Sailm Dhaibhidh 75
75
Salm 75
1Dhut bheir sinn buidheachas, a Dhè,
dhut buidheachas a‑ghnàth:
Oir foillsichidh do mhìorbhailean,
gur fagas d'ainm gach là.
2Tràth gheibh mi is a ghlacar leam
coitheanal mòr na tìr',
Do nì mi dhaibh deagh bhreitheanas,
gu cothromach 's gu fìor.
3Sgaoileadh an dùthaich, is an sluagh
ga h‑àiteachadh a tha:
Ach mise cumaidh suas gu treun
postan na tìr a‑ghnàth.
4Thubhairt mi ris gach amadan,
Na gluais gu h‑amaideach:
'S ri luchd an uilc, Na togaibh suas
ur n‑adharc àrdanach.
5Ur n‑adharc fòs na togaibh suas,
ri cainnt le muineal cruaidh.
6Chan ann on ear, no 'n iar, no deas,
thig urram mòr no buaidh.
7Ach 's britheamh Dia, a leagas aon,
's a thogas aon fa seach.
8Oir cup an làimh an Tighearn tha
den fhìon as deirge dreach:
Làn coimeisg tha e, dòirtidh Dia
cuid as a‑mach gu grad:
A dheasgainn fàisgidh daoine daoi,
is òlaidh iad air fad.
9Ach cuiridh mise fòs an cèill
gu suthainn is gu sìor,
Do Dhia ud Iàcoib canar leam
àrd-mholadh binn gu fìor.
10Uil' adhaircean nan daoine daoi,
sgathaidh mi sìos 's gach àit;
Ach adhaircean nan saoi air fad
togar gu grad an àird.
Айни замон обунашуда:
Sailm Dhaibhidh 75: SD1992
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
© Comann Bhìoball na h-Alba (Scottish Bible Society) 1992.