Arabe tchadien (alphabet arabe) For more information about this text please contact: Alliance biblique du Tchad Avenue Pascal Yoadoumnadji, BP 1291 N'Djaména CHAD

La Bible en arabe tchadien © Alliance biblique du Tchad, 2019 ℗ 2022 Hosanna

الكتاب المقدس بالعربي الدارجي هنا تشاد

Arabic Chadian - 2012 Edition (NT) Drama

Arabic Chadian - 2012 - TCH NT Drama

يَا السَّيِّدْ ثَاوُفِيلُسْ، فِي الْكِتَابْ الْأَوَّلْ الْأَنَا كَتَبْتَهْ لَيْك، أَوْرَيْتَكْ بِكُلَّ شَيّءْ الْعِيسَى بَدَا يِسَوِّيهْ وَ بِكُلَّ شَيّءْ الْعَلَّمَهْ مِنْ بِدَايَةْ خِدِمْتَهْ لَحَدِّي الْيَوْم الْاللّٰهْ رَفَعَهْ فِي السَّمَاوَاتْ. وَ قُبَّالْ اللّٰهْ مَا يَرْفَعَهْ، عِيسَى حَجَّى لِلنَّاسْ الْعَزَلَاهُمْ لِيَبْقَوْا رُسُلْ وَ أَمَرَاهُمْ بِقُدْرَةْ الرُّوحْ الْقُدُّوسْ. بَعَدْ مَوْتَهْ، عِيسَى ثَبَّتْ لَيْهُمْ بِدَلَايِلْ كَتِيرِينْ كَدَرْ هُو حَيّ. وَ قَاعِدْ يِبِينْ لَيْهُمْ فِي مُدَّةْ أَرْبَعِينْ يَوْم وَ يِكَلِّمْ لَيْهُمْ بِمَمْلَكَةْ اللّٰهْ. وَ وَكِتْ هُو قَاعِدْ مَعَاهُمْ هُو قَالْ: «مَا تَمُرْقُوا مِنْ مَدِينَةْ الْقُدُسْ. أَرْجَوْا لَحَدِّي أَبُوكُو اللّٰهْ يَنْطِيكُو الْبَرَكَةْ الْهُو وَاعَدَاكُو بَيْهَا وَ أَنَا ذَاتِي أَوْرَيْتكُو بَيْهَا. يَحْيَى غَطَّسْ النَّاسْ فِي الْأَلْمِي وَ لَاكِنْ بَعَدْ أَيَّامْ بَسْ، اللّٰهْ يِغَطِّسْكُو بِالرُّوحْ الْقُدُّوسْ.»
وَ وَكِتْ الرُّسُلْ قَاعِدِينْ مَعَ عِيسَى، هُمَّنْ سَأَلَوْه وَ قَالَوْا: «يَا رَبِّنَا، دَا بَسْ الْوَكِتْ التِّدَوْر تِأَسِّسْ بَتَّانْ مَمْلَكَةْ إِسْرَائِيلْ وَلَّا؟»
وَ عِيسَى رَدَّ لَيْهُمْ وَ قَالْ: «أَبُوكُو اللّٰهْ بَسْ نَظَّمْ الْأَوْكَاتْ بِسُلْطِتَهْ وَ مَا أَنْطَاكُو إِذِنْ أَشَانْ تَعَرْفُوهُمْ. وَ لَاكِنْ وَكِتْ الرُّوحْ الْقُدُّوسْ يَنْزِلْ فَوْقكُو، تَلْقَوْا قُدْرَةْ أَشَانْ تَشْهَدَوْا لَيِّ فِي مَدِينَةْ الْقُدُسْ وَ فِي كُلَّ دَارْ الْيَهُودِيَّةْ وَ فِي دَارْ السَّامِرَةْ وَ لَحَدِّي آخِرْ الْأَرْض.»
وَ بَعَدْ عِيسَى قَالْ الْكَلَامْ دَا، أَنْرَفَعْ فِي السَّمَاءْ وَ هُمَّنْ شَايْفِينْ عِيسَى طَالِعْ وَ سَحَابْ دَارَقَهْ مِنْهُمْ. وَ وَكِتْ هُمَّنْ قَاعِدِينْ يِصَنْقُعُوا فَوْق فِي السَّمَاءْ وَ عِيسَى مَاشِي مِنْهُمْ، رُجَالْ إِتْنَيْن خُلْقَانْهُمْ بُيُضْ بَانَوْا جَنْبُهُمْ وَ قَالَوْا: «يَا رُجَالْ دَارْ الْجَلِيلْ، مَالْكُو إِنْتُو وَاقْفِينْ تِصَنْقُعُوا فَوْق فِي السَّمَاءْ؟ شِفْتُوا عِيسَى طَالِعْ مِنْكُو وَ فَاتْ فِي السَّمَاءْ. وَ بِنَفْس الطَّرِيقَةْ دِي، هُو يِقَبِّلْ مِنْ السَّمَاءْ فِي الْأَرْض!»
وَ دَا بِقِي فِي حَجَرْ أُسْمَهْ جَبَلْ الزَّيْتُونْ مِثِلْ كِيلَوْمِتِرْ وَاحِدْ مِنْ مَدِينَةْ الْقُدُسْ. وَ بَعَدْ دَا، الرُّسُلْ دَلَّوْا مِنْ الْحَجَرْ وَ قَبَّلَوْا فِي الْمَدِينَةْ.

وَ الرُّسُلْ قَبَّلَوْا فِي الْمَدِينَةْ وَ دَخَلَوْا فِي الْبَيْت وَ طَلَعَوْا فِي الْقَصِرْ الْقَاعِدِينْ فَوْقَهْ. وَ النَّاسْ دَوْل، هُمَّنْ بُطْرُسْ وَ يُوحَنَّا وَ يَعْقُوبْ وَ أَنْدَرَيَّسْ وَ فِلِبُّسْ وَ تُومَا وَ بَرْتُلْمَا وَ مَتَّى وَ يَعْقُوبْ وِلَيْد حَلْفَا وَ سِمْعَانْ الثَّوْرِي وَ يَهُوذَا وِلَيْد يَعْقُوبْ. وَ كُلُّهُمْ قَاعِدِينْ يِلِمُّوا دَايْماً وَ يِصَلُّوا بِنِيَّةْ وَاحِدَةْ وَ عَوِينْ وَاحِدَاتْ كُلَ قَاعِدَاتْ يِلِمَّنْ مَعَاهُمْ وَ مَرْيَمْ أَمّ عِيسَى وَ أَخْوَانَهْ.
وَ يَوْم وَاحِدْ، بُطْرُسْ قَمَّ فِي أُسْط الْأَخْوَانْ. عَدَدْهُمْ مِثِلْ 120 نَادُمْ. وَ هُو كَلَّمْ لَيْهُمْ وَ قَالْ: «يَا الْأَخْوَانْ، الْكَلَامْ الْمَكْتُوبْ فِي الْكِتَابْ، وَاجِبْ يِتِمّ. زَمَانْ، الرُّوحْ الْقُدُّوسْ كَلَّمْ بِوَاسِطَةْ النَّبِي دَاوُدْ فِي يَهُوذَا. هُو الْوَدَّى النَّاسْ لِعِيسَى أَشَانْ يَكُرْبُوهْ. وَ يَهُوذَا دَا، هُو وَاحِدْ مِنِّنَا وَ سَوَّى مَعَانَا نَفْس الْخِدْمَةْ.»
وَ يَهُوذَا شَالْ الْقُرُسْ الْأَوَّلْ سَأَلَهْ مِنْ الْكُبَارَاتْ أَشَانْ يُخُونْ عِيسَى وَ شَرَى بَيَّهْ زَرَعْ. وَ فِي الزَّرَعْ دَا، هُو وَقَعْ وَ بَطْنَهْ أَنْشَقَّتْ وَ كُلَّ مَصَارِينَهْ دَفَّقَوْا. وَ كُلَّ نَاسْ مَدِينَةْ الْقُدُسْ عِرْفَوْا الشَّيّءْ الْبِقِي لَحَدِّي سَمَّوْا الزَّرَعْ بِكَلَامْهُمْ حَقِلْ دَمَّا، مَعَنَاتَهْ زَرَعْ الدَّمّ.
وَ بُطْرُسْ قَالْ: «الْكَلَامْ الْمَكْتُوبْ فِي الزَّبُورْ بُقُولْ: <خَلِّي بَيْتَهْ يَخْرَبْ وَ نَادُمْ مَا يَسْكُنْ فَوْقَهْ.> وَ بَتَّانْ مَكْتُوبْ: <خَلِّي نَادُمْ آخَرْ يِبَدِّلَهْ.> وَ أَشَانْ دَا، وَاجِبْ لَيْنَا نَعَزُلُوا نَادُمْ وَاحِدْ مِنْ الرُّجَالْ الْقَاعِدِينْ مَعَانَا فِي كُلَّ الْوَكِتْ الرَّبِّنَا عِيسَى قَاعِدْ مَعَانَا، مِنْ يَحْيَى غَطَّسَهْ فِي أَلْمِي لَحَدِّي الْيَوْم الْاللّٰهْ رَفَعَهْ مِنِّنَا وَ شَالَهْ فِي السَّمَاءْ. وَ النَّادُمْ النَّعَزُلُوهْ يَبْقَى شَاهِدْ مَعَانَا فِي بُعَاثْ عِيسَى.»
وَ قَدَّمَوْا رُجَالْ إِتْنَيْن. وَ الْوَاحِدْ هُو يُوسُفْ بَارْ سَابَا الْأُسْمَهْ الْآخَرْ يُسْتُسْ وَ التَّانِي هُو مَتِّيَاسْ. وَ دَعَوْا وَ قَالَوْا: «يَا رَبِّنَا، إِنْتَ تَعَرِفْ قُلُوبْ كُلَّ النَّاسْ. وَصِّفْ لَيْنَا يَاتُو مِنْ الرُّجَالْ الْإِتْنَيْن دَوْل الْإِنْتَ عَزَلْتَهْ. هُو يَبْقَى رَسُولْ وَ يِشِيلْ خِدْمَةْ يَهُوذَا الْخَلَّاهَا وَ فَاتْ مَشَى لِلْبَكَانْ الْوَاجِبْ لَيَّهْ.»
وَ سَوَّوْا لَيْهُمْ أَمْ عِيَيْدَاتْ وَ وَقَعْ فِي مَتِّيَاسْ. وَ مَتِّيَاسْ لَمَّ مَعَ الرُّسُلْ الْإِحْدَى عَشَرْ.

Dinleyin أعمال الرُسُل 1