Bikolwa 7
7
Okubaza kwa Siteefano omu lukiiko lwʼaBayudaaya olukulu
1Awo oSaabakabona nʼabuulya oSiteefano nti, “Ebikukujunaanibwa bituufu?” 2OSiteefano nʼairamu ati, “Baganda bange nʼabataata, mumpuliirye! OKanca waiswe owa kitiinisya yabonekeire aize waiswe Ibbulaimu nali e Mesopotamiya, nacaali kusenga Karani, 3nʼamukoba ati, ‘Zwa omu nsi yaamu nʼomu bantu baamu, oyabe omu nsi gyendikulanga.’#Kwe 12:1
4“Awo nʼaliga omu nsi yʼaBakaludaaya nʼasenga omu Karani. Oite waamwe niyamaare okufa, oKanca nʼamwiyayo nʼamuleeta omu nsi gini mwemuli ati. 5Ensi gini tiyagimuwairemu bugwetwa, gonze akatakali akakwica okugulu okumwei, baitu nʼamusuubiza okugimuweerya ebbe yaamwe nʼabaizukulu baamwe abaliirawo, gonze ngʼomu kiseera ekyo tiyaalina mwana.”
6“OKanca yakobere Ibbulaimu, ‘Abaizukulu baamu balibba omu nsi eya iyanga erindi, eriribafoola abairu. Balibaakalya kubbi okumala emyaka ebikumi binai. 7Baitu ndibonereza eiyanga eryo, era oluzwanyuma balirigayo ni bandamirya omu kifo kini.’#Kwe 15:13-14 8Awo nʼamuweerya endagaano eya kusaliira, era niyabyaire oIsaaka, nʼamusaliira oku kiro ekyamunaanai. OIsaaka nʼabyala oYakobo, oYakobo nʼabyala abazeiza baiswe abakulu eikumi nʼababiri.”
9“Abazeiza baiswe abo baakwatiirwe oYusufu obwiya, ni bamutunda omu bwiru e Misiri. Baitu oKanca yaali na ye, 10nʼamucungura omu kubonaabona kwamwe kwona kwona, nʼamuweerya amagezi nʼobuganzi egiri oFaraawo omukama wa Misiri, eyamufoire omufugi omu bukama obwo nʼomu kikaali kyamwe kyona kyona. 11Ekyo nikiweire, enzala gingi ni gigwa woona woona omu Misiri nʼomu Kanani, okubonaabona ni kubba kwingi. Abazeiza baiswe nibatalina mere. 12OYakobo ni yawuliire nti omu Misiri waliyo emere, nʼatumayo abazeiza baiswe omulundi ogwekereire. 13Oku mulundi ogwakabiri, oYusufu ni yeeranga egiri abagande, nʼabantu baamwe ni bamanyibwa oFaraawo. 14Awo oYusufu nʼatumisya oite waamwe, oYakobo nʼaba nyumba yaamwe boona. Boona boona amwei baali abantu nsanju nabataanu. 15OYakobo nikwo okwaba e Misiri, ye nʼabataani baamwe gyebaafeereire. 16Emirambo gyabwe gyairiibweyo e Sekemu ni giziikwa omu mbi Ibbulaimu gyeyaguure oku baizukulu ba Kamoli omu Sekemu.”
17“Baitu ekiseera nikyali kikwigeera, oKanca aikiirye kyeyaasuubiize Ibbulaimu, omuwendo gwʼabantu baiswe omu Misiri ni gweyongera muno, 18okwica niwaizirewo omukama owondi ataamaite Yusufu. 19Oyo yaburabwize abantu baiswe nʼamigiirya abazeiza baiswe nʼabawambiriza okunagayo enkeremba zaabwe, leke zife. 20Omu biro ebyo oMusa nimwo yabyaliirwe, yaali mwana wa njawulo omu maiso ga Kanca. Nʼayoroorwa emyezi esatu omu nyumba ya ite waamwe. 21Niyaiyiibwe omu nyumba, omwara wa Faraawo nʼamutwala nʼamworoora nkʼomwana waamwe. 22OMusa nʼatendekwa amagezi goona goona agʼaBamisiri, era nabba wʼamaani omu bigambo nʼomubikolwa byamwe.”
23“OMusa niyaikirye emyaka amakumi anai, naizirwa ekirowoozo ekya kucaara abaganda baamwe aBaisirairi. 24Niyaboine oMumisiri nakwakalya kubbi omwei oku bo nʼamujuna nʼawoora enzugu nʼaita oMumisiri. 25Yalowoize nti abantu baamwe beeteja nti oKanca niye akumukolesya okubacungura, baitu bo tibaakyetejerye. 26Ekiro ekyaririire, oMusa nʼasanga aBaisirairi babiri nibakulwana, nʼagezaku okubayimbya nakukoba ati, ‘Basaiza nywe, muli baluganda lwaki mukulwana?’ 27Baitu odi eyaali akwakalya okubbi omwirawaamwe, nʼagaadiika edi oMusa, nakukoba ati, ‘Naani yakutairewo okubba omufugi era omulamuli waiswe? 28Okwendya kunnyita nka niwaitire oMumisiri eizo?’#Kuz 2:14
29“OMusa niyawuliire ekyo nʼairukira omu nsi ya Midiyaani gyeyasengere, nʼabyarayo abaana ababwojo babiri. 30Niwaayakairewo emyaka amakumi anai, omalaika nʼabonekera oMusa omu ndimi za muuro ogwali gukwakira omwisaka omwirungu, ampi nʼolusozi oSinaayi. 31OMusa niyakiboine, nʼakyewuunya muno. Ni yaali akwigeera okukyetegereza, nʼawura eiraka rya Mukama ni rimukoba riti, 32‘Ninje oKanca wʼabazeiza baamu, oKanca wʼIbbulaimu, era owa Isaaka, era owa Yakobo.’#Kuz 3:6 OMusa nʼakankana olwa kutiina natasobola kurolayote. 33OMukama nʼamukoba ati, ‘Iyamu enkaito, kubba ekifo kyoyemereiremu kikwera. 34Mboine okumigwa kwʼabantu bange abali omu Misiri, mpuliire okutinda kwabwe, ni nnyiza okubacungura. Ati iza nkutume e Misiri.’#Kuz 3:5,7,8,10 35OMusa niye omwei oyo gwebaagaine nibakukoba bati, ‘Naani yakutairewo okubba omufugi era omulamuli waiswe?’#Kuz 2:14 OKanca gweyatumire okubba omufugi era omucunguli waabwe nakwakala omu malaika eyamubonekeire omwisaka. 36Niye yabeebembeire nʼabatoola omu Misiri nakukola ebyamaano nʼebyewuunyo omu nsi eyo, nʼoku nyanja Egitukuliki nʼomwirungu, emyaka amakumi anai. 37Oyo niye oMusa eyakobere aBaisirairi ati, ‘OKanca alibatumira omulangi nka nje, aliriga omu baganda baanywe.’#Tek 18:15 38OMusa oyo niye eyaaliwo nʼaBaisirairi boona boona nibaakumbaaniire omwirungu. Niye oyo eyaali nʼabazeiza baiswe era niye eyaali nʼomalaika eyabazire na ye oku lusozi oSinaayi, era niye oyo eyawairwe ebigambo bya bwomi okubituweerya.”
39“Abazeiza baiswe baagaine okumuwura ni bamwenaga, emitima gyabwe ni giirayo e Misiri. 40Ni bakoba Alooni bati, ‘Tukoore abakanca batwebemberenge olwakubba oMusa oni eyatwiyire omu Misiri titumaite ekimwikireku.’#Kuz 32:1 41Awo ni bakola ekiisani kya nyana, ni baweeryayo ebiwongwa egiri ekiisani ekyo, ni basemereerwa olwa kiisani ekyo kyebeekoleire. 42Baitu oKanca nʼabaligaku, nʼabaweeryayo okuramyanga eisana, okwezi nʼenyenyeezi, nka nikyawandiikiibwe omu kitabo kyʼabalangi nti,
‘Nywe aBaisirairi,
ebiwongwa nʼebitwo mwabiweeryanga ninje emyaka amakumi anai nimuli omwirungu?
43Mwaimwire ekirooro
kya mbandwa oMoleki
nʼonyenyeezi wa kanca waanywe oRefani.
Ebyo nibyo biisani byemwakoore,
leke mubiramye.
Olwʼekyo ndibatwala omu bunyage
enseeri wa Bbabbulooni#Amo 5:25.’”
44“Abazeiza baiswe nibaali omwirungu, baalina eweema ekulanga oKanca nali na bo. Eweema eyo yakoleibwe nkʼoKanca niyakobere oMusa okugikola, nʼagikola nkʼekiisani oKanca kyeyamulangire. 45Abazeiza baiswe boona nibaagifunire, nibakwebemberwa oYoswa, ni baiza nagyo nibaali bakutwala ensi oKanca mweyeekereire okupeka aba mu nsi eyo. Nigibba eyo okwica omu biro bya mukama oDawudi, 46eyasiimiibwe oKanca era nʼasaba ayombokere oKanca wa Yakobo#7:46 Ebiwandiiko ebindi birina “Abaisirairi.” enyumba. 47Baitu omukama oSolomooni niye yagimwombokeire. 48Baitu oMukama oKanca Akira byona tabba mu nyumba ezombokerwe abantu, nkʼomulangi nakoba nti,
49‘Eiguru nigyo ntebe yange,
nʼensi nikyo kisusuuryo kyʼamagulu gange.
Mulinnyombokera nyumba ki?
Oba kifo ki mwenaakuwumuuranga?
50Emikono gyange tinigyo gyakoore bini byona byona?’#Isa 66:1-2”
51OSiteefano ni yeeyongera nʼakoba ati, “Nywe engangaali, abawamitima egikakanyali era abatawura; mukwisana abazeiza baanywe, olwakubba buli nca mujeemera oMwoyo Akwera! 52Mulangi ki abazeiza baanywe gwebataayasayasanie? Baitire nʼabaalanganga okwiza kwʼAikiriire, nywe gwemwaliiraine ni mumwita. 53Niinywe abaafunire amateeka ga Kanca agaaleeterwe abamalaika, baitu mwagaine okugakwata.”
OSiteefano bakumwitisya amabbaale
54Abalukiiko nibaawuliire bini, ni bakwatibwa ekiniga ni bamunenera akanyaisaya. 55Baitu oSiteefano naizwire oMwoyo Akwera, nʼaroleera omwiguru, nʼabona ekitiinisya kya Kanca, oYesu nayemereire oku rubaju olwa gulyo olwa Kanca. 56OSiteefano nʼakoba ati, “Bona, nkubona eiguru niliswekwirwe, nʼoMwana wa Muntu nayemereire oku rubaju olwa gulyo olwa Kanca.”
57Niyabazire kini, ni baigala amatwi gaabwe, ni bakokooma ni bamujumbutukiraku amwei, 58ni bamukokota ni bamuwuluca enzai wa kibuga ni batandika okumukubba amabbaale. Abajuurwa ni balekera omusigazi eyayetebwanga oSawulo engoye zaabwe azibabiikire.
59Nibaali bakumukubba amabbaale, oSiteefano nʼasaba ati, “Mukama wange Yesu, twala omwoyo gwange.” 60Nʼakubba amajwi, nʼayamiira ati, “Mukama, basaasire ekibbi kini.” Niyamaare okubaza ebyo nʼafa.
Айни замон обунашуда:
Bikolwa 7: RUULI-NYALA
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in