Ioane 11
11
Ko te Oti o Lahalo
1Nae iei he tamāloa e igoa kia Lahalo nae nofo i Petania, na tauale. Ko Petania ko te kakai ia nae nonofo ai ia Malia ma tona uho ko Mafa. #Luk 10.38-39 2(Ko Malia tēnei na ia liligia nā lolo manogi ki nā vae o te Aliki ma holo ai i tona lāulu, he tuagane e o ia ia Lahalo, tēia na tauale.) #Ioa 12.3 3Na kave he faifekau a te uho tēnei kia Iehu e vē, “Te Aliki, ko tau uō e alofa koe ki ei, e tauale.”
4Kae i te lagonaga e Iehu o te mea tēnei, oi na vāgana vē atu ai, “Ko te tauale o Lahalo ka hē iku ki te oti. Hēai, ko te mea tēnei kua tupu kae ke maua ai he vīkiga mo te Atua, ma ke auala mai ai foki he vīkiga mo te Ataliki o te Atua.”
5Ko Iehu nae alofa kia Mafa ma tona uho, ma kia Lahalo. 6Kae i te ia lagonaga ko Lahalo nae tauale, na nofo lava i te mea nae iei ai, mo ni iētahi aho e lua. 7Oi na vāgana atu ai ia Iehu ki nā hoko o ia, “Tātou toe olo ki Iutea.”
8Na tali mai kilātou kia te ia, “Te Faiākoga, ko koe nei e hakili e nā tino Iutaia ke fetogi i nā fatu, ka ko koe e toe fia fano ki ei?”
9Na tali atu ia Iehu, “E hē lua hefulu fa nei ia itūlā o te aho? Ko nā tino e hāvavali i te ao teatea e hē tūinoino, auā e kilātou kitea te mālama o te lalolagi tēnei. 10Kae ko nā tino e hāvavali i te pō e tūinoino, auā ko te mālama e hē i loto o kilātou.” 11Na lea vēnā atu ia Iehu, ma na toe fakaopōpo atu ai vēia, “Ko te tātou uō ko Lahalo e moe, kae ko au ka fano oi fafagu.”
12Na tali mai ona hoko, “Te Aliki, kāfai ia Lahalo e moe, e hē mataloa kae toe mālohi.”
13Kae ko te uiga o te kupu a Iehu, ko Lahalo kua oti, kae na vēake kilātou, na lea ake ko Lahalo nae moe mālōlō. 14Oi na fakamanino ai e Iehu kia te kilātou, ma na lea vē atu ai, “Ko Lahalo kua oti; 15ma ko au e fiafia ko au nae hē iei ma ia, kae ke mafai ai koutou ke talitonu mai kia te au. Kae tātou olo loa kia Lahalo.”
16Na lea atu ai ia Toma (tēia na fakaigoa ko te Māhaga) ki iētahi o te kau hoko, “Tātou olo uma fakatahi ma te Faiākoga, kae ke feoti fakatahi kitātou ma ia.”
Ko Iehu te Toetū ma te Ola
17I te taunuku atuga o Iehu, na ia iloa ai kua kātoa te fa o aho, talu te tuku o te tino o Lahalo ki loto o te tugamau. 18Ko Petania nae tai lua maila te mamao ma Ieluhalema, 19ma nae tokalahi nā tino Iutaia na ōmamai oi fakamāfanafana kia Mafa ma Malia, ona ko te oti o te tuagane o kilāua.
20I te lagona atuga e Mafa ko Iehu kua hau, oi na fano ai kua fakafetaui atu ki ei, kae ko Malia na nofo lava i te fale. 21Na lea atu ai ia Mafa kia Iehu, “Te Aliki, moinei ake koe nae i kinei, ko toku tuagane e hēki oti! 22Kae e pa foki lava nei, e iloa e au ka fōki atu e te Atua kia te koe, ho he mea lava e gogō atu ai koe kia te ia.”
23“Ko te tuagane o koe ka toe fakatū ki te ola.” Na lea vēnā atu ia Iehu kia Mafa.
24“E iloa e au,” na tali mai ai ia Mafa, “ka toe fakatū ia ki te ola, i te aho mulimuli.”#11.24 aho mulimuli Kāfai e fakamahino e te Atua ia tagata uma
25Na vāgana atu ia Iehu kia te ia, “Ko au ko te toetū ma te ola. Ko nā tino e talitonu mai kia te au ka ola, e ui lava e oti; 26ma ko nā tino e ola ma talitonu mai kia te au, ka hē oti lele. E talitonu koe ki te mea tēnei?”
27“Io, te Aliki!” na tali mai ai ia Mafa. “Ko au e talitonu ko koe ko te Mehia, te Ataliki o te Atua, na tuku e hau ki te lalolagi.”
Kua Tagi ia Iehu
28Na lea vēnā atu ia Mafa, oi na toe liliu ai ki tona uho ko Malia, ma na lea mālie atu vē kia te ia, “Ko te Faiākoga kua i kinei, ma e fia kikila kia te koe.” 29I te lagona atuga e Malia o te mea tēnei, oi na tū vave ai loa ki luga kua fano oi fakafeiloaki kia Iehu. 30(Ko Iehu ko hēki pa ki te kakai, kae koi iei lava i te mea na fakafetaui ai e Mafa.) 31Ko nā tino Iutaia nae fakamāfanafana kia Malia i loto o te fale, kua mulimuli kia Malia i te taimi na kilātou kitea atu ai kua tū ki luga ma fano vave ki fafo. Na vēake kilātou ko Malia kua fano ki te tugamau oi tagi ai.
32Kua pa atu ia Malia ki te mea nae iei ia Iehu, ma i te ia kitea atuga o Iehu, oi na fakapakū ai ki lalo ki tafa o ona vae ma na lea vē atu ai ki ei, “Te Aliki, ānei ake koe nae i kinei, ko toku tuagane e hēki oti.”
33I te kitea atuga e Iehu ko Malia nae tagi, ma ko nā tino Iutaia foki nae i kinā ma ia nae faitatagi, oi na tīgā lele ai tona loto, ma kua tumu i te fakanoanoa lahi. 34Oi na fehili vē atu ai ia Iehu, “Ko fea te kua tanu ai e koutou ia Lahalo?”
Na tali mai kilātou, “Te Aliki, hau oi kikila.”
35Oi na tagi ai ia Iehu. 36Ma na lea vē ai nā tino Iutaia, “Kikila ki te lahi lele o te alofa o Iehu kia Lahalo!”
37Kae ko iētahi tino na lea vē, “Na fakapupula e ia nā mata o te tāuaho. Heā la te hēki ia mafaia ai oi puipui ia Lahalo ke nahe oti?”
Kua toe Fakatū ia Lahalo ki te Ola
38Na toe lagona e Iehu te loto tīgā lahi, ma na fano ai ki te tugamau; ko te tugamau ko he ana, ma nae iei he fatu ke tapuni ai te faitotoka. 39Ma na fakatonu vēnei atu ai kilātou e Iehu, “Kave kehe te fatu!”
Kae na tali mai ia Mafa, te tuafafine o te tamāloa kua oti, “Te Aliki, kua kātoa nei te fa o aho talu te tanu, ma kua manogi kino.”
40Oi na lea atu ai ia Iehu kia Mafa, “E hēki lea atu nei au e mafai ke kitea e koe te mamalu o te Atua, kāfai koe e talitonu?” 41Oi na kave kehe ai e kilātou te fatu. Na kikila ake ai ia Iehu ki te lagi ma lea vē, “Te Tamana, ko au e fakafetai atu kia te koe, auā kua kē lagona mai au. 42E iloa e au e kē lagona mai au i taimi uma. Kae ko au kua lea vēnei atu mo nā tino iēnei i kinei, ke mafai ai kilātou ke talitonu, ko au na kē uga maia.” 43Na lea vēnā atu ia, oi na kalaga leo lahi ai vē, “Lahalo, hau ki fafo!” 44Na hau ai ki fafo ia Lahalo, ko ona vae ma ona lima nae fuhi i ni kie, ma ona mata nae pulupulu i he kie. Oi na vāgana atu ai ia Iehu kia te kilātou “Tatala kehe nā kie, oi tuku ai ke fano.”
Kua Lama ia Iehu ke Tāmate
(Mat 26.1-5; Mlk 14.1-2; Luk 22.1-2)
45E tokalahi nā tino Iutaia na ōmamai oi āhi ia Malia, na kilātou kitea te mea na fai e Iehu, ma na talitonu ai kilātou kia te ia. 46Kae ko iētahi o kilātou na olo ki te kau Falehaio, oi taku ki ei nā mea na fai e Iehu. 47Oi na fono ai te kau Falehaio ma nā ohitāulaga pule fakatahi ma te Taupulega, ma na lea vē ai kilātou, “Heā ta kitātou ka fai? Kikila ki te lahi o nā fakailoga kua fai e te tagata tēnei! 48Kāfai ka fakataga e kitātou te tagata tēnei ke fai pea ana mea iēnei, ko nā tino uma lele ka talitonu kia te ia, ma ka fakahaga mai ai te mālō o Loma oi fakakino to tātou Mālumalu, vēnā ma to tātou mālō!”
49Ko tētahi o kilātou, ko Kaiafa tona igoa, ko ia te nae Ulu Ohitāulaga i te tauhaga tēnā, na lea vē ia, “Kai koutou te vālelea ātili! 50E hē koutou iloa e hili lele atu mo koutou te oti o he tino e fokotahi mo nā tino uma, i lo te fakatāugā o te mālō kātoa?” 51Ko te meamoni, e hē mai ia te ia lava nā kupu iēnei; kae ona ko ia ko te Ulu Ohitāulaga i te tauhaga tēnā, na vavalo ai e ia, ko Iehu e oti mo nā tino Iutaia, 52ma e hē mo nā tino Iutaia oioti, kae ka vēnā foki ona fakamāopōpo e ia nā tino uma o te Atua e takape i atunuku kehekehe, ke kavea e vē ko he tino e tahi.
53Na kāmata mai i te aho tēnā, oi lama ia Iehu e nā takitaki Iutaia ke tāmate. 54Ko te ala ia na hēki toe feoaki ai ia Iehu i nā mea nae kitea ai ia e nā tino Iutaia, kae kua fano ki he mea nae pili ki te togāvao, ki te kakai nae igoa ko Efalaima, ma na nonofo ai i kinā ma ona hoko.
55Kua tafapili ki te taimi o te Kaiga Fakamanatu o te Pāheka, ma na tokalahi nā tino na ōatu mai nā nuku i tua ki Ieluhalema, ke fakatāunuku nā mea e tatau ke fai ke mamā ai kilātou i nā tu tau tāpuakiga, ka ko hēki kāmata te Pāheka. 56Nae kilātou hakilia ia Iehu, ma i te māopōpoga o kilātou i te Mālumalu, oi na taufai fehili atu ai tētahi ki tētahi, “Heā tō manatu? E i na ka hē hau nei ia ki te Pāheka?” 57Oi na fai ai te fakatonuga a nā ohitāulaga pule ma te kau Falehaio, ho he tino e ia iloa te mea e iei ai ia Iehu, e tatau ke fakailoa ake, kae ke mafai ai e kilātou oi puke.
Айни замон обунашуда:
Ioane 11: TOKU
Лаҳзаҳои махсус
Нусха
Муқоиса
Паҳн кунед
Want to have your highlights saved across all your devices? Sign up or sign in
Bible Society New Zealand Charitable Trust