Mateo 20
20
Tumpëttëjjk y'ijxpäjjt
1Najj'ämpy jä' Yës Teety kyuttujjkë'n jyäty naa'xkë'n tu'uk kukkam, mati' ttsoo'jn najyokyë namyöny munsë ijxtääpyë. 2Jäts ttamëëtkäjpxy'ajjty tumpëttëjjk nii'xyë'n tmuju'yty tu'kxëëw, nits tpakkejjxy tumpë kyamjötypy. 3Nits tsyoo'nkojmë taxtujjkyaxp, nits jaa'y tjakpaajty maay'äjpy pënjäty tyunk ka'ijt'të'p. 4Nits tnëëjmjaay: “Nëjkx mtuntë ëjts nkamjötypy, nmuju'ypy ëjts miits yëkxon.” Nits jä' jaa'y nyëjkxtë. 5Ninyaj kujkxyëëw, jäts tuwëëkyaxp tumpë tpakkäjx'atëëjtsy. 6Jatu'kyaajjë nyëjkxkojmë muwoxkyaxp maay'äjpy, jäjpts jaa'y tjakpaajty pën kattunkpat'të'p. Nits tnëëjmjaay: “¿Tikëjx miits yaj mxunaxtë kä' mtuntë?” 7Jäts jä' jaa'y y'atsootë: "Nippën ëëts xkattunkmo'oy." Nits kukkam tnëëjmjaay jä' jaa'y: “Nëjkx mëët miits mtuntë ëjts nkamjötypy.”
8Kuts it kyoots'eenyë nits kukkam tnëëjmjaay tyumpë niwintsën: “Yaajxë tumpëttëjjk, nits xmujuykyë'xt, jä' jawyiin mmuju'ypy pënjäty tëj tyuntëkkëtë tsuujnë'm, ix'oojk xmuju'yty pënjäty tëj tyuntëkkëtë jokyë.” 9Nits tumpëttëjjk yo'oymyujkkëjxtë nits yëkmujuy'axajjtë pënjäty tuntëjjk'eetyë tsuujnë'm muwoxkyaxp jäts nitukkë'yë yyëkmujuytyë pu'uky tu'kxëëw nittüny. 10Kuts pyaajtëtë pënjäty tuntëjjk'eetyë jokyë, jawäänë këjx'am jä' y'ijjty jyuu'ny t'a'ijxëtë, ninyajjts jä' mëët yyëkmujujtyë tu'kxëëw nittüny. 11Kuts najj yyëkmujuytyë nits kukkam twintso'y'axajjtë, 12jäts tnëëjmjäätyë: “Tu'k'oorë jä'yë tëj tyuntë pënjäty tëj ix'oojk jya'at'të, jäts ninyaj tëj xmujuy naa'xkë'n ëëts, tëts ëëts xunäxy nxëëwni'äny nxëëwnittoy.” 13Nits kukkam t'atsoowimpijjty jä' jaa'y: "Muku'uk, kä' ëjts tij ka'oy ntüny. ¿Kanaa'pts tëj nkäjpxy'ëëyë'n jäts nii'xyë'n ëjts mijts nmuju'yty tu'kxëëw? 14Pakkon yë' mmeeny jäts nëjkxnë. Wä'n ëjts jaa'y tmujuy pënjäty tëj tyuntëkkëtë tsuujnë'm pën nii'xyë'n ëjts nmujuywya'any, 15ëjts yë' nmeeny, wä'n ëjts yë' tyëktüny pëntij ëjts yë' nyëkwa'anwa'any. ¿Ok xtamu'ampëkwantë'p ëjts ku ëjts n'oyjyaa'yë?"
16Najjts pënjäty ixyam jawyiin'eetyë'p jä'äts wyä'në ijx'oojk'eenyë'p, pënjätyts ixyam ijx'oojk'eetyë'p jä'äts wyä'në tuwëjknëtë'p.
Jesús tnikkäjpxy mutuwëëkyaajjë y'oo'jkë'n
(Mr 10.32-34; Lc 18.31-34)
17Ku Jesús y'ijjty nyijkxy Jerusalén nits tuu'aajy tjë'waay nimajkmäjtsk y'ixpëjkpëttëjjk jäts tnëëjmjaay:
18—M'ijxtë'p mnijaa'w'eetyë'p miits jäts Jerusalén nnijkxyë'n, jämts naxwiinë'tjaa'y y'Uu'nk yyëkkë'yakt, teety nyiwintsëntëjjk mëët pawaa'n yëk'ixpëjkpëttëjjk kyë'jë'm, jä'äts yyëk'ookë'p 19jäts mëët tkë'mo'otë't mimpë jaa'y jä'äts tnixi'iktë'p ttaxi'iktë'p, twoptë'p tkoxtë'p, nits tyëkkruspät'të't; kyutuwëëkxëëwts jatu'kyaajjë jyükypyëkt.
Jesús t'atsoowimpity Santiago mëët Juan tyaak
(Mr 10.35-45)
20Nits Zebedeo tyo'oxytyëjjk mëët nimäjtsk myajjnk t'anëjkx'eetyë Jesús, jäts nyakyujxtänëtyaajkë wyinkujjky nits may'ajjt t'amatooy. 21Nits Jesús nyëë'mxë:
—¿Tij mtsöjkypy?
Jäts jä' to'oxytyëjjk wyaany:
—Yëknikuttukkë jäts ëjts tu'uk nmajjnk tsyëënë't m'akaa'nytsyow jatu'uk m'anajjytsyow mijts mkuttujktaajk'am.
22Nits Jesús y'atsooy:
—Kä' miits xnijawë puttij m'amatootë'p. ¿M'uuktë'p miits ta'am nëëj mati' ëjts n'uukwämpy?
Nits jä' y'atsootë:
—N'uukp ëëts jä'
23Nits Jesús nyëë'mxëtë:
—Tëyë'm m'uuktëpë'm jä', kä'äts ëjts xpaatë nyëknikuttukkë't pën tsëënë'p tu'm'aajny jatu'm'aajny, nTeety'ajjt tsajpjotmë't jä' tmo'op pënjäty tëj jyä' tyëkni'oy'ajjtë. 24Kuts janimajjk ixpëjkpëttëjjk najj tmatootë nits tmu'ampëjktë Santiago mëët Juan. 25Nits Jesús tyaajxjaay y'ixpëjkpëttëjjk jäts tnëëjmjaay:
—Tëj miits x'ijxtë ntsoj yëkkuttujkpëttëjjk yyëkkuttuktë, tyuntë'p kajjp pëntsoj tsoktë, jäts pën kumuun yëkkuttujkptë'p jä'äts tsyojjkë'n jaa'y ttuntë'p tpawantë'p. 26Kä'äts miits jyeexyë najj m'atë'ëtstë. Pënpën niwintsën nnatsyojjkë'p wä'n jä' jawyiin nitukkë'yë myuku'uktëjjk tmuttüny; 27jäts pënpën nimëjj nnatsyojjkë'p, jawyiin jä' pawa'any y'itt. 28Jä'ku kä' tëj naxwiinë'tjaa'y y'Uu'nk myiny yëkkuttujkpë, muttumpë jä' tëj myiny, jäts jyüky'ajjt paat tnajts'ijxë't najjts tyëknitso'okt nimaynyäxy jaa'y.
Jesús tyëktso'oky nimäjtsk wimpiits jaa'y
(Mr 10.46-52; Lc 18.35-43)
29Ku tsyoo'ntë Jericó, nimay Jesús jaa'y pyatsoo'jnë. 30Nits tpat'të nimäjtsk wimpiits jaa'y tuu'paa'aajy tsyëënëtë, kuts jä jaa'y tnijaa'w'eetyë jäts Jesús najxp, nits jätyë kyajpxkäktë:
—¡Wintsën, David tsyaan kyoo, pa'ayook ëëts!
31Nits jaa'y jya'ojj'axajjëtë jäts y'amo'ntë't, kä'äts jä' y'amontë oo'ktëy jä' jawäänë mëjk wyan'atë'ëtstë:
—¡Wintsën, David tsyaan kyoo, pa'ayook ëëts!
32Nits Jesús wya'ktaany, nits twaatsooy wä'n nimäjtsk wimpiits jaa'y jäts tyëktëëy:
—¿Tij mtsojktë'p, ntsoj ëjts miits y'ijxë nputtëkkë't?
33Nits jä' jaa'y y'atsootë:
—Wintsën, ja'ijxwamp ëëts jatu'kyaajjë.
34Nits Jesús tpa'ayooy jä' jaa'ytyë, jäts wyiin tjaa'jxjaay. Nits jätyë wyin'ijxwa'kxtë, najjts Jesús tpanëjkxtë.
Айни замон обунашуда:
Mateo 20: YTYA
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
Porciones en Mixe de Yalalag, Oaxaca, México © Sociedad Bíblica de México, A.C.