1 CORINTIOS 15
15
Jesucriśtuź jakatatta
1Xaśiki jilanaka, werhki anćhukakiś ni Yöś śuma taqunaka thaxinchinla xalla ni khuñśñil pekućha. Xalla tïćha ni anćhukaź iyawkhita Yöś śuma kintuki, xalla neqhśi anćhukki thurt'ichinćhupanćha. 2Niźaśa anćhukki ti Yöś śuma taquź khen liwrïsnakićha, ni weriź anćhukakiś maśintakama anćhuk ti tawqkiś thurt'ichipan khekiź nïki; ana nuź päkuśti anćhukki inapanqaś kirïchi khekićha.
3Xalla ni qallantikanaki werhki wethkiś thaxintanakaśaqaś anćhukakiś thaxinchinćha, xalla ni Khjirtaki tuź khićha, ni Criśtuki ućhumnaka ujkiśtan tikhśićha; 4Niźaśa ni Khjirti patxparuki khićha, ni Criśtuki thattaćha, neqhśtan chheph maxkhiśtan jakatatchićha; 5Niźaśa ni Jesusaki Cefaskiś thensićha, neqhśtan ni qhalu piśkchiś thaxintanakźkiś thensiśaqaśśa. 6Xalla neqhśtanaki ni Jesusaki taxśnukuwatha jila Yöś kirïchi jilanakźkiś thensićha, xalla ni cherchinakaki anśkama iyapanź źethćha, ans yaqhapanakaki tikhśićha. 7Neqhśtan Jesusaki Santiaguźkiś thensiśaqaśśa, niźaśa thappacha nïź apuśtulanakźkiś.
8Neqhśtan ni źeranśkinaki wethkiś thensiśaqaśśa, werhki tshi śullta mathta wawaźtaqaśtćha. 9Niźaśa werhki ni apuśtulanakźkiśtan ana añcha wakiśintćha, niźaśa werhki anal apuśtula khita khiś wakiśućha, niźaśa werhki ni Yöś kirïchi jilanaka tanśxapa qhurchinćha. 10Niźaśa ni Yöś wethkiś añcha śuma oqśñiź khen werhki źetućha; niźaśa nïź wethkiś oqźtaki anataćha inapanqaśki. Ans werhki ni apuśtulanakźkiśtan tshallan lanqśinćha; xalla ni lanqśnakaki anataćha weriź päta, ans Yöś pätataćha, niźaśa nïź oqśñi quśki werh yanapchićha. 11Niźaśa werhmi ninakami xalla ni cheqan wakiśiñi anćhukakiś thaxinchinćha, neqhśtan anćhukki ti kirïchinćhukćha.
Ućhumnakki śaqaś jakatatakićha
12Xalla ni ućhum thaxinśki jakatatchi Criśtuźkiśtanćha, ¿Anćhukakiśtan tshi qhaźultan qhaźtikiśtan ni tikhśinaka ana jakatatakićha khinćhuktaxo? 13Niźaśa anaź tikhśikiśtan jakatatś źelhtasaź nïki, Criśtuki anaź jakatattasaćha; 14Niźaśa ni Criśtuki ana jakatatchiźlax nïki, ni werhnakaź maśintaki anaź ćhhulxapami wakiśićha, niźaśa anćhuka thapa quśmi anaź ćhhulxapami wakiśasaćha. 15Xalla tinakaki nuźupanź khesaź nïki, werhnakki Yöśkiśtan toskara cherñil khitasaćha, niźaśa werhnakki Criśtu jakatatchićha khikan thurt'asaź nïki, Yöś moq'ul thurt'ućha, niźaśa cheqpacha anaź jakatattasaź nïki, ni tikhśinakaki anaź jakatattasaćha. 16Niźaśa ni tikhśinakaki ana jakatatñiźlax nïki, Criśtuki anaśaqaź jakatattasaćha; 17Niźaśa ni Criśtuki ana jakatatchiźlax nïki, ni anćhuka thapa quśki anaź ćhhulxapami wakiśićha: Neqhśtan anćhukki tirapanź anćhuka ujkiś qamćha. 18Xalla niźtikiśtan ni Criśtuźkin kirïźku tikhśi jilanakaki qatchiśaqaśśa. 19Niźaśa ućhumnakakiś Criśtuźkiśtan thonñi qamañaki ti yoqxapaqaśśa, niźaśa ućhumnakki thapatiźkiśtan ana śuma khitićhumćha.
20Niźaśa Criśtuki cheqpacha jakatatchićha. Xalla ni Criśtućha ni jilaqall poqchi ćhheri axźtaki: Niźaśa nïki ni jakatatśkiśtan tuki jakatatchićha. 21Niźaśa tshi źoñiź khen ti tikhski źelhćha, niźaśaqaś tshi źoñiź khen ti tikhśkiśtan jakatatśki thonćha. 22Niźaśa Adanź khen thappacha źoñinakaki tikhźa, xalla niźtaśaqaś Criśtuź khen thappacha źetchiśkama khekićha. 23Niźaśa śapamayni ninakźkiś wakiśiñi thäta khekićha: Niźaśa Criśtuź tukkinaki khekićha; neqhśtan Criśtuź kephźkitan nïźkiś apśñinakaki khekićha. 24Ni Criśtuź ti yoqa irpiñinaka kantan, niźaśa ni chawkh jilirinaka niźaśa aśinaka, niźaśa ninakaki ninakź irpiśnaka ni Yöś Ephźkiś thätan, xalla neqhśtan ni tukuśinski thonakićha. 25Xalla ni Criśtuki irpiśtantaćha thappacha nïźtan moq'uśñinaka nïź qhxoch qostuñ thekźta khiśkama; 26xalla ni źerañi ćhaxwqatñi tikhśki atipźtaź khekićha. 27Niźaśa Yöśki thappacha ćhhultaqinaka Criśtuź qharkiś uchchićha. Xalla ti chïkuśti anaź Yöś qharkiśpacha khissa, xalla nïpachaź thappacha ni ćhhultaqinakaki Criśtuź qharkiś thächiki. 28Xalla neqhśtan thappacha Criśtuź qharkiś khistanaki, niźaśa ni Criśtupachaćha ni Yöś Matiki, neqhśtan ni Criśtupachaź Yöśkiś tasnakićha, ni Yöśśa thappacha ni ćhhultaqinakaki ni Criśtuźkiś thächiki. Xalla nuź Yöś Ephźtaćha thapa ćhhultaqinakaki.
29Niźaśa yaqhap źoñinaka tikhśi źoñinakźkiśtan wawtisñinakaki, ¿ninakaki xaqnuźt khisnakixo? Ni tikhśinakaki ana jakatatñićha, ¿ćhhulkiśtanź ni tikhśinakźkiś wawtisnasaxo? 30¿Qhaźtikiśtan ućhumnakki orat orat anawalkiś thonxo? 31Jilanaka qhaźtikiśtan werhki śapuru tikhśkiś thxotsukataxo. Xalla tïki anćhukaź ni Jesucriśtu Tatźkiś kirïchiź khen werhki cheqpacha añcha kuntintutćha. 32Niźaśa werhki ni Éfeso wathkiś ni ñexw źoñinakźtan xañchipora qichasinćha, ¿xalla ni päkuśti ćhhulut werhki kanasaxo? Niźaśa ni tikhśinakaki cheqpacha anapanź jakatatasaćha, niźaśa yaqhapanakaki tuź khićha: “¡Anśiki khjusaź lulhźla niźaśa likhźla, neqhśtan ućhumnakki xaqa qatki tikhźnaćhani!”
33Niźaśa anćhukki anaź millk'untisqata. Xalla nïki chïtapanćha, tuź khikan: “Ni anaśum maśinakaki ni śuma usanakaź thatanźinćha.” 34Niźaśa anćhukki ni cheqpach juchjiptayśkinź qhutźka, niźaśa anćhukki anaź iya uj pä niźaśa anćhukakiśtan yaqhapanakaki anaź Yöś paxćha. Werhki anćhukakiś til chiyućha anćhuk aśaxu.
Xaqhnuźt ni tikhśi źoñinaka jakatatakiya
35Niźaśa yaqhapanakaki kunam pewkźnaćhani tuź khikan: “¿Xaqhnuź ni tikhśinaka jakatatakixo? ¿Ninakaki qhaźta xañchichśpan khekixo?” 36¡Xalla tïki sumsu pewkźtaćha! Tshi muju ćhhakhtaki tikhśtanćha, neqhśtan ni ew śqala jekźnaxu. 37Niźaśa ni ćhhakhta śqalaki anaź śqalapacha jekźnasaćha, tirikumeq khila uśh yaqha ćhherimeqaś khila, ans ni mujullaqaś kutsakićha. 38Xalla neqhśtan Yöś Ephki, ni śqala xaqhnuź pekćhaxa xalla nuź uchchićha, niźaśa śapa mujźkiś xaqhnuź nïź tshiti wakiśićhaxa xalla nuź thächićha. 39Niźaśa ni xañchinakaki anaź thappacha tshi iratakamaki; tshïki źoñź xañchićha, niźaśa tshïki uywanakź xañchićha, niźaśa tshïki weźlanakź xañchićha, niźaśa tshïśti ni ch'iśnakź xañchićha. 40Xalla niźta irataśaqaś źelhćha, tsekuñ źelhñi niźaśa ti yoqkiś źelhñi xañchimi; niźaśa tshïki ni tsekuñta k'achha xañchinakaćha, niźaśa tshïśti ti yoq k'achha xañchinakaćha. 41Niźaśa ni thuñ qhanaki ni jïś qhankiśtan tshemataćha, niźaśa ni warawar qhankiśtanami; niźaśa ni warawaranakami, tshi warawarź qhanaki yaqha warawar qhankiśtan tshemataćha.
42Xalla niźta irataśaqaśśa ni tikhśi jakatatśkiśtanaki. Xalla ni tikhśi thatta xañchiki ana wakiśiñiź moqhćha; xalla ni jakatatñi xañchiśti añcha k'achha thupiź khekićha. 43Niźaśa ni thatta xañchiki ana pekchukaćha; ans ni jakatatñi xañchiki añcha walićha. Xalla ni thatś xañchiki aś upaćha; ans ni jakatatñiki thupićha. 44Xalla ni thatś xañchiki xañchiqaśśa, xalla ni jakatatñi xañchiśti animuchiśśa. Niźaśa xañchiqat źelhćhax nïki, niźtaśaqaś animchiś xañchiki źelhćha.
45Xalla tuź khićha ni khjirtaki: “Xalla ni tuki thulźta Adán khita źoñiki, xalla nïki źetchiś khissićha”; niźaśa ni wirkin khiñi Adanki źeti thäñi animu khissićha. 46Niźaśa ni animuki anaćha tukkin, ans ni xañchićha tukkinaki; niźaśa ni animuki nïź xaruź khekićha. 47Niźaśa ni tuki päta źoñiki philkiśtan pätaćha, xalla nïki ti yoqxapataćha; ans ni wiruñ thonchi źoñiki tsewktan thonchićha. 48Xalla ti yoqkiś źelhñi xañchinakaki, ni philkiśtan päta źoñi irataćha; niźaśa ni tsewktan thonchi źoñiki ni tsewkta irataćha. 49Xalla nuź ućhumnakki ni philkiśtan päta źoñi iratićhumćha, xalla niźtaśaqaś ućhumnakki ni tsewktan thonchi źoñi irataśaqaś khekićha. 50Niźaśa jilanaka werhki anćhukakiśśaqaś chïś pekućha, ućhum xañchikamaki ni Yöś irpiś wathkinaki anaź luśhi atasaćha, niźaśa ni ujchiś źoñiki ni ana ujchiś źoñźkiś anaź luśhi atasaćha.
51Niźaśa werhki anćhuk ni Yöś xamaśit amtita śiśqatśl pekućha: Ućhumnakki anaź thappacha tikhźnakićha, ans ućhumnakki thappacha kephsikamaź khekićha 52niźaśa tshi źhuki ch'iphkhenallaqaś ućhumnakki kephsiź khekićha, niźaśa ni tukuśinskiś tothi thawźnan. Xalla ni oraki tothiź qhawakićha, niźaśa ni tikhśinakaki jakatatakicha, ana iya tikhśxapa. Xalla nuź khen ućhunnakmi kephsiź khekićha. 53Niźaśa ućhumnaka ujchiś xañchiki, ni ana ujchiś xañchi kuthźnakićha, niźaśa ni ućhumnaka tikhśñi xañchiki ana tikhśñi xañchiź kuthźnakićha. 54Niźaśa ućhum ujchiś xañchiki ni ana ujchiś xañchi kuthźtan, niźaśa ni ućhum tikhśñi xañchiki ni ana tikhśñi xañchi kuthźtan ni khjirtaki kumlisnakićha, ni khjirtaki tuź khićha: “Xalla ni tikhśki atipźtaćha. 55¿Tikhś xaqhsikin ni am atipśxo? ¿Niźaśa tikhś xaqhsikint ni am llakinakaxo?” 56Xalla ni tikhś llakinakaki ni ujnakaćha, niźaśa ni ujki lï xaruź aśśiś khisqatćha. 57¡Niźaśa ućhumnakki Yöśkin sparakiź khichukaćha, xalla nïki ućhumnakakiś ni Jesucriśtu Tataź khen atipś ućhunkiś thätaćha!
58Xalla niźtikiśtan weth q'ay jilanaka, anćhukki śuma thurt'ichipanź khella niźaśa anćhukki tirapanź ni Yöśta lanqźna; niźaśa anćhukki śiśsa ni Yöś Tatźtan chika lanqśki anaćha ina.
Seçili Olanlar:
1 CORINTIOS 15: CHIPBO
Vurgu
Paylaş
Karşılaştır
Kopyala
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
Nuevo Testamento Chipaya © Sociedad Bíblica Boliviana, 2004.