Mata 21
21
Nda Yesu a Wərusalima
(Mrk 11.1-11; Luk 19.28-40; Yhw 12.12-16)
1Ndə tiw Yesu abə magəli tə aagi slaɓ a vaŋ a Wərusalima, aa huk abə hayak ma dzuk Baytifaji, ma mber abə ha wəzəm Uliv Yesu zlən a zlən magəli tə aagi gbak atama tə. 2Zlap a zlapatana, iŋgaya: «Huni nda a hayak ma dzuk ma ndza atama kuni watsə, huni agəra a tsutsa, wala madambərzhahw tadzawaya azha mbə tə a tsutsa abəra, huni pəlazə, huni daaka təmta. 3Andza ala tazlapahuni, huni zhinanə: “Bay Madagal ma kamayə,” huniy kəsha. Azha a tsutsa, aagi ambaslahuni təmta ka a nda,» iy.
4A ɗal ikwa aska a kəliy zlap ala ma ɗaf ma ndə a zlimazə ara Bizlaf, ndə a zlap, iŋgaya:
5 Huni zlapanə a həji ma ndza a hayak ma dzamadzam Siyuna aagi:
Tsakwa, bay ma dagal kwa a kandaha ara hwa.
Ghav ara akas, tataf tə ata wala madambərzhahw,
ata mbə madambərzhahw, mbə səkən ŋgas ta zlaɗ səkən aagi.
6Magəli ataa Yesu aagi, tsaw aa nda, andza ndə a ghalatana. 7Leŋ aa daaha wala madambərzhahw watsa abə mbə tə, bəlik aa bəlikatana rəkuts aka ata dəɓa, azha ka Yesu, a ndza tə a heɗe. 8Vərəm həji ma ndza a taba ŋgaɓa həji watsa aagi, aa bəlikanə rəkuts ta aagi a ŋge a təf. Ndiɓi aagi bahw maram mpi aagi, dəba aagi abəlikanə ata təf. 9Ŋgaɓa həji ma kanda atama tə abə ma kasəbarə a diwzha aagi kadza wəla, iŋgaya: «sləf maɗal ata Mbə Dawda! Bizlaf mapish bəzla tə ma təwah aka ata ala ma kandaha ata zləm Bizlaf Bay Madagal! Sləf a Bizlaf ma ndza a wəzəm a wəzlaf.»
10Ndə Yesu a ɗa peteŋ a Wərusalima ya, həji ma ndza a hayak ma dzamadzam watsa aagi tiwtiw, hak aa ghərəŋ ta, aa kazlap, aagi iŋgaya: «Shiŋ ala ma həna watsə ya?» aagiy. 11Ŋgaɓa həji aagi, zhin aa zhinatana aagi iŋgaya: «A ɗa Yesu, ala ma ɗaf ma ndə a zlimazə ara Bizlaf, ndə Nasaratu ma ndza a hayak Galili,» aagiy.
Yesu a jak kwakus Bizlaf
(Mrk 11.15-19; Luk 19.45-48; Yhw 2.13-16)
12A diwzha, Yesu tsaw a nda a jak kwakus Bizlaf. Dəba a agamha həji ma kaber səkən aagi abə ma kasəkəm səkən aagi aara aha bəza, təhsələm a dzəɓatana la ndza ta mbaɗ dala ta ka abə la ndza həji ma ber ꞌwanan aagi ka. 13Azha, zlap a zlapatana, iŋgaya: «A Ɗerewal ma ghwaɗeɗe: Bizlaf iŋgaya: Jak naka a aɗa jak ta tarha. Ama, ataa aŋkuni, bəw huni bəw bəza a ɗa bədəm ŋhil aagi,» iy.
14Həji wələf aagi abə həji ma gəyagəy ŋgas aagi kakərəɗha abəra Yesu a jak kwakus Bizlaf, azha tarehata bəza. 15Magulakwakw maɗal kwakus aagi abə masərək ma ma garagar aagi taghuɗek ta ata ndə aa kagəra shiŋ tsaɓan ndə a kaɗalata aagi abə wəla ndə wəzhi aa kadzə a jak kwakus Bizlaf, aagi iŋgaya: «Uzaana, sləf a Mbə ataa Dawda!» aagiy. 16Zlap aa zlapanə a Yesu, aagi iŋgaya: «Hwa kazlima ma ndə aa kazlap anawatsə azha vəw?» Yesu zhin a zhinzatana, iŋgaya: «Ayəw. Huni tava a yazə shiŋ zlap watsə a Ɗerewal ma ghwaɗeɗe aka wəra? Gwara ata ma wəzhi ma fashiɗ aagi abə wəzhi dənuk aagi, abə hwa alima həmən!» 17A diwzha tə, Yesu mbasl a mbaslata ka, azha tsaw a nda tə a bəza a hayak ma dzamadzam, tsaa kanda tə a Baytaniya, ata la ndə a nda a wan a tsutsa.
Yesu tagəyzə shikiɗ bəza
(Mrk 11.12-14)
18Apat a kwaf tə, ndə Yesu a kazhina tə bəza a hayak ma dzamadzam, mintish a kadzə. 19Gəra a gəra shikiɗ minja a ma təf, azha kərəɗ a kərəɗha abəra. Ama, tagəraɓa mbə a heɗe akas, vajiɗ gagagha ana ndə a gəra. Zlap a zlapanə a shikiɗ azha, iŋgaya: «Ara hwa alima mbə ata hwa kwa vepiy!» A tsutsa a tsutsa, hwap nduŋ shikiɗ a ŋhwal tə tiwtiw. 20Ndə aa gəra ana magəli tə aagi ya, ghərik ŋzliŋ a dzata ka. Dəba aagi aɗiwzə Yesu, aagi iŋgaya: «Shikiɗ watsə a sən a ŋhwal tə ŋgəra anawatsə anawatsə avaŋga?» aagiy. 21Yesu zhin a zhinatana, iŋgaya: «Sa zlapahuni, a ɗa ŋter, andza ɗal awa a kuni aka, andza huni kaŋga ŋkwaɓ akas, huni aɗal səkən ndə huni gəra ma ɗal ata shikiɗ watsə gagagha səku, ama kwa andza huni azlapanə a wəzəm watsə, huni iŋgaya: “Dəɗ kwa a bəza a ɗi, azha fak ha kwa a mtil watsə,” a aɗal andza sha,» iy. 22«Andza awa kuni aka, huni alima kala səkən ndə huni kaaɗiwi a tarha kuni,» iy.
Dagal Yesu a ndaha a vata?
(Mrk 11.27-33; Luk 20.1-8)
23Yesu tsaw a nda jak kwakus Bizlaf, dəba a asərəkatana səkən aagi a həji aagi, magulakwakw maɗal kwakus aagi abə magulakwakw ma ndza a hayak aagi, kərəɗ aa kərəɗha abəra, azha dəba aagi aɗiwzə, aagi kəsha iŋgaya: «Abə təf ma ndza a vata abə hwa kaɗal shiŋ səkən ma həna watsə aagi? Ma vəlahu dagal ta ɗal səkən tə azha vaya?» aagiy. 24Yesu zhin a zhinatana, iŋgaya: «Sa yəm, sa aɗiwzahuni, ma ŋtaguleŋ, andza huni tazhinaka bəza, azha, sa aghalahuni yəm, la ndaha dagal ndə sa kaɗal səkən watsə aagi abə sha. 25Ma zlənha Yahwana a ɗal batem vaya? Bizlaf vəw, aka səku həji aagi vəw?» Ama, dəba aagi adza səbakw a walaŋ ta, aagi iŋgaya: «Andza həji zhinanə: Bizlaf ma zlənazə,» həjiy, a azlapahəji: «Mbara huni ŋkalzə a ɗalanə awa a Yahwana veme?» iy. 26Ama, andza həji zlap: Həji aagi ma zlənazə, həjiy, ŋzliŋ a kadzahəji ara ŋgaɓa həji watsə aagi, ara ndə a ɗa, kwa vaye tambəl bəza a ha tə, Yahwana a ɗa ala ma ɗaf ma ndə a zlimazə ara Bizlaf. 27Azha, zhin aa zhinanə a Yesu, aagi iŋgaya: «Ni kasən səku,» aagiy. Sha tə yəm iŋgaya: «Ya kadək! Sa yəm, sa kaghalahuni abə dagal ma ndza a vatəy abə sa kaɗal shiŋ səkən watsə akas,» iy.
Maŋgəla ataa wəzhi ma gbak aagi
28Zhana, Yesu dəba a azlap, iŋgaya: «Deŋ kuni ata maŋgəla watsə avaŋga? Ala minja abə wəzhi gbak, tsaw a nda, dəba a azlapanə a mbə mampər, iŋgaya: “Mbə naka, nda ɗal zlən a la mpi akacihwa.” 29A zhinanə, iŋgaya: “Aŋghə, sa kaji səku,” iy. Ama, atama kajik, deŋ a deŋzə ŋkwaɓ ana mbə watsa, azha dəba a anda a damə a la. 30Tsaw vava a ndaha, a zlapanə ikwa zhana, a mbə minja. Aŋtə, iŋgaya: “Awa, vana, sa anda,” iy. Ama, tanda a damə a la akas. 31A taba wəzhi ma gbak watsə aagi ya, ma ɗal səkən ndə vava a kaɗiw vaya?» Zhin aa zhinanə, aagi iŋgaya: «Mampər,» aagiy. Yesu zhin a zhinatana, iŋgaya: «Sa zlapahuni, a ɗa ŋter: Həji ma tsak jamargwal abə wali ma karən tayah aagi, aagi aɗa mpər aha huni a la ndza bay Bizlaf. 32Ara ndə a ɗa, Yahwana ma ɗal batem taha ara huni a ghalahuni təf ma dəlili, azha huni taji ma təs. Ama, həji ma tsak jamargwal aagi abə wali ma karən tayah aagi taɗal awa. Ama, huni, huni ma gəra abə nja kuni aagi katkadək, kwa ara huni a deŋzə ŋkwaɓ a mbaɗ landza kuni bəza, aska a jinə ma tə,» iy.
Maŋgəla ata həji ma gamak ma ɗal zlən aagi
(Mrk 12.1-12; Luk 20.9-19)
33Azha, Yesu a zlap, iŋgaya: «Huni tehzə maŋgəla minja: Cina la minja aka, a kaŋgəɓ mpi ndə, həji kada mavə abə mbə tə ka, a la tə, her a her bəza dzəsl, ra a ra wəli ta ɗic mavə a mən. Taꞌunatana jak aka a həji ma həbar la aagi, pa a vəlatana ka ata ra a həji ma həbar la aagi, azha tsaa kanda tə a ciwirha gədək. 34Tiɗa ndə, həji aagi, aa kadzamha səkən ma ndza ata wəvə, zlən a zlənha həji ma ɗal zlən tə aagi ara həji ma həbar la tə aagi aska aagi ndaha lamazanə mavəy mbə mpi tə. 35Ama, həji ma ɗal zlən a la watsa aagi, kaw aa mbəlata, dəba aagi adzata, ŋtaguleŋ tarəgaɗaya mgbəŋ, minja tadzaya a mci, mamahkaɗ ta, aa dzə a mci abə ŋkəɗaŋ. 36Zhana, dəba cina la, a azlən həji ndiɓi aagi dəy aha mampər aagi, ama, dəba həji ma ɗal zlən a la watsa aagi asatana yaka andza ndə aa satana a həji mampər aagi. 37Kəɗaŋ tə ya, mbə tə ana ndə a zlənatana, a deŋ tə ya: “Aa kaahawanə a mbə naka,” iy. 38Ama, ndə aa gəra mbə tə, dəba aagi azlap, aagi iŋgaya: “Tsakwa ana ala ma kaaɓin a zəm jak! Huni ndaha, kiyzaŋkwa a dzə ka, azha həji tsa kaazəm jak tə,” aagiy. 39Kaw aa mbələ, jaɓ aa jaɓ a bəza gədək abəra la mpi, nda kpa aa dzə ka a mci.»
40Yesu ɗiw a ɗiwzata, iŋgaya: «Mbara azha, ndə cina la a kaandaha ya, a aɗalzə abə maɗal zlən a la mpi watsa aagi avaŋga?» iy. 41Zhin aa zhinanə, aagi iŋgaya: «A abazl həji badaway watsa aagi ka, azha tsa kaagasɓa həji ndiɓi aagi, aska a vəlatana la mpi watsa ka ata ra, ma kaadzamanə səkən ma ndza ata wəvə ata vah ndə a kamayə,» aagiy. 42Azha, Yesu zlap a zlapatana, iŋgaya: «Huni tava a yazə ma ma ndza a Ɗerewal ma ghwaɗeɗe aka wəra?
Ŋkəɗaŋ ndə maꞌun jak aagi, aa fak bəza,
tabəw tə a ŋkəɗaŋ ma paŋ.
A ɗa zlən ataa Bay Madagal.
Ama, aŋtakwa, a ɗa səkən tsaɓan ata nja takwa, iy.
43Sa kazlapahuni: La ndza bay Bizlaf, a aji tə a bəza ara huni, azha, a avəlatana a həji ma kaafəl mbə a heɗe aagi. 44Kwa ala vaye ma kaandəvha ata kəɗaŋ watsa, a aŋga tə, ama ala ndə ŋkəɗaŋ watsa a ndəvakənə, a hwahweɗ ka.»
45Ndə aa zlima maŋgəla Yesu watsa, magulakwakw maɗal kwakus aagi abə Farisa aagi tazlima bəza, Yesu a zlap ata təmta. 46Dəba aagi agas təf ta mbəla Yesu, ama ŋzliŋ tadzata bəza ara ŋgaɓa həji aagi, ara ndə aa kasənə, a ha ta, Yesu a ɗa ala ma ɗaf ma ndə zlimazə ara Bizlaf.
Айни замон обунашуда:
Mata 21: GOU
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in