1 जोहन्‍ना 4 Popüler Kutsal Kitap Ayetleri

Paylaş

हाम्हां निं डरने ज़रुरत आथी किल्हैकि हाम्हैं डाहा परमेशरा संघै असली दी झ़ूरी, ज़ुंण परमेशरा संघै झ़ूरी डाहा तिन्‍नां निं तेऊ का डरने ज़रुरत आथी। किल्हैकि डरा करै हआ कष्ट अर ज़ुंण डरा सह निं झ़ूरी दी पाक्‍कअ हंदअ।

मेरै पैरै लान्हैंओ, तम्हैं आसा परमेशरे। तम्हैं आसा तिन्‍नां झ़ुठै गूरा का ज़िती गऐ दै। किल्हैकि ज़ुंण पबित्र आत्मां तम्हां दी बस्सा, सह आसा तेऊ राख्से शगती का बडअ ज़ुंण संसारै आसा।

हाम्हैं करा तै एकी-दुजै संघै झ़ूरी कि पैहलै किई परमेशरै हाम्हां संघै झ़ूरी।

मेरै पैरै भाईओ, हाम्हां लागा आप्पू मांझ़ै झ़ूरी करनी। किल्हैकि झ़ूरी आसा परमेशरा का अर ज़ुंण होरी लै झ़ूरी करा सह आसा परमेशरे लुआद, अर सह बछ़ैणा परमेशरा।

ज़ुंण होरी लै झ़ूरी नांईं करदअ, तेऊ का निं परमेशरो थोघ आथी, किल्हैकि परमेशर आसा झ़ूरी।

झ़ूरी निं एता दी आथी कि हाम्हैं किई परमेशरा संघै झ़ूरी, पर सह आसा एता दी कि परमेशरै किई हाम्हां लै झ़ूरी अर म्हारै पापे प्राश्ते तैणीं दैनअ आपणअ पूत एऊ संसारा लै।

मेरै पैरै भाईओ, ज़ै परमेशरै हाम्हां संघै एही झ़ूरी किई, तै लोल़ी हाम्हैं बी आप्पू मांझ़ै झ़ूरी किई।

ज़ुंण झ़ूरी परमेशर हाम्हां संघै करा, सह हुई इहअ करे प्रगट कि परमेशरै छ़ाडअ आपणअ कल्हअ पूत संसारै ताकि हाम्हां तेऊ करै सदा रहणैं आल़ी ज़िन्दगी भेटे।

ज़ै कुंण इहअ बोले कि हुंह करा परमेशरा संघै झ़ूरी अर आपणैं साथी-भाई संघै करे सह ज़ीद, तै आसा सह झ़ुठअ। किल्हैकि ज़ुंण आपणैं साथी-भाई संघै ज़ुंण तेऊ भाल़अ द आसा तेऊ संघै झ़ूरी नांईं करदअ, तै निं सह तेऊ परमेशरा संघै बी झ़ूरी करी सकदअ ज़ुंण तेऊ कधू भाल़अ बी निं आथी।

ज़ुंण बी इहअ मना कि ईशू आसा परमेशरो पूत, परमेशर रहा तेऊ दी बस्सी अर सह बस्सा परमेशरा दी।

प्रभू ईशू का आसा हाम्हां अह हुकम भेटअ द कि ज़ुंण बी परमेशरा संघै झ़ूरी डाहा, तेऊ लागा आपणैं साथी-भाई संघै बी झ़ूरी करनी।

मेरै पैरै भाईओ, हरेक मणछ ज़ुंण इहअ बोला, “मुंह दी बस्सा परमेशरे आत्मां” तेऊओ विश्वास निं करनअ। पर सोभी आत्मां लआ परखी कि तिंयां परमेशरा का आसा कि नांईं। किल्हैकि खास्सै कबाता पाणै आल़ै झ़ुठै गूर आसा संसारै ज़ुंण परमेशरे निं आथी। परमेशरे आत्मां सका तम्हैं इहअ करै समझ़ी कि ज़ुंण बी आत्मां इहअ मना कि मसीहा ईशू आसा मणछ देही धरी करै आअ द अर सह आसा परमेशरा का।

ज़ुंण आत्मां ईशू नांईं मंदी, सह निं परमेशरा का आथी। सह आसा मसीहो बरोध करनै आल़ेए आत्मां ज़सरै बारै तम्हैं शूणअ द आसा कि सह आसा एछणैं आल़अ अर एभै बी आसा सह एऊ ई संसारै।