Mateo 19
19
Jesús tkajpxtëy ku jaa'y nyajyaywyä'kxyëtë
(Mr 10.1-12; Lc 16.18)
1Ku Jesús najj kya'amaykyëjjxy, nits tsyoo'jny Galilea jäts nyijkxy Judea y'itjotm Jordánkë't në'awinm. 2Nimayts jaa'y pyanëjkxë, jämts tyëktsoojky pa'amjaa'y.
3Nits ni'ey fariseostëjjk twinkunëjkx'eetyë Jesús jäts nikoj tyëkkajpxpitsëmwa'antë, jakëjxts tnëëjmjäätyë:
—¿Oy yaa'ytyëjjk tmëëtnawya'kxë't tyo'oxytyëjjk pëntij tsip pëntij ayuujk jyakyäjptë'p?
4Nits Jesús y'atsoojjëtë:
—¿Kä'änë'mts miits nöky xwin'ijxtë maj jäjp yä'äny, pën yë' pëëjmëtë kojjëtë ku it naxwiin tsyoo'ntaajky, “yaa'ytyëjjk to'oxytyëjjk yë' yyëkkojjtë”? 5Nits wyaany: “Jakëjxts yaa'ytyëjjk tyeety tyaak tpuwa'kwa'atst jäts tyo'oxytyëjjk tmëëtxajjmukt, jäts tu'ukyë jyëën tyëjjk ttsoo'nta'aktë't” 6Kä'äts jä' y'oknimäjtsk'eenyë'të, tu'ukyë jyat'të't. Najjts kä' naxwiinë'tjaa'y kuttujjk tjakyepy jäts tnakwya'kxë't mati' tëj Yës Teety tyëktu'ukmüky.
7Nits fariseostëjjk tjakyëktëëtë:
—¿Tikëjxts Moisés pawaa'n tyëktaany jäts nöky jä'yë kojjp najjts to'oxytyëjjk y yëkpakkäjxnë't?
8Nits Jesús nyëë'mxëtë:
—Jakëjx Moisés tyëknikuttujjk'ëëy jäts yaa'ytyëjjk tyo'oxytyëjjk tmëëtnajyaywya'kxë't, ku miits mkamatowtë jäts kë'm mkuttujjk xyëktuntë; kä'äts jä najj pyemyë kyoojyë ku yë' tsyoo'ntaajky. 9Ëjts ixyam wamp, yaa'ytyëjjk pën tyo'oxytyëjjk tmëëtnawya'kxë'p oyë'm pën wiijnk yaa'ytyëjjk tjakamëëtë, nits jatu'uk to'oxytyëjjk tpëjkojmë, pökytyunë'pts jä'.
10Nits y'ixpëjkpëttëjjk nyëë'mxë:
—Pënnaj tsyipë amäjtsk'ajjtë'n, oy'eepy jä' jyeexyë jäts nippën kya'amäjtskë't.
11Nits Jesús y'atsooy:
—Kä' yë' nitukkë'yë jaa'y najj twinjawëtë, Jä' yë' jä'yë twinjaa'w'eetyë'p pën Yës Teety najj tëj pyemyë kyexyë. 12Jäj may jëëjp tikëjx yaa'ytyëjjk kyatto'oxypyëkktë: Jäm pën naa'm kä'xtë'p ja'atë'p yaj naxwiiny, jämts pën najj jaa'y tuujnë'p, jämts pën najj jüky'eetyë'p Yës Teety kyuttujjkë'n këjxm. Pënpën ya'at ayuujk t'ijxp tmatoop, wä'n twinjawë yëkxon.
Jesús tkunüü'kxy una'ajnktëjjk
(Mr 10.13-16; Lc 18.15-17)
13Nits jaa'y tta'anëjkx'eetyë Jesús una'ajnktëjjk jäts tkë'nixajjt najjts tkunuu'kxta'akt; nits Jesús y'ixpëjkpëttëjjk tkajpxtso'ytyë jaa'y pënjäty y'ijjty y'uu'nktëjjk tta'anëjkx'eetyë'p Jesús. 14Nits Jesús wyaany:
—Majtstu'ut'të, wä'n ëjts una'ajnktëjjk xnimintë, katij x'akkajpxtuktë, jä'ku yë' yë' jyä'ätë Yës Teety kyuttujjkë'n.
15Kuts Jesús una'ajnktëjjk tkunuu'kxtak'awaajt'ëëy, nits jäjp tsyoo'në.
Tu'uk kumeeny wajjtyëjjk tmëëtnakyäjpxyë Jesús
(Mr 10.17-31; Lc 18.18-30)
16Nits tu'uk wajjtyëjjk t'anëjkx'ëëy Jesús jäts tyëktëëy:
—Wintsën, ¿tij y'oy'ajjtpë ëjts ntu'mp jäts ëjts npaatt jüky'ajjt mati' xëmëkkëjxm?
17Nits Jesús y'atsoojjë:
—¿Tikku ëjts xyëktëy mati' oy? Tu'ukë'm jäj y'oywyë. Pën ku xtsöky jüky'ajjt xpaatwa'any, mmumatow tukkë'yë pawaa'n.
18—Nits jä' wajjtyëjjk tyëktëëy —¿Mati' pawaa'n?
Jäts Jesús y'atsooy:
—Katij myëkjaa'y'ooky, katij wiijnk to'oxytyëjjk xmëëtë, katij mmeetsy, katij nikoj jaa'y xniwampety, 19wintsë'ëkkë mteety mtaak, tsok mmuku'uktëjjk naa'xkë'n kë'm mnatsyökyë.
20Nits jä' wajjtyëjjk y'atsooy: —Nkuytyümpy ëjts yë' tukkë'yë, —¿Tijjätyts ëjts xka'ijjtjääpy?
21Nits Jesús y'atsooy:
—Pën yëkxon tukkë'yë xtunwa'any, nëjkx, too'këx tukkë'yë tijjäty mmëët'eepy jäts moykyëx mmeeny ayoopëttëjjk. Najjts xpaatt mëjk'ajjt mati' jäm tsajpjotm. Nits mwimpitt jäts ëjts xpattuu'yo'oyty.
22Ku najj jä' wajjtyëjjk tmatooy, tsätsywyinmaypy nyëjkxnë jä'ku kumeenyäxy jä' y'ijjty.
23Nits Jesús tnëëjmjaay y'ixpëjkpëttëjjk:
—Ixyam ëjts nnikkäjpxy, tsipnäxy kumeeny jaa'y jyajjtxë't tyëkkë't Yës Teety kyuttujktaajk'am. 24Naxp oo'ktëy jätyë kamellë winmutsk'akkajj'aajy, kä' jä' najj kumeeny jaa'y jya'att Yës Teety kyuttujktaajk'am.
25Ku y'ixpëjkpëttëjjk najj tmatootë attëy'ajat ttattantë, jäts wyantë:
—¿Pënts nitso'oktë'p?
26Nits Jesús wyin'ijxëtë jäts nyëë'mxëtë:
—Mati' naxwiinë'tjaa'y kamaajyë'p, Yës Teety jä' maykyëjjxë'p.
27Nits Pedro wyaany
—Tëj ëëts tukkë'yë nmaay npëjkta'aky nnikkäkkexy ku ëëts mijts npattuu'yo'oy. ¿Tits ëëts nyëkmo'op?
28Nits Jesús t'atsooy:
—Ixyam ëjts nwa'any, pyaatp xëëw maj tukkë'yë y'anamëkyë'xt, ku naxwiinë'tjaa'y y'Uu'nk tsyëënë'y'ixta'akt mëjjkuttujktaajk'am, jäts miits pënjätyts ëjts tëj xtëyjawëtë, mëët miits myëkmo'otë't mtsëënëpyäjjt nits xtëytyu'ntë't wä'nnimajkmäjtsk Israel y'uu'nktëjjk mëët mëët kyajjp. 29Jäts pënjäty ëjts këjxm tëj tnikkä'äktë tyëjjk, kyam, y'ajjtsy, tsyë', y'ütsy, tyeety, tyaak ok y'uu'nktëjjk, mukkö'pxy'amts jä' yëkmoynyë'të't nits mëët yëkmo'otë't xëmëkkëjxm jüky'ajjt. 30Jäts pënjäty ixyam tuwëjktë'p jä'äts wyä'në ijx'oojk'eenyëtë'p jäts pën ixyam ijx'oojk'eetyë'p jä'äts wyä'në tuwëjknëtë'p.
Айни замон обунашуда:
Mateo 19: YTYA
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
Porciones en Mixe de Yalalag, Oaxaca, México © Sociedad Bíblica de México, A.C.