Ioane 10
10
Ko te Talafakatuha o te Leoleomāmoe
1Na vāgana atu ia Iehu, “E takutino atu e au kia te koutou te meamoni: ko te tino e hē ulu i te faitotoka ki loto o te lōtoā o nā māmoe, kae kake ki loto kui i hētahi auala, ko he tino kaihohoa ma fāomea tēnā. 2Ko te tino e ulu ki loto kui i te faitotoka, ko ia tēnā ko te leoleomāmoe o nā māmoe. 3E tatala kia te ia te faitotoka e te leoleo faitotoka, ma e lagona e nā māmoe tona leo. E kalaga ki ana māmoe i o lātou igoa, ma e ia takitakia kilātou ki fafo. 4Kāfai e kave e ia nā māmoe ki fafo, e fano ki mua o kilātou, oi mulimuli ai kilātou kia te ia auā e kilātou matea tona leo. 5Ka hē mulimuli kilātou ki hētahi tino; kae ka fetutuli kehe kilātou mai he tino vēnā, auā e hē kilātou matea tona leo.”
6Na fai e Iehu te talafakatuha tēnei kia te kilātou, kae na hēki mālamalama kilātou pe heā tona uiga.
Ko Iehu te Leoleomāmoe Lelei
7Oi na toe vāgana atu ai ia Iehu, “E takutino atu e au kia te koutou te meamoni: ko au ko te faitotoka mo nā māmoe. 8Ko iētahi tino uma lele na muamua mai ia te au, ni tino kaihohoa ma ni tino fāomea, kae e hēki fakalogo ki ei nā māmoe. 9Ko au ko te faitotoka. Ko nā tino e kui mai ia te au, ka fakaola; ka ōmamai ki loto ma olo ki fafo, ma kilātou maua te vao lelei. 10Ko te tino kaihohoa e hau oioti ke kaihohoa, ke tāmate ma ke fakatāugā. Ko au na hau kae ke maua ai e kilātou te ola—te ola e kātoatoa i mea uma.
11“Ko au ko te leoleomāmoe lelei. Ko te leoleomāmoe lelei e ofo atu e ia tona ola, mo ana māmoe. 12Ko te tino faigāluega totogi kae e hē ko he leoleomāmoe, ma e hē ā ia nā māmoe, e vili kehe kae tīaki nā māmoe kāfai e ia kitea he luko; oi ohofaki ai e te luko nā māmoe ma fakatākapekape ai kilātou. 13E vili kehe te tino faigāluega totogi, auā ko ia e nā ko he tino faigāluega totogi, ma e hēai hona popole ki nā māmoe. 14Ko au ko te leoleomāmoe lelei. E vē ona iloa au e te Tamana ma iloa e au te Tamana, 15e vēnā foki ona iloa e au aku māmoe, ma kilātou iloa au. Ma e ofo atu e au toku ola, mo kilātou. #Mat 11.27; Luk 10.22 16E iei iētahi aku māmoe e hē i loto o te lōtoā tēnei. E tatau ke kō kaumaia foki kilātou, ma ka uhitaki kilātou ki toku leo. Oi ka fokotahi ai te lafumāmoe, ma fokotahi te leoleomāmoe.
17“Ko te Tamana e alofa mai kia te au, ona e ofo atu e au toku ola, kae ke toe maua ai e au. 18E hēai he tino e ia kave kehea toku ola mai ia te au, kae e kō ofo atua i toku loto malie. E ia te au te pule ke ofo atu ai toku ola, ma e ia te au foki te pule e toe kaumai ai. Ko te mea tēnei kua fakatonu mai e toku Tamana ke kō faia.”
19Ma na toe fekehekehe ai foki nā tino Iutaia, ona ko nā kupu iēnei. 20E tokalahi kilātou na lea vē, “Ko te tagata tēnei e ulufia e he tēmoni! E hē lelei te māfaufau. Heā la te fakalogo tauānoa ai koutou ki ei?”
21Kae ko iētahi na lea vē, “E hē ni kupu iēnei e tautala ai he tino e ulufia e he tēmoni! E mafai vēhea e he tino e ulufia e he tēmoni, oi toe fakapupula nā mata o nā tino tāuaho?”
Kua Teteke ia Tagata kia Iehu
22Kua pa ki te tau mālūlū, te taimi e fakamanatu ai i Ieluhalema te Fakapaiaga o te Mālumalu. 23Ko Iehu nae havalivali i loto o te poletito e takua ko te Poletito o Holomona i loto o te Mālumalu, 24kae kua ōmamai nā tino Iutaia kua fakapotopoto fakatakamilo ia te ia ma na fehili vē mai ai ki ei, “Heā te mataloa ka mumuni ai pea e koe te meamoni mai ia te kimātou? Kāfai ko koe ko te Mehia, taku hako mai la kia te kimātou!”
25Na tali atu ia Iehu, “Kua uma toku lea atu kia te koutou, ka ko koutou e hē fia talitonu mai kia te au. Ko nā gāluega e kō faia i te igoa o toku Tamana, e molimau kia te au; 26kae ko koutou e hē talitonu, auā ko koutou e hē ni māmoe e āku. 27E lagona e aku māmoe toku leo, ma e iloa e au kilātou, ma e mulimuli mai kilātou kia te au. 28E fōki e au kia te kilātou te ola e fakavavau, ma ka hē oti lele kilātou. E hē mafai e he tino oi hamu kehe atu kilātou mai taku tauhiga. 29Ko te mea kua fōki mai e toku Tamana kia te au, e hili lele atu ia i lo hētahi mea,#10.29 Ko te mea… lo hētahi mea ko iētahi tuhituhiga e lea mai Ko toku Tamana, tē na ia fōki maia kilātou kia te au, e hili lele atu ia ma e hē mafai ke hamu kehe e he tino mai te tauhiga a te Tamana. 30Ko te Tamana ma au, e tahi kimāua.”
31Oi na toe tago ai nā tino Iutaia ki ni fatu ka fetogi ai ia Iehu. 32Na vāgana atu ai ia Iehu kia te kilātou, “Kua fakailoa atu e au kia te koutou te lahi o nā gāluega lelei na tuku mai e te Tamana kia te au ke fai; tēfea la te gāluega o nā gāluega iēnei, e fofou koutou ke fetogi ai au?”
33Na tali mai nā tino Iutaia, “Ko kimātou e hē fofou ke fetogi koe ona ni gāluega lelei e a koe e fai, kae ona ko koe e fāifai ki te Atua. Ko koe e nā ko he tagata, kae e taumafai koe ke fai koe ma Atua.” #Lev 24.16
34Oi na tali atu ai ia Iehu, “E tūhia i nā Tūlāfono a koutou ko te Atua na vāgana vē, ‘Ko koutou ni atua.’ #Hal 82.6 35E iloa e kitātou ko te mea e lea mai ai te tuhituhiga paia e hē mafai ke toe huia; ma na tākua e te Atua nā tino na kaumaia tana kupu, ni atua. 36Kae vē la kia te au, ko te Tamana lava ia te na ia filifilia au, ma na ia uga maia au ki te lalolagi. E vēhea la ona lea koutou ko au e fāifai ki te Atua ona ko au na lea atu, ‘Ko au ko te Ataliki o te Atua?’ 37Kāfai e hē faia e au nā mea e fai e toku Tamana, ia koutou la nahe talitonu mai kia te au. 38Kae kāfai e fai e au nā mea iēnei, e ui lava ko koutou e hē talitonu mai kia te au, kae e tatau lava koutou ke talitonu ki nā gāluega e fai e au, kae ke koutou iloa ai ma te mautinoa, ko te Tamana e ia te au, ma ko au e i te Tamana.”
39Oi na toe taumafai ai foki kilātou ke puke ia Iehu, kae na hola kehe ia mai ia te kilātou.
40Ma na toe fano ai ia Iehu ki tētahi itū o te Vaitafe ko te Iolitana, ki te mea nae fai ai te papatihoga a Ioane, ma na nofo ai i kinā. #Ioa 1.28 41E tokalahi nā tino na ōmamai kia te ia, ma nae lea vē kilātou, “E hēki faia e Ioane ni fakailoga, kae ko nā mea uma lele na lea mai ai e uiga ki te tino tēnei, e hako lava.” 42E tokalahi foki kilātou nae i kinā, na talitonu kia te ia.
Айни замон обунашуда:
Ioane 10: TOKU
Лаҳзаҳои махсус
Нусха
Муқоиса
Паҳн кунед
Want to have your highlights saved across all your devices? Sign up or sign in
Bible Society New Zealand Charitable Trust