Mata 22
22
Maŋgəla ma ndza ata kwakus dəma
(Luk 14.15-24)
1Azha, Yesu dəba a azhin a zlapatana abə maŋgəla a həji ndiɓi aagi zhana, iŋgaya: 2«Tsakwa ana saɓ la ndza bay ma ndza a wəzəm a wəzlaf: a saɓ andza bay ma kaɗalanə kwakus dəma a mbə tə. 3Zlən a zlənha həji ma ɗalanə zlən tə aagi yaha həji ma yahaya aagi zəm wəda, ama, aa taji a ndahas. 4Zlən a zlənha ndiɓi aagi, aska aagi zlapatana: “Tsakwa anawatsə, wəda naka tada tə tiw, sa tadza zli naka aagi ka abə səkən ŋgas ma gapagap aagi, sa tafata ka dagala, səkən aagi tadaya tiwtiw. Huni ndaha a zəm wəda dəma,” iy. 5Ama, deŋ həji ndə a yata watsa aagi a heɗe akas, minja a kanda tə a la tə, minja a kaberɓa səkən tə. 6Ndiɓi aagi kaw aa mbəla həji ndə a zlənata watsa, dəba aagi asatana yaka, azha bazl aa bazlata ka. 7Bay ghuɗek a ghuɗek tə, zlən a zlən suji tə aagi aska aagi nda bazl həji badaway watsa aagi ka, zhana aska aagi feŋ hayak ta ma dzamadzam watsa aka. 8Azha, dəba a azlapatana a maɗal zlən tə aagi, iŋgaya: “Wəda gwaygwaya ndawata dəma tadaya tiw, ama həji ma yahaya aagi, aa kaagwar a heɗes. 9Huni nda a ŋge a mandəwəl təf aagi tiwtiw, huni yaha kwa vaye, həji ndə huni kaagərata aagi mandaha a zəm wəda.” 10Maɗal zlən aagi, tsaw aa nda a ŋge abə mandəwəl təf aagi, azha dzam a dzamha həji ndə aa gəraɓa aagi, ala ma ŋtan abə ma gamak tiwtiw. Azha jak ta ɗal gwaygwaya mkpef abə manahayak.
11Ndə bay, a ɗa peteŋ a jak, a gəra həji ma ndza a tsutsa aagi ya, a gəra ala minja a tsutsa, abə rəkuts gwaygwaya a heɗe akas. 12Zlap a zlapanə, iŋgaya: “Ŋgwanambə naka, hwa sən a ndaha a ɗi, rəkuts gwaygwaya ata hwa aka səku avaŋga?” Ama, ala watsa, ɗekɗek a ndza tə ka, tazhinanə zlap akas. 13Azha, bay watsa, zlap a zlapatana a həji ma ɗalanə zlən aagi, iŋgaya: “Huni dzawanə ŋgas aka abə ra tə, azha, huni fakə a bəza, a ləvaŋ. A tsutsa abə ala watsa a ahan abə a aɓam zliɗeŋ,”» iy. 14Yesu iŋgaya: «Ara ndə a ɗa, həji aagi vərəm ana ndə həji yaata, ama kajik ikwa ana ma dəmha a mən aagi.»
Ŋtəra jamargwal a cina hayak
(Mrk 12.13-17; Luk 20.20-26)
15Azha, Farisa aagi, dzam aa dzam aska a gas wirwir ta sleŋanə kilŋga a Yesu abə zlap aagi. 16A diwzha, zlən aa zlənanə magəli ta ndiɓi aagi abə həji Haridus aagi, aska aagi zlapanə: «Masərək, ni kasən ya, hwa kaɓah mas, zhana, hwa sərək ma a heɗe a heɗe, ŋzliŋ a dzahu ara ala səku, ara ndə a ɗa, hwa kataŋ dagal həji aagi səku. 17Ghalani mbara azha, ana səkən ndə hwa kadeŋi ata ma watsə: Təf aka a ŋtəranə jamargwal a cina hayak Ruma vəw, aka səku?» aagiy. 18Ama, Yesu a kasən gamak deŋ ŋkwaɓ ta, zlap a zlapatana, iŋgaya: «Ŋgwashŋgwash aagi, huni may a sleŋaka kilŋga ara veme? 19Huni ghalaka dala ta ŋtəra jamargwal watsa,» iy. Leŋ aa daanə dala ŋtaguleŋ. 20Azha, Yesu zlap a zlapatana, iŋgaya: «Wənək ma ndza ata dala watsə abə zləm ma ndza a heɗe ataa vaya?» iy. 21Zhin aa zhinanə: «Ataa cina hayak Ruma,» aagiy. Mbara azha, Yesu iŋgaya: «Huni ŋtəranə a cina hayak Ruma ana ma ɗa səkən ataa cina hayak Ruma, azha, huni ŋtəranə Bizlaf ana səkən ma ɗa ataa Bizlaf,» iy.
22Ndə aa zlima zlap watsa, hak aa ghərəŋ ta, mbasl aa mbasl ka, aa tsaa kanda ta.
Ɗiw ata garha a wəzəm jiɓ
(Mrk 12.18-27; Luk 20.27-38)
23Vah watsa, həji Saduki aagi, aa taha ara Yesu. Aa ɗa həji ma kazlap, kwa ala ma garha a wəzəm a bəza a jiɓ aka səku. Dəba aagi aɗiwzə, aagi iŋgaya: 24«Masərək, Musa tazlap, iŋgaya: Andza ala tamca tə ci, tambəwha mbə akas, zliŋgin kula a ji wala tə watsa, a mbəwanə mbə aka ana ala ma mca tə. 25Ama, a taba cini, həji ndiɓi ŋshiliɗ, ata mamən ta. Gwanji ma ndza a mən leŋ a ji wala, mca a mca tə, aa tambəwha abə sha akas, mbasl a mbaslanə wala tə ka a zliŋgin. 26Ikwa yəm abə magbak tə a ɗalə, mamahkaɗ, a gwar ata maŋshiliɗ. 27A diwzha ta tiwtiw, wala watsa yəm, mca a mca tə. 28Vah ndə həji aagi kaagara ta a wəzəm a jiɓ ya, wala watsa a aɗa wala azha vaya? A taba həji ma ŋshiliɗ watsa aagi? Ara ndə a ɗa kwa vaye taɗal wala a heɗe.»
29Yesu zhin a zhinatana: «Huni tafəcak təf bəza, ara ndə a ɗa, huni kazlima ma ma ndza a Ɗerewal ma ghwaɗeɗes, kwa ɓərɓər ataa Bizlaf huni tazlimas. 30Ara ndə a ɗa, vah ndə həji aagi kaagara ta a wəzəm a jiɓ, ji kusəm a taba mawəl aagi abə wali aka zhana səku, ama, həji aagi andza andza matəf Bizlaf ma ndza a wəzəm a wəzlaf aagi. 31Ata zlap ma ndza ata garha a wəzəm ma ndza a taba həji ma bazl ta aagi, kwa huni tava a yazə səkən ndə Bizlaf a ghal aka wəra? A zlap iŋgaya: 32Sa ana Bizlaf ataa Ibərahima, Bizlaf ataa Isiyaku Bizlaf ataa Yakubu. Bizlaf a ɗa ataa həji ma bazl ta aagi səku, ama, Bizlaf həji ma ndza abə nja aagi,» ana Yesu, iy. 33Ndə ŋgaɓa həji aagi, aa zlima ma watsə, hak aa ghərəŋ ta ata sərək ma tə.
Ma ma dzawadzaw ma pa zhiva
(Mrk 12.28-34; Luk 10.25-28)
34Ndə Farisa aagi zlima Yesu tandekwatana ma Saduki aagi bəza, zlap ara təmta aka zhana səku, dzam aa dzamha ka. 35Ala minja ŋtaguleŋ a taba masərək ma ma garagar aagi, a gas a təlzə abə sleŋ kilŋga abə ma watsə, dəba a aɗiwzə, iŋgaya: 36«Masərək, a taba ma ma dzawadzaw aagi ya, ma pa zhiva, a ma garagar ya ma ndza a vata?» aagiy. 37Yesu zhin a zhinanə, iŋgaya: «Hwa amay Bay Madagal Bizlaf kwa, abə ꞌunəf kwa tiwtiw, abə miɗ kwa tiwtiw, abə deŋ ŋkwaɓ kwa tiwtiw. 38Watsə azha, ana ma ma dzawadzaw, ma ndza a ma ma garagar ma pa zhiva, mampər. 39Magbak tə tsakwa, ana ma kaɗiw a saɓakənə: May ala andza ndə hwa kamay ha kwa, iy. 40Gar ma ataa Musa tiwtiw abə sərək ma ataa həji ma ɗaf ma ndə aa zlimazə ara Bizlaf aagi tiwtiw, aa ndza ata dzaw ma ma gbak watsə aagi.»
Tiw Kərist abə Dawda
(Mrk 12.35-37; Luk 20.41-44)
41Ndə Farisa aagi, aa dzam ta ka, Yesu ɗiw a ɗiwzata, iŋgaya: 42«Deŋ kuni ata Kərist avaŋga? A ɗa shiŋ vaya?» Zhin aa zhinanə, aagi iŋgaya: «A ɗa shiŋ ataa Dawda,» aagiy. 43Yesu zlap a zlapatana, iŋgaya: «Mbara, ndə Dawda a ɗa mkpef abə Miɗ ma ghwaɗeɗe ya, a yə abə Bay Madagal, ara veme? A zlap, iŋgaya:
44 Bizlaf Bay Madagal ma ndza a wəzəm a zlapanə a Bay Madagal naka:
Ndza kwa a ɗi ata guva zəm naka,
A vaŋ ata vah ndə sa kaza həji jaga kwa aagi ka, a ɗi aska ŋgas kwa.
45Andza, Dawda a yə abə Bay Madagal, a sən a zhin a ɗa shiŋ tə avaŋga?»
46Kwa ala ma ɗa kula a zhinanə zlap aska ɗiw ma watsa tə akas. ꞌWa aka ata vah watsa, kwa ala ma slənzə a ɗiwzə ma ŋtaguleŋ ara akas.
Айни замон обунашуда:
Mata 22: GOU
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in