ROMMEI 8
8
Bumaengh Nthanmei Paan rui Lunghmei Panty
1Ntaw thu, Khrista khou bammei nunc ruc khou thu latzan nai dat mak khe. 2Kalam thu Khrista Jisu khou bampui paan rui aniu khou ringhmei phungc guangmei Bumaengc tuang pumtan tei rui ata#Baanhhy baibal asaekc khou nangniw ta twna khatni baihmei asaekc khou aniu ta twna hylou e. paapc khatni theihmei tuang pumtan khou rui tiduaklou the. 3Maansei rui suan tipui zaeng rui Riakdanv rui sw ngam makmei tei, Ravguangc rui taanclou the. Kamei rui Kanac Mpouh kahak ta paapcmei maansei kumhmei lwnlung swna ndiu guangna maansei khou naimei paapc ta latzan swna khaeng kuaklou the. 4Mi hei maansei lwnlung thei layna hamhna, Bumaengh thei layna lungc bammei aniu khang, Riakdanv rui samei guay tei taanc nthuihlou khang, Ravguangc rui taanclou tuang e. 5Meic pumc rui zaymei thei layna lungc bammei nunc tei, meic pumc rui kahawmei tei rui kaniw lungning tei sinsw the. Bumaengh Nthanmei rui zaymei thei layna lungc bammei nunc tei Bumaengh rui kahawmei tei rui kaniw lungning tei sinsw the. 6Meic pumc rui sinswmei thai thu theihmei e; tiki Bumaengh rui sinswmei thai thu ringhmei khatni chuzaenghmei e. 7Meic pumc tuang khou tei kalungning loupui mei tei thu Ravguangc ta zauczihpui mei e; tabuicho tiki kamei Ravguangc tuang riakdanv tei piu mak ge; kalam thu kamei piu ngam mak ge. 8Kaniw tuang meic pumc rui kahawmei khou tat bammei nunc tei Ravguangc ta tipian ngam mak ge.
9Nangniw lungc khou Ravguangc Bumaengc bam e thei, nangniw hei meic pumc rui kahawmei thei layna tatmei nunc hamh the; Bumaengh rui kahawmei thei layna tatmei nunc the. Thow pw ni kakhou Khrista Bumaengc maekpui mei tei thu Khrista mei hamh e. 10Nangniw khou Khrista bam e thei, paapc zaeng rui nangniw pumc theic sini, ravchaptatmei tiswloumei paan rui nangniw Bumaengc ringc e.#Nangniw bumaengc ringc e; hamh e thei Bumaengh hei nangniw khang ringhmei e. 11Jisu ta tiringcthauloumei Ravguangc tuang Bumaengc tei nangniw khou bam e thei, nangniw khou bammei katuang Bumaengc paan tei rui Khrista ta tiringcthauloumei pu tei rui nangniw tuang theihmei pumc khou tei ringhmei tiilou puni.#1 Ko 3.16
12Hei zaeng rui, chanathiu, aniu hei Bumaengh rui kahawmei thei layna lungc nina the, meic pumc rui kahawmei thei layna lungc nina hamh the. 13Nangniw tuang pumc rui kahawmei thei layna lungc e thei, nangniw theic puni; tiki nangniw pumc tuang taanv guay ta Bumaengh paan rui titheicna lungc e thei, nangniw ringc puni. 14Ravguangc Bumaengc rui zayloupui thei layna lungc bammei guay tei Ravguangc nac nunc e. 15Kalam thu, aniu khou tiiloumei hei bangh swna pingna bam dat nimei tuang Bumaengc hamh e; tiki Ravguangc nac swmei tuang Bumaengc de. Hei zaeng rui kapaan rui aniu Ravguangc ta “Abba, aPu!” twna kauc e.#Mrk 14.36; Gal 4.6 16Ravguangc Bumaengc rui aniu tuang bumaengc khou aniu hei Ravguangc nac nunc di the twna sa the. 17Aniu hei Ravguangc nac nunc e thei, kamei rui kanac nunc khang chamdaanvloumei tei laa nimei nunc the. Hei tei Khrista lev laa nchamc nimei nunc the. Kalam thu aniu Khrista lev ryanramei dam phungc nchamc e thei, katuang hymdaihmei dam laa nchamc puni.
Guang Nimei Hymdaihmei
18Ntaw aniu ryanramei ariw bammei hei thu aniu khang tii punimei hymdaihmei tei lev kida khang biuhpui tuang hamh e twmei ai chak ge. 19Ravguangc rui kanac nunc ta ndauh patlou nimei ta tei damcloumei ravsyam katana rui tarina nkhwan bam e. 20Kalam thu damcloumei mbaanv ti hei gancpat tina gaeng makmei sw kan the. Mi hei damcloumei ravsyam kamei rui kahawmei hamh e, Ravguangc rui kum kan di tho twlou tina di the.#Tha 3.17-19 21Tiki mi mbaanv ti hei taamc maan kan nimei khou rui kanlou datna Ravguangc nac nunc tuang hymdaihmei nyngswmei khou lay kazauh dat puni twmei rigwn thu nai e. 22Kalam thu damcloumei mbaanv hei meicpui naruimei kumcna, aseic nganvna kalangh kahymna bam e twmei aniu thay e. 23Mi kumcna bammei hei damcloumei ravsyam na hamh e; Ravguangc tuang reymei kaipat Bumaengh Nthanmei laamei aniu ni Ravguangc rui aniu ta kanac nunc tiswlou nimei#kanac nunc tiswlou nimei khatni twmei hei baanhhy baibal asaekc khou thu maek ge. khatni aniu pumc ta thuak patlou nimei ta nkhwanna aniu lungc khou kalangh kahym bam e.#2 Ko 5.2-4 24Kalam thu rigwnmei rui aniu ta kanlou the; tiki aniu rigwn bammei tei how e thei, hei tei rigwnmei hamh e. Kamei how bammei ta how puni twna rigwn bammei thow naina cho? 25Aniu how makmei ta rigwn e thei, aniu mi ta tei khaengvthayna nkhwan e.
26Aniu heidikamv suan tipui zaeng rui, mi hei kumcna Bumaengh rui aniu ta guang nkhavlou the. Aniu akumhna huayney nina cho twmei thay mak tipui zaeng rui, Bumaengh tei rui lat swna sa pat ngam makpui nganvna kahui kasingna aniu khang huayneylou bam e. 27Nthanmei nunc khang Ravguangc ningmei khou huayney bammei Bumaengc tuang lungning khou naimei guay tei aniu lungning thaymei Racguangc rui thay e.
28Ravguangc rui kata nzianmei, kamei rui ningmei thei layna kawloumei guay khang ramh lam guayna khou gay khang swlou e#ramh guayna gay khang swlou e twna baanhhy baibal asaekc khou hylou e. twmei aniu thay e. 29KaNac Mpouh tei rui, kachana nunc mpeyna pang khou nareimei swna bam khang, Ravguangc kamei rui kadahloumei nunc ta tei Kanac Mpouh kumh khang reicpatlou the. 30Mi kumna, Ravguangc kamei rui reicpatloumei nunc ta tei kaw guang the; kumna kamei rui kaw guangmei nunc ta tei ravchaptatmei swna laalou the, khatni katuang hymdaihmei ni tiilou the.
Khrista Jisu khou rui Ravguangc ramzian
31Mi kum e thei, mi kumc bammei khou hei aniu akumhna sa kho cho? Ravguangc rui aniu biak liangc bam e thei thow rui aniu ta ngam dat ni thena cho? 32KaNac Mpouh kahak ta daeklou makna aniu khang tii pat the! KaNac Mpouh tiipatmeipu kamei rui ramh guayna tii pw lak nah cho? 33Ravguangc rui kapahloumei nunc ta tei nkhuaimei e twna sa dat ngam nimei thow naina cho? Ravguangc rui kaniw ta ti-nzihlou the. 34Kum e thei, thow rui kaniw ta nkhuaimei de twna sa dat nina cho? Theicloumei na hamhna ringcthau datna Ravguangc tuang baanzat khou bamna aniu khang huaychalou bammei Khrista Jisu rui cho? 35Kum e thei, Khrista rui nzianmei khou rui aniu ta tabui rui sw ntamv dat ngam nina cho? Ryanra ryanriumei rui ny, rairiumei rui ny, nkow ndaapcmei rui ny, lungcsimei rui ny, theic suhmei rui ny?
36“Kaganv kathuic aniw nang khang rui theic suc nuhmei khou bam e;
aniw ti hei swluai nimei lauziu nunc ta kumcna swlou the,”
twna hylouna nai bammei kumcna,#Kal 44.22 37mi guay hei ariw bam sini, aniu ta nzianlou khwanmei kapaan rui aniu hei rihngammei nunc suangc sini ngammei nunc e. 38Kamei rui nzianmei khou rui aniu ta ramhkhat na rui sini sw ntamv dat ngam mak khe twmei ai nthanna thay e: theihmei rui ni, ringhmei rui ni; kauh baanchara rui ni, tingkauh kaipouc nunc rui ni; ntaw pat bammei rui ni, guang punimei rui ni; 39kauh thangc kandic rui ni, kabangc thangc kandic rui ni; damcloumei puat akhat na rui sini aniu ta aniu Poubauhmei Khrista Jisu paan rui Ravguangc rui aniu ta nzianlou khwanmei ramzian khou rui sw ntamv dat ngam mak khe.
Айни замон обунашуда:
ROMMEI 8: RONGBSI
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.