Павелонь сёрмац Риму 1 Popüler Kutsal Kitap Ayetleri

Paylaş

Мон аф виздян Христость Пара кулядонза, вдь тя Шкаень вий, кона идекшнесыне сембе кемайхнень, васендакиге еврейхнень, сяльде – лия ломаньтналхненьге.

Вдь тя Куляса панжеви: Шкайсь минь лувсамазь видексшинь ломанькс кемаманкса и аньцек кемаманкса. Сёрматфксса азф: «Видексшинь ломанць кармай эряма кемамать вельде».

Менельхнень-масторхнень тиемаснон эзда сявомок, Шкайть аф няевикс ширенза – Сонь пефтома виец и Шкайксшиц – няфтьфт ломаттненди Сонь тифонц вельде. Сяс ня ломаттненди аф аралави прясна Шкайть инголе!

Хуш синь содазь Шкайть, но сяка ашезь шна Сонь и ашесть азонда сюконяма Тейнза кода Шкаенди. Меколанкт, синь мяльсна-арьсемасна тиевсть шавокс, а ёньфтома седиснон ашкодозе шобдась.

Шкаень видешить синь полафтозь кяльготнемать лангс. Синь сюконякшнихть и покодихть Шкаень тифти, а аф Сембонь Тии Шкайти, кона шнаф-бславаф пефтома пингс. Аминь.

Шкайть кяжень пандомац валги менельста эрь кодама пежень и зиянонь тиихнень лангс, конат эсь кальдявшисост кяшендьсазь ломаттнень эзда видешить.

Тянкса Шкайсь и максозень синь визькс мялень топафтомать кядялу. Авась ава мархта прашенды визькс тевс, мезсь моли эряфонь койть каршес. Тяфта алятневок, шарфтсть аватнень эзда и крьвязсть визькс мяльса фкя-фкянди. Алясь аля мархта тиенди визькс тефт, тянь мархта аноклайхть эстейст кяжень пандома, конань синць сатозь зияну тевснон инкса. Сяс мес синь ашель мяльсна содамс Шкайть, Шкайсь синь максозень синцень шоряф ёньцнонды тиендемс сянь, мезе тиендемс аф мярьгондеви.

Лемнемок эсь пряснон смузюкс, синь арасть шава прякс. Пефтома пингс эряй Шкайти сюконямать вастс синь сюконякшнихть аф афкуксонь шкайхненди, конат шаркстыхть кулы-наксады ломаненди, нармоненди, ниле пильгса жуватанди, куенди-ёзмолдыенди.