Bikolwa 6
6
Abaweereza omusanju bakukomwa
1Awo ebiro ebyo, abeegesebwa nibaakanyire, aBayudaaya ababaza oLuyonaani ni bagongoizokera abaira baabwe ababaza oLwebbulaniya, olwakubba abanamwandu baabwe tibaaweebwanga kusai bintu ebyagabwanga buli kiro. 2Awo abakwenda eikumi nʼababiri ni beeta abaikiriza boona boona, ni bakoba bati, “Tikisai iswe okunagiriza okwegesya ekigambo kya Kanca, ni twira omu kugabania emere. 3Ati abaluganda, mukomye omu nywe abasaiza musanju bemwasiima, abaizwire oMwoyo Akwera nʼamagezi, nibo tukwatisye omulumo ogwo. 4Baitu iswe twemaare oku kusaba oKanca nʼokwegesya ekigambo kyamwe.” 5Kyebaabazire ni kisemeerya ekibiina kyona. Ni bakomya oSiteefano, omusaiza eyaali aizwire oMwoyo Akwera nʼokwikiriza, nʼoFiripo, nʼoPulokoolo, nʼoNikanooli, nʼoTimoni, nʼoPalumeena, nʼoNikolaawo owʼAntiyookiya, eyaali ayindukiire omu kiyudaaya. 6Ni babaleeta, ni babata omu maiso gʼabakwenda, ni babasabira, era ni babataaku emikono gyabwe. 7Awo ekigambo kya Kanca ni kyeyongera okwika buli amwei. Omu Yerusaalemu omuwendo gwʼabeegesebwa ni gweyongera, nʼabakabona baingi ni baikiriza oYesu.
OSiteefano akukwatibwa
8OSiteefano eyaali naizwire ekisa nʼamaani ga Kanca, nʼakola ebyamaano nʼebyewuunyo bingi omu bantu. 9Baitu abantu abamwei aba Ikumbaaniro eryetebwa eryʼaBacungule#6:9 Bacungule Bani baali Bayudaaya ababbaire abairu nga basandabwirwe omu bwiru., abaaligire omu Kuleeni nʼomwAlekizanderiya, nʼabandi abaaligire omu Sirisiya nʼomwAsiya, ni bawakana na ye, 10baitu ni batamusobola, olwʼamagezi nʼoMwoyo byeyabazisirye. 11Awo ni baakalya eminwa omu bantu leke bakobe bati, “Twamuwuliire nakubaza ebigambo ebikuzuma oMusa nʼoKanca.” 12Kini ni kitabulatabula abantu, nʼabakulu omwiyanga, nʼabeegesya bʼamateeka. Ni baiza egiri oSiteefano, ni bamukwata, ni bamuleeta omu Lukiiko oLukulu. 13Ni baleeta abajuurwa ababubeyegi abaakobere nti, “Omuntu oni buliizo azumiira ekifo kini ekikwera era nʼamateeka ga Musa. 14Twamuwuliire nakukoba nti oYesu oni oMunazaaleesi akwiza kuzica ekifo kini, ayindule nʼempisa oMusa zeyatuwaire.” 15Boona boona abaali omu lukiiko lwʼaBayudaaya olukulu ni bamuroleera, ni babona amaiso gaamwe nigali nkʼaga malaika.
Айни замон обунашуда:
Bikolwa 6: RUULI-NYALA
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in