Tizaret 49
49
Tifér ti ehreynén tin Yaƹqub
1Yeɣr-d Yaƹqub meddans, yenna hasn : « Aset-d temdam, éd hawen enneɣ awa hawen yelkamen dɣ ezzeman.
2Idawet-d, seǧdet ahi dg Yaƹqub,
seǧdet i abba nwn Israyil.
3Ruben key, ǎmahwarin,
key wa ekreheɣ émér-d ǎmoseɣ ǎmali,
key a yoǧeren dɣ serho,
key a yoǧeren dɣ terna.
4Tameskaled hund anǧi yohalen,
ǎbas éd tumased wa yezzaren,
édét tehreyed tik dɣ édeg ennét,
édét tessǎxremed tafteqin.
5Šimƹun d Léwi, aɲɲaten,
tikobawén nsn, tiẓolyawén ekmanén.
6Ufuren nsn, wr hi teǧǧehen dɣ iman,
wr eréɣ éd eǧǧeheɣ iǧiten nsn,
dɣ ikennasen nsn, eŋɣen médden.
Aqquderen aked éswan dɣ ǎddelen.
7Tilɣant fol ǎweššen nsn édét yekkus,
tilɣant fol iǧiten nsn édét ǎṣṣohén !
Éd tn oẓaneɣ dɣ ǎkal n Yaƹqub,
éd tn zemmezzeyeɣ dɣ ǎkal n Israyil.
8Yehuda, ayet-mak éd hak eǧin tamulé.
Éd ternud ihenǧa ennek,
dg tik éd enhin datk.
9Yehuda, ǎbaraḍin,
tǎmosed hund aher meḍriyen,
wa inaqqen a yermes,
ḍeffer adih éd yeqqel édeg ennét.
hund aher, yeǧen,
hund tahert, mit éd isenkerin ?
10Aṭṭebel n temenukela,
éd yeqqayem ɣor kél Yehuda,
Wr éd yemmukkes ǧér éḍaren ennét,
ar ahel wa-d éd yas Šilo,
was éd elkemnet ellametén.
11Yoǧey eyhéḍ ennét dɣ tǎzzebibt,
yoǧey ǎmaynu ennét dɣ aẓel yehoseyen,
isarad aselso ennét s elboẓa,
d ǎbernuh ennét s ahni n ǎzzebib.
12Téṭṭawén ernanet elboẓa tekkewelt,
isénen ernan ax temellé.
13Zabulon éd yezzeɣ édés n ǧeréw,
awad tizekkuten elbaboren.
Yegla ǎkal ennét ar émi n aɣrem wan Sidon.
14Issakar eyhéḍ yeṣṣohén,
inassen ǧér ǎgiggiten ennét.
15Yeney as édeg yǎhosey,
ǎkal yǎẓéd,
ǎẓuk yezneh as ǎrori,
adih yexdem hund akli.
16Dan éd yeḥkem fol ellamet ennét,
hund iyyet dɣ tawsitén n Israyil.
17Dan hund taššelt dɣ ǎbǎreqqa,
tǎxxut dɣ tarrayt :
ta teddadet azreh n ayes
ad yoḍu éré wadt yoɣaren.
18Amaɣlol, eǧéɣ eṭṭema dɣ eféssi ennek !
19Jad, édt ehjemen imǎkǎren,
éd tn yeqqel, éd tn yeḍren.
20Asser éd yekreh tagella tedanet.
Imekšan n ǎmǎnokal effalent-id.
21Neftali yǎmos hund ǎhenkeḍ dɣ tinariwén,
ihak eddunya iwhémen ǎhoseynén.
22Yusef hund ašek itarewen s ǎǧut,
ašek itarewen s ǎǧut iwaren téṭ n aman,
Éẓlan ennét okayen aked elxiyaḍen.
23Eḍlement, eǧerent, ekyeḍent,
wi ǎmosnén messawsn n tiɣayiwén.
24Beššan yekna oḍuf i tǎɣayé ennét,
fesusen ifassen ennét,
dɣ terna n Ǎmeqqered wan Yaƹqub,
Ǎmǎḍan, Étǎq n Israyil,
25s Messineɣ n tik, éd key yennej !
S Ǎneddabu, éd key yeburek s elbaraka n iǧennawen win afella,
d elbaraka n aman wi-d efelnén ammas n ǎmǎḍal,
d elbaraka fol éfef d tesa n tuntawén.
26Elbaraka ta key yekfa abba ennek,
tokey elbaraka ta eǧreweɣ ɣor abbatenin,
tewrét éɣef n Yusef,
yǎmosen amɣar n aɲɲaten ennét !
27Benyamin yola d-tǎhori tessukṣeḍet,
s tufat itat a-wa yermes
s éheḍ itoẓan awa yosa. »
28Emdan-ésn ǎmosen tawsitén tin merawet d senatet tin Israyil. Awén tifér ti hasn yenna tisn émér wa tn yeburek, ak iyyen dsn yekfé elbaraka ds togdat.
Tǎmettant tan Yaƹqub
29Ḍeffer awén yenna Yaƹqub i meddans : « As i eba, enbelet ahi ɣor abbatenin dɣ teɣaɣit ta thet ǎmǎḍal wan Efron, wan Ḥethit, 30dɣ Makfela, ɣor Mamré, dɣ ǎkal n Kenƹan. Ibrahim yezzenha ǎmǎḍal wéndɣ dɣ Efron baš éd yeqqel isensa. 31Déndɣ ad inbel, enta d hennis Sara, aked Isḥaq d hennis Rébéka. Déndɣ ad enbeleɣ Léya. 32Teɣaɣit d ǎmǎḍal enhan fol Ḥethiten ». 33As yesmenda Yaƹqub awa iganna i meddans, yensa, ezzar ebat, yéweḍ édeg ennét ɣor innét.
Seçili Olanlar:
Tizaret 49: thv
Vurgu
Kopyala
Karşılaştır
Paylaş
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
© Wycliffe Bible Translators, Inc. All rights reserved.