Maika 1
1
1Ikọ Abọọñ a-akesịmme Maika awo Moresed ke ini ukara Yọtam, Ahas ye Hesikaiya, mme ndidem Yuda, ñkukịd a-anye akekịtte abaña Sameria ye Yeruselem ado ami:
2Ikop, ndufo mbon awo, afịd ndufo,
ikpañ utọñ, isọñ ye afịd se idʌñ ke esịd,
nọ Abọọñ Andikara ado ntiense ibaña ndufo,
Abọọñ atie ke adisana tembịd amọ.
Ubiereikpe Nnọọ Sameria ye Yeruselem
3Se! Abọọñ asʌk ato itieidʌñ amọ adi;
anye asọiyọ adi, anyʌñ asaña ke mme ñkoñ-ñkoñ itie ke ederimbod.
4Mme ikpọabod eyeeme ke idak amọ,
mme abedeñ ñko esakka
nte akpọ atara ke ikañ,
nte mmọọñ atop awere atịkke abod.
5Afịd ami ato idiọọkñkpọ Yekọb,
ke ntak mme ndudue nditọ Isrel.
Nsoo ido idiọọkñkpọ Yekọb?
Idooho Sameria?
Nsoo ido ñkoñ-ñkoñ itie Yuda?
Idooho Yeruselem?
6“Ke ntak ado ami ñyaanam Sameria ado itoon mbio,
itie se etọ mme inwañ fain.
Ñyaaduọñọ mme itiad amọ ke abedeñ,
ñnyʌñ mfʌkkọ ifed idakisọñ amọ.
7Eyaeboom afịd mme ubobodñkpọ amọ mbai-mbai;
eyaefọp afịd mme enọ ke tembịd amọ ke ikañ;
ami ñyaasobo afịd mme ubobodñkpọ amọ.
Sia anye akekọọhọ mme enọ amọ ato utịb mme akpara,
ediisʌk ikama ammọ nte utịb mme akpara.”
Ntuaña ye Mfʌhọ
8Ke ntak ami, ami ñyaatua ñnyʌñ nsio ñkpo;
ñyaasaña ukod ñkaña ñnyʌñ nsaña ifed.
Ñyaabọọñ ñkpo nte ewaikọd
ñnyʌñ ñyommo nte ñkịdikịd.
9Sia udọñọ nsobo Sameria inieghe ukọk;
atara akewuọ Yuda.
Akewuọ ataa inuaatob ikọd mmi,
awuọ kpa Yeruselem.
10Kuutañ ke Kad;
kuutua ayịd ndomokeed.
Ke Bed Opra
were ke ntọñ.
11Saña boiyo ifed ye ke abuud,
ndufo se edʌñọ ke Safia.
Mbon se idʌñọ ke Saanan
idiiwuọhọ idi.
Bed Esel aba ke mfʌhọ;
anye ukpemeke fiin aba.
12Mbon e-edʌññọ ke Marod enwịne ke ubiak,
etie ebet unwam,
sia afanekọñ a-ato Abọọñ,
akewuọ kpa inuaatob Yeruselem.
13Ndufo se edʌñọ ke Lakis,
iyịt mme enañmbakara se isọp itọk ke sariọd.
Ndufo eba ke itie nte idiọọkñkpọ Adiaha Saiyọn aketọọñọ,
sia ekekịt mme ndudue Isrel ke idem ndufo.
14Ke ntoro ndufo eyaenọ mme enọ udiañña nsaña
esọk Moresed Kad.
Abio Aksịb adiido abiaña
anọ ndidem Isrel.
15Ñyaaben andidiikan ibịne ndufo
e-edʌññọ ke Maresa.
Mme ñkpisọñ Isrel
eyaefeeñe ekaa Adulam.
16Ikwat ided ndufo ke mfʌhọ,
inọ nditọ a-ndufo edatta esịd ebaña;
inam idem ndufo enie ebọ nte utere,
sia eyaekoono ammọ ekaa asen idịd.
Айни замон обунашуда:
Maika 1: ICB
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
Adisana Ñwed Abasi ke Ikọ Ibibio Ayio Mfịn™
© 2020, 2025 Biblica, Inc.
Enam ke emaekebọ Unyịmme. Emʌm afịd unen ekama ke afịd ederimbod.
Ibibio Contemporary Bible™
Copyright © 2020, 2025 by Biblica, Inc.
Used with permission. All rights reserved worldwide.