Maika 2
2
Uduak Awo ye Uduak Abasi
1Adọdiọọk anọ mbon e-eduakka idiọọkñkpọ,
anọ mbon e-enaaha ke ikʌk ammọ eduak idiọọkñkpọ!
Ayio amaasiere, ammọ eben esịn ke adinam,
sia ammọ e-enie ukeme adinam ntoro.
2Ammọ esịn anyen ke mme inwañ enyʌñ edat enie,
ye ke mme ufọk, enyʌñ edat.
Ebọ mbon awo ufọk ammọ ke ñwo,
eyịp udeeme mbon awo.
3Ke ntoro, Abọọñ abo:
“Ami nsʌk nduak afanekọñ nnọ ibon ami,
a-adooho ndufo idiikanna ifak idem ndufo isio.
Ndufo idiikanna isaña aba asian-asian,
sia adiido ini nnananyen.
4Ke usen ado mbon awo eyainọ ndufo ñnyọọ;
ammọ eyaenyʌñ isoon ndufo ye ikwọ mfʌhọ ami ete:
‘Ñnyịn imitak ataa afịd-afịd;
e-ebakka udeeme mbon mmi.
Anye ambọ miin!
Anye a-aben mme inwañ ñnyịn anọ mbon i-itappa ñnyịn.’ ”
5Ke ntoro ndufo idiinieghe awo ndomokeed ke mbono Abọọñ
a-adiisịn ukañ ideeme isọñ ado.
Mme Prọfed Abiaña
6Mme prọfed ammọ ete, “Kuutañ ñkukịd,
kuutañ ñkukịd ubaña mme ñkpọ ami;
ñnyịn idiidiaha asuenne.”
7Ndufo mme ubon Yekọb, me ekpa ebo,
“Abọọñ inieghe ime?
Anye akpaanam mme utọ ñkpọ ado?”
“Ado nte ikọ mmi inamma ufọn
inọ awo u-usʌñ amọ adooho nnen-nnen?
8Ke mmi-mmi, mbon mmi e-edaaña eda
nte mbon usua.
Ndufo emesịññe mme nsọñudua afọñ
ke idem mbon e-esañake eboiyo, ndin idọññọ anyen,
nte ideen e-enyọñọke ekọñ.
9Ndufo emebịne ibaan mbon mmi
esịññe ke nti ufọk ammọ.
Ndufo emeben adidiọñ mmi
ekpọñ nditọ ammọ ke nsi-nsi.
10Idaaña ida, ikaiya!
Sia idooho itie nduọkadudu ndufo ado ami,
sia e-esappa anye,
e-esobo anye, ibaaha naña ekan enyaaña aba.
11Adieke asʌhọ nsu ye awo abiaña adiighe adibo,
‘Ami ñyaakịt ñkukịd uwak ukọd ye bie unọ fiin,’
utọ prọfed ado ke ibon ami eyem!
Enwọñọ Adinyaaña
12“Yekọb, ke akpanikọ ami ñyaikoono ndufo mbok;
ke akpanikọ ñyaatañ nsʌhọ Isrel mbok.
Ñyaakoono ammọ mbok itie keed nte mme edọñ ke ufọkedọñ,
nte udịmedọñ ke itie ndidia amọ;
itie ado adiiyọhọ ye mme awo.
13Andisiak usʌñ ayaadat ammọ usʌñ;
ammọ eyaesiak akọ ewuọñọ.
Adidem ammọ ayaato aboiyo mbemiso ammọ,
Abọọñ ado adaiwuod ammọ.”
Айни замон обунашуда:
Maika 2: ICB
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
Adisana Ñwed Abasi ke Ikọ Ibibio Ayio Mfịn™
© 2020, 2025 Biblica, Inc.
Enam ke emaekebọ Unyịmme. Emʌm afịd unen ekama ke afịd ederimbod.
Ibibio Contemporary Bible™
Copyright © 2020, 2025 by Biblica, Inc.
Used with permission. All rights reserved worldwide.