Uluk 18
18
Ityang gbe le ungye-uhwuu angwu a wee abwo ye
1Ujeso a ma ha de be ityang anyin he u hwọ abe le ki yi kpe-kpe le be kọng ha Unim mbee kunyọng, be wee abwo ye. 2A de le, “Ki ma yi le undi ken angwu u tang ushe he kubọng kususo angwu a maa shel Unim ọ, nyọng ki gbee he le undi ọ ye. 3Ki ma mbee yi le ungye-uhwuu ha he kubọng kumen ana angwu a ma le hwaa le he mbee kunyọng kpam le u kpe-e tyang le ha undi-linaa uma gbe he ama-ale ushe uma del-del.
4“Utang-ushe ana a kam le u fan he ye kpam ki le gbe kigbe. A ha kọng ha kuhwo-ma le, ‘Ma na mi shel Unim ye, ki gbee mi le undi ye ọ, 5le gbe ungye-uhwuu angwun u fel mi kuhwo kindee-kindee, mi ba nda le mi gyo ushe uma. Gbe na a ye, u ba sha-m mi fel gogo ye gbe he abele uma nyin mbee kunyọng.’ ”
6Ada Ujeso a ha mbee gye kushu kọng le, “Ma gyo ashi Utang-ushe ubibi umen angwu u maa ishe i a ma kọng. 7Unim u nya ka bendi bema abe be kii hwaa le he ishu ọ, kusu ọ, likpọng ye a? U nya fan abe akikye ye a? 8Mi da amen le u ka abe likpọng ban kunyọng ye. Mi Unwaa Undi-gye, mi nya ba nda bendi abe be fe lityam ha ami he kunyọng ahwu mi be tem be a?”
Ityang gbe le Iferesis le undi angwu u kpe ukpanda
9Ujeso a ma mbee kung ityang anyin bun de bendi abe be pee kuhwobel na be yi benunung, be bia bendi abe be teng puu na be yi bebibi. 10A bun ityang ana de be le, “Bendi befee be ma gye he Ushọm Unim le be la kọng ha Unim. Undi angwu ken a ma yi undi Iferesis; angwu ken u kpe ukpanda. 11Angwu Iferesis a le naa utata keb akọng-ale ha Unim le kuhwo-ma le, ‘Unim, mi pee a na mi yi na bendi abe be teng be yi a ye. Mi sha uwub kiwọm ye, mi sha undi za ye, mi gba ipel ha undi ususo fem ungyegi tyang ye. Mi mbee pee a le mi yi na undi angwu u kpe ukpanda ana a ye. 12Mi ndo itung kọng ha awo ati afee he utyọng uyang-yang. He biwọm puu, gbe mi yi le biwọm lihwo, mi waa ken ka-a.’
13“Undi angwu u kpe ukpanda a le naa ha he item kigbe-kigbe keb ashi be he itang, u bwọ abwo fe ha kakem kung kọng le, ‘Unim, beshi be sha-a le mi undi-kiban.’ ”
14Ujeso a ha kung kọng le, “Mi da amen le ungikye angwun na a gye he usha-ale le likpọng he ashi Unim, angwu u yi Iferesis a ye. Undi angwu a kung kuhwo-ma gye he kusi, Unim u keb he ba he itang. Angwu a keb kuhwo-ma be he itang, Unim u kung he gya he kusi.”
Inwaa-bwani le Ujeso
(Mat 19:13-15; Mak 10:13-16)
15Bendi besuso be be le bebwaa-bel le Ujeso u tyọ abe abwo. Bendi-utung Ujeso be nde be. Be ma swan ndo abe. 16Ujeso a ko bebwaa-ni hwaa le kuhwo-ma. U de bendi-utung bema le, “Ma tyang bebwaa-ni be be hwaa le mi. Ma ndo abe ye, likọye kiteng kusu Unim ki yi ke abe kitaa i a. 17Kigyang-kigyang mi de men le, undi uyang-yang angwu a keb kuhwo-ma ke Unim le u kwu Usu uma na unwa-ani ye, u kwa le libwo he kiteng kusu Unim ye.”
Bendi-kingbeb le kiteng kusu Unim
(Mat 19:16-30; Mak 10:17-31)
18Ukandi Ijuus ususo a bii Ujeso le, “Ukandi ununung, mi shi na a, mi kwu le likpan kunyọng angi li ngyọ igye kpam?”
19Ujeso a kung bii he le, “Kibang a, wo ko mi le undi ununung? Ki yi le undi ununung ye, Unim ufe-ufe na u yi ununung. 20Wo ngye Iten angi i de le, ‘Gbe ipel ha undi ususo fem ungye-gang tyang ye. Gwu undi ye, zi kazi ye. Be uman fe undi ye. Fe atia le anaa.’#18:20 Ligye 20:12-16; Iten lefee 5:16-20 ”
21Ungikye angwuna a de-e le a ndọ Iten anyin puu kung le ha he kisun kima.
22He kunyọng ahwu Ujeso a gyo he a kọng ashin, a de-e le, “Ki teng le wo shi kiwọm ken. Le kung biwọm bigang puu ndyeb zi, kung unde hwọ ke bendi-likaa, ma wo ba kwa le kingbeb he lifung-atabe. Ma wo ha be pwọm mi.” 23He kunyọng ahwu a gyo ashin, a fel le kimbwee, likọye a ma mbu kingbeb kaang. 24Ujeso a nde le a fel he kimbwee, a kung de le, “Ki yi le kingie kaang ke bendi-kingbeb le be ngwee he kiteng kusu Unim. 25Ashi le kizaaki ki gbe he ligia uwo ki yi pie-pie hwo ashi le undi-kingbeb u ngwee he kiteng kusu Unim.”
26Bendi abe be gyo he be bii le, “Fe ayang u ha be kwu le likpan kunyọng?”
27Ujeso a fan abe le, “Biwọm abi bendi-gye be shi abi mbee ye, Unim u sha abi bi kwa pie-pie.”
28Ipita a de-e le, “Nde, li tyang biwọm bityan puu, fel bendi-utung begang.”
29Ujeso a de be le, “Kigyang-kigyang, ki ngbeb. Kiwọm kiyang-yang ashi undi a gbe tyang ashi he kuhwo kiteng kusu Unim, ma ki yi ushu ọ, ungye ọ, bebwaa ọ, bebwaa-nam ọ, atyam ọ, anam ọ, 30mi da amen kigyang le undi umen ana u kpa lifem la gba gyọng hwa abina, u be kpe likpan kunyọng angi li ngyọ igye kpam he igye angi i be le ha kushu.”
Ujeso a kọng kugbe ahwu lekie gbe le lihwu lima
(Mat 20:17-19; Mak 10:32-34)
31Ujeso a ko bendi-utung bema abe lihwo le be befee gye he ufaa, kung de be le, “Ma gyo, li gya he Ujeruselem he kipi ashi biwọm puu bi be shi nya ana bitye-ugie kisọm Unim be fee gbe le mi Unwaa undi-gye. 32Undi u ba kung mi ka bendi abe be yi Ijuus a ye. Bendi bemen i be ba nyan mi, be bia mi, be sho akung wu-m. 33Be ba kpam mi ikwun, be ha gwu-m. He liti angi lekie mi ba tem wum le he lihwu.”
34Ki nung bendi-utung Ujeso le biwọm abin ye. Kiwọm ashi igie anyin i ze ki ma yi he kundyel le ha abe. Be ma ngye kiwọm ashi Ujeso u kọng gbe le shi ye.
Uhwọ-ashi ken a kpe limbee
(Mat 20:29-34; Mak 10:46-52)
35Ujeso a ma be fel kpee-kpee he Ujeriko. Uhwọ-ashi ken a ma yi kwu he kukwo, u nyọng kinyọng. 36A gyo bendi gbam be gbe ha. A bii le, “Kibang ki baa?” 37Be de-e le Ujeso angwu Unazaret u ba le ha.
38U fel gaa le, “Ujeso, unwaa Udebid, kwu le beshi ha ami!” 39Bendi abe he ahe kushu be gaa fe-e le u naa le kihwee. A mbee gaa kaang le, “unwaa Udebid, kwu le beshi ha ami!” 40Ujeso a ha naa, sọm ko he. He kunyọng ahwu abe hwaa le he, Ujeso a bii he le, 41“Kibang wo kee le mi shi ka-a?”
A de le, “Ukandi, mi kee le mi mbee nda.”
42Ujeso a de-e le, “Abọng-ale agang a sha-a wo mbee.” 43Nya kukwo-kukwo u fel nda. A pwọm Ujeso, u pee Unim. Bendi puu abe be nde ashi ki shi be pee Unim.
Айни замон обунашуда:
Uluk 18: KUIL
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
Igie Likpan™ Kushia azu Unim afufe
© 1982, 2025 Biblica, Inc.
Be kpe ikeb be ha shi kushia ahwun.
Ikeb puu gbe le kushia ahwun he igye i puu, i yi angi Biblica, Inc. a.
Bette Contemporary Version™ New Testament
Copyright © 1982, 2025 by Biblica, Inc.
Used with permission.
All rights reserved worldwide.
Uluk 18
18
Ityang gbe le ungye-uhwuu angwu a wee abwo ye
1Ujeso a ma ha de be ityang anyin he u hwọ abe le ki yi kpe-kpe le be kọng ha Unim mbee kunyọng, be wee abwo ye. 2A de le, “Ki ma yi le undi ken angwu u tang ushe he kubọng kususo angwu a maa shel Unim ọ, nyọng ki gbee he le undi ọ ye. 3Ki ma mbee yi le ungye-uhwuu ha he kubọng kumen ana angwu a ma le hwaa le he mbee kunyọng kpam le u kpe-e tyang le ha undi-linaa uma gbe he ama-ale ushe uma del-del.
4“Utang-ushe ana a kam le u fan he ye kpam ki le gbe kigbe. A ha kọng ha kuhwo-ma le, ‘Ma na mi shel Unim ye, ki gbee mi le undi ye ọ, 5le gbe ungye-uhwuu angwun u fel mi kuhwo kindee-kindee, mi ba nda le mi gyo ushe uma. Gbe na a ye, u ba sha-m mi fel gogo ye gbe he abele uma nyin mbee kunyọng.’ ”
6Ada Ujeso a ha mbee gye kushu kọng le, “Ma gyo ashi Utang-ushe ubibi umen angwu u maa ishe i a ma kọng. 7Unim u nya ka bendi bema abe be kii hwaa le he ishu ọ, kusu ọ, likpọng ye a? U nya fan abe akikye ye a? 8Mi da amen le u ka abe likpọng ban kunyọng ye. Mi Unwaa Undi-gye, mi nya ba nda bendi abe be fe lityam ha ami he kunyọng ahwu mi be tem be a?”
Ityang gbe le Iferesis le undi angwu u kpe ukpanda
9Ujeso a ma mbee kung ityang anyin bun de bendi abe be pee kuhwobel na be yi benunung, be bia bendi abe be teng puu na be yi bebibi. 10A bun ityang ana de be le, “Bendi befee be ma gye he Ushọm Unim le be la kọng ha Unim. Undi angwu ken a ma yi undi Iferesis; angwu ken u kpe ukpanda. 11Angwu Iferesis a le naa utata keb akọng-ale ha Unim le kuhwo-ma le, ‘Unim, mi pee a na mi yi na bendi abe be teng be yi a ye. Mi sha uwub kiwọm ye, mi sha undi za ye, mi gba ipel ha undi ususo fem ungyegi tyang ye. Mi mbee pee a le mi yi na undi angwu u kpe ukpanda ana a ye. 12Mi ndo itung kọng ha awo ati afee he utyọng uyang-yang. He biwọm puu, gbe mi yi le biwọm lihwo, mi waa ken ka-a.’
13“Undi angwu u kpe ukpanda a le naa ha he item kigbe-kigbe keb ashi be he itang, u bwọ abwo fe ha kakem kung kọng le, ‘Unim, beshi be sha-a le mi undi-kiban.’ ”
14Ujeso a ha kung kọng le, “Mi da amen le ungikye angwun na a gye he usha-ale le likpọng he ashi Unim, angwu u yi Iferesis a ye. Undi angwu a kung kuhwo-ma gye he kusi, Unim u keb he ba he itang. Angwu a keb kuhwo-ma be he itang, Unim u kung he gya he kusi.”
Inwaa-bwani le Ujeso
(Mat 19:13-15; Mak 10:13-16)
15Bendi besuso be be le bebwaa-bel le Ujeso u tyọ abe abwo. Bendi-utung Ujeso be nde be. Be ma swan ndo abe. 16Ujeso a ko bebwaa-ni hwaa le kuhwo-ma. U de bendi-utung bema le, “Ma tyang bebwaa-ni be be hwaa le mi. Ma ndo abe ye, likọye kiteng kusu Unim ki yi ke abe kitaa i a. 17Kigyang-kigyang mi de men le, undi uyang-yang angwu a keb kuhwo-ma ke Unim le u kwu Usu uma na unwa-ani ye, u kwa le libwo he kiteng kusu Unim ye.”
Bendi-kingbeb le kiteng kusu Unim
(Mat 19:16-30; Mak 10:17-31)
18Ukandi Ijuus ususo a bii Ujeso le, “Ukandi ununung, mi shi na a, mi kwu le likpan kunyọng angi li ngyọ igye kpam?”
19Ujeso a kung bii he le, “Kibang a, wo ko mi le undi ununung? Ki yi le undi ununung ye, Unim ufe-ufe na u yi ununung. 20Wo ngye Iten angi i de le, ‘Gbe ipel ha undi ususo fem ungye-gang tyang ye. Gwu undi ye, zi kazi ye. Be uman fe undi ye. Fe atia le anaa.’#18:20 Ligye 20:12-16; Iten lefee 5:16-20 ”
21Ungikye angwuna a de-e le a ndọ Iten anyin puu kung le ha he kisun kima.
22He kunyọng ahwu Ujeso a gyo he a kọng ashin, a de-e le, “Ki teng le wo shi kiwọm ken. Le kung biwọm bigang puu ndyeb zi, kung unde hwọ ke bendi-likaa, ma wo ba kwa le kingbeb he lifung-atabe. Ma wo ha be pwọm mi.” 23He kunyọng ahwu a gyo ashin, a fel le kimbwee, likọye a ma mbu kingbeb kaang. 24Ujeso a nde le a fel he kimbwee, a kung de le, “Ki yi le kingie kaang ke bendi-kingbeb le be ngwee he kiteng kusu Unim. 25Ashi le kizaaki ki gbe he ligia uwo ki yi pie-pie hwo ashi le undi-kingbeb u ngwee he kiteng kusu Unim.”
26Bendi abe be gyo he be bii le, “Fe ayang u ha be kwu le likpan kunyọng?”
27Ujeso a fan abe le, “Biwọm abi bendi-gye be shi abi mbee ye, Unim u sha abi bi kwa pie-pie.”
28Ipita a de-e le, “Nde, li tyang biwọm bityan puu, fel bendi-utung begang.”
29Ujeso a de be le, “Kigyang-kigyang, ki ngbeb. Kiwọm kiyang-yang ashi undi a gbe tyang ashi he kuhwo kiteng kusu Unim, ma ki yi ushu ọ, ungye ọ, bebwaa ọ, bebwaa-nam ọ, atyam ọ, anam ọ, 30mi da amen kigyang le undi umen ana u kpa lifem la gba gyọng hwa abina, u be kpe likpan kunyọng angi li ngyọ igye kpam he igye angi i be le ha kushu.”
Ujeso a kọng kugbe ahwu lekie gbe le lihwu lima
(Mat 20:17-19; Mak 10:32-34)
31Ujeso a ko bendi-utung bema abe lihwo le be befee gye he ufaa, kung de be le, “Ma gyo, li gya he Ujeruselem he kipi ashi biwọm puu bi be shi nya ana bitye-ugie kisọm Unim be fee gbe le mi Unwaa undi-gye. 32Undi u ba kung mi ka bendi abe be yi Ijuus a ye. Bendi bemen i be ba nyan mi, be bia mi, be sho akung wu-m. 33Be ba kpam mi ikwun, be ha gwu-m. He liti angi lekie mi ba tem wum le he lihwu.”
34Ki nung bendi-utung Ujeso le biwọm abin ye. Kiwọm ashi igie anyin i ze ki ma yi he kundyel le ha abe. Be ma ngye kiwọm ashi Ujeso u kọng gbe le shi ye.
Uhwọ-ashi ken a kpe limbee
(Mat 20:29-34; Mak 10:46-52)
35Ujeso a ma be fel kpee-kpee he Ujeriko. Uhwọ-ashi ken a ma yi kwu he kukwo, u nyọng kinyọng. 36A gyo bendi gbam be gbe ha. A bii le, “Kibang ki baa?” 37Be de-e le Ujeso angwu Unazaret u ba le ha.
38U fel gaa le, “Ujeso, unwaa Udebid, kwu le beshi ha ami!” 39Bendi abe he ahe kushu be gaa fe-e le u naa le kihwee. A mbee gaa kaang le, “unwaa Udebid, kwu le beshi ha ami!” 40Ujeso a ha naa, sọm ko he. He kunyọng ahwu abe hwaa le he, Ujeso a bii he le, 41“Kibang wo kee le mi shi ka-a?”
A de le, “Ukandi, mi kee le mi mbee nda.”
42Ujeso a de-e le, “Abọng-ale agang a sha-a wo mbee.” 43Nya kukwo-kukwo u fel nda. A pwọm Ujeso, u pee Unim. Bendi puu abe be nde ashi ki shi be pee Unim.
Айни замон обунашуда:
:
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
Igie Likpan™ Kushia azu Unim afufe
© 1982, 2025 Biblica, Inc.
Be kpe ikeb be ha shi kushia ahwun.
Ikeb puu gbe le kushia ahwun he igye i puu, i yi angi Biblica, Inc. a.
Bette Contemporary Version™ New Testament
Copyright © 1982, 2025 by Biblica, Inc.
Used with permission.
All rights reserved worldwide.