Tẹẹ
14Tamụnọ mẹẹ:
Kpọma alatẹ sakị à nwẹn kẹ gbọsime tẹẹ;
àrị ị̀ atomi ḅịḅị ọkị-a.
Kụma à ye mịẹ ḅẹ sakị ḅo tẹẹ;
àrị iyi la tẹ ẹrẹḅọ kịka tẹ oloku pakamarị.
15À tụndụ ma na gele-akiri ma na guluguluma
tẹ osuka ma na sịn ma na samụnọma ḅa.
À tọrụ akaka ḅẹ lẹsẹrẹtẹ akiri ma kẹ ịkpa sọma
tẹ ḍaḅa ma minji samụnọma ḅa.
16“À tọrọkọ tarị tẹ ị̀ atọrụngbọ-pụụntẹ-apụ
kẹ jene-jene amụ ịn ḅọrọ ye mu-a etela ḅụ ḅọrọ ḅa.
Arị ịna kanakana kẹ bele sọma
tẹ gbima-gbima amakiri mẹ mịẹ miniminima ḅa ịna tọrọkọ.
Ma ma mie à minini aị ma,
tẹ gbarị-a ḅara ḅụ arị arị mịẹ ḅa.
17Inimgba tẹ oru-afụḅara kẹ ḅiokpọmarị apụ,
mḅudu ma kẹ amịna atamụnọ sịn-arị apụ,
iderima tẹ tọrụ-tuu ḅa.”
Izirẹlị Ye-ḍawọ Ḍụkụ-a
18KỊNỊNYANAḄỌ ḅe mẹẹ,
“Ọmịnị iningi apụ, ó pokii!
Ó ḍiki lamaa, ọmịnị tọrụngbọ-pụụntẹ-apụ!
19Tọrụngbọ-pụụn ị̀ fịrịmẹnjịḅọ nẹngị ḅọ emi,
ye-naa-a à kẹ oku fịrịmarị ḅọ ḅe nẹngị ḅọ?
20Izirẹlị, í ye ẹrị lama tẹẹ,
kụma anị tiye fie ị́ pịrị?
Í ḅeri nyana wararị kẹ ye-naa ḅẹm,
kụma karakaramatẹ ị́ naa ḅo ye tiye?”
21KỊNỊNYANAḄỌ ḅe anie amịna atomi ḅọrọma gotẹ
ḅio-sẹsẹarị Tamụnọọ,
mie ḅụ ori ori oloko ma na toluma aị ma na gelema
tẹ ḅii tẹ mịnẹ ori atomi arị kụn.
22Kụma mịọkụ kịnị ori atomi aị fọịn tẹ;
ini ịn kẹ tọrụsiẹrị yọ ḅụ ịkasị wẹrị
tẹ ikoli-awarị ḅio ịn kẹ ḅọị tẹ.
Ịn kụrọ-ḅara kẹ ịna aị pụkọ-ọkị tẹ ịna aị fọịnm,
gbọrụḅọ-sọ ḅo tẹ ịn pakama-ḅo-a ḅara ḅụ.
23Ọmịna aḅụụ miemẹ poki ḅẹ ḅọ emi?
Mịọkụ sakị tọrọkọ mu, ọ́ bala ḅara kẹ poki ḅẹ?
24Tụḅọ Izirẹlị koroma-so ama kẹ fọịn apụ pịrị?
KỊNỊNYANAḄỌ ḅe ḅioju, in si kẹ mịẹ ḅọ ḅe!
Wa ḍụkụ tẹ ò ḅiim wa ḍumo
kọn ḅẹ ḅara kẹ ḍumo kọn-a
anịanịa ọ̀ kẹ wa pịrị tolumaye mẹ poki tẹ mị.
25Mie ḅụ ori ịganị ḅẹ kụrọ wamịna ḅụ ịnọm
tẹ wa ọmụ kụrọ-ḅara ḅẹ tọrụsiẹrị ẹrịm.
Ori ịganị fịnị kịka tẹ kọrị Izirẹlị ikelemam,
kụma gbala-gbala paka sime ye tiye-o tiye-o wa nimi-a;
anị ḅụ wa ḍawọ ḅo gberie-sọ ofori.
(C) The Bible Society of Nigeria