Luk̆a Amaxtimu
Amaxtimu
1. Ağani Mendvala
Ağani Mendvalaşi iptineri otxo kitabis “K̆ai Ambaepe”-ya uʒ̆omenan. Hantepeşi ariti Luk̆a ren. K̆ai Ambaepes, Xrist̆e na gyoz̆in ar momşletinu komoxtu-ya ç̆arun do hemuşi skidala mip̆aramitaman. Xrist̆e na moxtasert̆u oşi do oşi ʒ̆ana ʒ̆oxle, Mcveşi Mendvalasti ç̆arut̆u. Ham k̆oçi Yeso ren. Luk̆ak K̆ai Ambai muşis Yeso Xrist̆eşi skidala mç̆ipeşa memognapaman. Ham kitabi, Yesoşk̆ule ma-60-ani ʒ̆anapes iç̆arinu do k̆ai-xeşa eşaşinaxeri ndğa çkunişakis komoxtu.
P̆a Yeso Xrist̆eşi mteli skidala var iç̆aren. Hamuşeni Luk̆ak bazi ambaepe goşaʒxunu. Na goşaʒxunu ambaepe hantepe renan:
- Yesok, ti muşi ‘momşletinu Xrist̆e’ na ren oxomoʒ̆onapaman.
- Yesok na domogures ham moşletinu, k̆rimapeşen oxoşkvinu do Ğormoti k̆ala ozadu ren.
- Yesok Ğormotişi mapobaşeni dido mutxanepe domogures.
- Yesok hem oranepes xalk̆ik na var nik̆ardu k̆oçepes geʒ̆onu do k̆ai oğodu.
- Yesok, Ğormotik k̆oçepes nak̆o dido oroms, heati dimeselu.
2. Muşeni Lazuri Nenaşa Goboktit?
Ğormotis unon ki mteli k̆oçepe ma miçinan do hentepes na uisanu gza diguran. Hamuşeni Nena muşi mixarsuves. Nena mteli k̆oçepeşeni ren do Ğormotik hamute nosi çkunis xvala var, guri çkunisti nup̆aramitams. Hamuşeni, Ğormotişi Nena çkva do çkva nena do dialekt̆işa Goktalus uk̆orems.
3. Lazuri Nenaşa Goktalus na Mebaonit Gza
Ham kitabi, ipti Okorturas na skidunan Xrist̆iani Lazepeşeni do uk̆ule Lazuri nena na ip̆aramitaman mtel mak̆itxalepeşeni goboktit.
Kitabi Lazurişa goboktamt̆itşk̆ule na bixmarit terminolojişeni Ağani Mendvalaşi nena na ren Elenuris uci mepçit. Kitabis na ç̆arun coxope, oceraşi terimepeşeni andğaneri Lazuris na meşaşinaxun mcveşi Xrist̆ianuri nenape bixmarit. Xrist̆ianobas do Muslimanobas artikartis na nugaman terimepek, çkva do çkva mutxanepe na oxoʒ̆onapamanti gobişinat. E do Turkuli do Muslimanuri terimepe dido va bixmarit. Yesoşi (İsa) coxoti heşo ren. Hemus Margalepek do Xrist̆iani Lazepek ‘Yeso’ na uʒ̆omenanşeni çkuti heşo p̆ç̆arit.
Ham kitabi iris k̆ai-xeşa na oxaʒ̆onasen Arkaburi dialekt̆işa goboktit. Mara, Lazuri nenaşi majurani dialekt̆epeşenti nenape do gramat̆ik̆uri formepeti bixmarit. Ora do oras ağani nenape do ağani terimepeti molobişinit do bazi orasti iris na uçkin nenapes ağani oxoʒ̆onu mebumskvanit. Hantepe kitabişi k̆ap̆ulas, nenapunas kek̆ebunʒxvit.
K̆ai gurite ik̆itxit!
Kitabi Mukaddesişi Şirketi
Seçili Olanlar:
Luk̆a Amaxtimu: LZZ
Vurgu
Paylaş
Kopyala
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
Laz Luke © Bible Society in Turkey (Kitabı Mukaddes Şirketi) 2020