Ro 12 Popüler Kutsal Kitap Ayetleri

Paylaş

Lalun che anq'intle' se'n nche anq'ina xjal toju' tq'ijlalil ja'lo; ape' kb'inchamjuye' kych'exb'eme' che ximane' tu'ntzun tchukjiju' tu'me'l kychwinqlale' ex tu'n telkynik'e' ti'ju' tajb'il Dyos, tz'elx knik'e' ti'ju' b'a'n, ti'ju' ntzalaj Dyos ti'j ex ti'ju' tz'aqlixi'x.

Nchin kub'sane' kyeye' witz'in ex ntzik tu'n txi' kq'o'ne' kxmilale' te Dyos iku' se'n jun oyaj itz', xjan ex b'a'n toj twitz Dyos. Atzunte k'u'lb'ilju' lu axxi'x tu'n txi' kq'o'ne' te Dyos qama kb'inchajuye' tajb'il Qman Dyos.

Che tzalajxe' tu'n q'uqli kk'u'je' ti'j Qajaw; tzik'xju' yajb'il kyu'ne'; ex lalun che qene' tu'n kna'n Dyose'.

Qu'mtzun lalun taja tu'n tkub' ti'ja tu'nju' taq'wixil. Ape' b'inchamjuya b'a'n tu'ntzun tkub'ti'ju' taq'wix tu'na.

Kk'u'jlam kyib'e' kxolilexe' qu'n kyitz'ina kyib'e' ex kyokslam kyib'e' ex kyonim kyib'e' kxolilexe'.

Kk'u'jlam kyib'e' axxi'x junjun tuk'i'l juntl. Kyik'imilju'ye' myab'a'n ex che lpekye' ti'ju' b'a'n.

Tz'okx tilil kyu'ne' tu'n kyanq'ine' toj nak'b'il kyuk'i'l kkyaqil xjal.

Lalun tz'ok kq'o'ne' t-xel myab'a'n te juntl ayeye' witz'in ex ntzik, kq'onkjkye' toj tq'ob' Dyos qu'n ate ati toklen tu'n tkub' tz'e'ysante kwitzju' xjal; qu'n iku' ntma'n toju' Tu'jil: Ayinwe' ati woklen tu'n ntz'e'ysante kwitz xjal; ex ayinwe' chin okyel q'onte tu'me'l t-xel kye.

Kq'onk tilile', lalun che k'ejb'iye' ex che ajb'ene' te Qajaw tu'n tkyaqil kk'u'je'.

Noq tu'nju' woklene' saj q'o'n tu'n t-xtalb'il Dyos, qu'mtzun kxe'l nma'n kyeye' kkyaqile' tu'n lalun kub' kximane' qa nimxi'x kyoklene'. Naq o'kx che ximanaye' ti'ju' kb'entil kyu'ne' se'nxju' oklenj matxi' tzaj q'o'n kyeye' tu'n Dyos tuk'ilju' okslab'l tzajni tq'o'n Dyos.

Qama tz'ok b'incha'n myab'a'n kyeye' lalun tz'ok kq'o'ne' t-xel ikxju'. Kq'onk tilile' tu'n kb'inchanteye' b'a'n kwitz kkyaqil xjal.

Che tenkuye' toj mujb'ab'ltib'il kxolilexe'. Lalun jaw knima'n kyib'e', kq'onk kyib'e' junx kyuk'ilju' xjal me'sqe'. Lalun nok kq'o'n kyib'e' qa tixi'x knab'le'.

Ex ikx: Qa in we'yajtiju' ajq'oj ti'ja, q'onxa twa; exqa nk'wajti, q'onxa tk'wa'; extzun qama tb'inchaya ikju' majx kb'el kyeqaxju' tajq'oja tu'n tch'ixaw.

Kqaninxe' k'i'wb'il te Dyos kyib'aju' ljo'n toj kq'ije' kyu'n. Kqaninxe' k'i'wb'il kyib'aj ex lalun che txkon ile' kyib'aj. Che tzalajxe' kyuk'ilju' nche tzalaj ex che oq'e' kyuk'ilju' nche oq'.

Che onine' kyi'ju' okslal ati nojqelan kye; ex che kk'mome' xjal nche pon xb'et-salkyeye'.

Qu'n iku' se'nju' qxmilal myanaq junx tten, b'a'npunju' tmuj iqa'ntib', ex mya kkyaqilju' tmuj iqankyib' junx kyajb'en. Ikxtzun qtenju', maskye txqan qb'aj naqjunx qxmilal tuk'i'l Jesukrist ex mujlqo'k junjun te juntl se'nju' qxmilal kyuk'ilju' tmuj iqa'ntib'.