Psalmowo 52
52
Psalmo 52
David ƒe nufiameha na hɛnɔ la. Ekpa ha sia esi Edomtɔ, Doeg yi ɖagblɔ na Saul be, “David yi ɖe Ahimelek ƒe aƒe me.”
1Nu ka ta nètsɔ nu vɔ̃ɖi le adegbe ƒom, wò kalẽtɔ?
Nu ka wɔ nèle adegbe ƒom ŋkeke blibo la,
wò ame si nye ŋunyɔnu le Mawu ƒe ŋkume?
2Wò aɖe le gbegblẽ ɖom;
èle abe hɛ ɖaɖɛ ene, wò alakpatɔ.
3Èlɔ̃ vɔ̃ wu nyui,
èlɔ̃ alakpa wu nyateƒetoto. Sela
4O! Wò alakpaɖe,
èlɔ̃ nya gbegblẽwo sɔŋ ko!
5Vavã, Mawu hã aƒu wò anyi ɖe gbegblẽ mavɔ me.
Mawu ahe wò ado goe tso wò agbadɔ me,
aho wò kple ke tso agbagbeawo ƒe anyigba dzi. Sela
6Ame dzɔdzɔewo akpɔe, eye woavɔ̃;
woakoe ahagblɔ be,
7“Kpɔ ɖa, ŋutsu si metsɔ Mawu wɔ eƒe mɔ sesẽ o,
ke boŋ wòtsɔ eƒe dzi ɖo eƒe kesinɔnu gbogboawo ŋu,
eye wòkpɔ ŋusẽ hegblẽ ame bubuwo dome lae nye esi!”
8Ke nye la, mele abe amiti si le tsetsem le Mawu ƒe aƒe me la ene.
Meɖo dzi ɖe Mawu ƒe lɔlɔ̃ si meʋãna o
la ŋu tso mavɔ me yi ɖe mavɔ me.
9Makafu wò tegbee le nu si nèwɔ la ta;
matsɔ nye mɔkpɔkpɔ ade wò ŋkɔ me,
elabena wò ŋkɔ nyo.
Makafu wò le wò ame kɔkɔewo ŋkume.
Agbenya La™
Nutɔnyenye © 1988, 2006, 2020 Biblica, Inc.
Woaxɔ mɔɖeɖe na ezazã. Biblica kpɔ nutɔnyenye ƒe ŋusẽ ɖe dɔ sia dzi le se nu, le xexeame godoo.
Ewe Contemporary Scriptures™
Copyright © 1988, 2006, 2020 by Biblica, Inc.
Used with permission. All rights reserved worldwide.