Sailm Dhaibhidh 46
46
Salm 46
1'S e Dia as tèarmann dhuinn gu beachd,
ar spionnadh e 's ar treis:
An aimsir carraid agus teinn,
ar cobhair e ro‑dheas.
2Mar sin ged ghluaist' an talamh trom,
chan adhbhar eagail dhuinn:
Ged thilgeadh fòs na slèibhtean mòr'
am buillsgean fairg' is tuinn.
3Na h‑uisgeachan le beucaich bhuirb,
ged rachadh thar a chèil':
Len ataireachd ged bhiodh air chrith
na beanntan àrd' gu lèir.
4Tha abhainn ann, le 'sruthan sèimh,
nì cathair Dhè ro‑ait;
Fìor àite naomh an tì as àird',
am bheil sìor-chòmhnaidh aig.
5Tha Dia na meadhon innte staigh;
mar sin cha ghluaisear i;
Oir cuideachadh is còmhnadh leath'
's e Dia gu moch a nì.
6Do ghabh na cinnich boil', is ghluais
na rìoghachdan gu cas:
Air cur do Dhia a ghuth a‑mach,
do leagh an talamh as.
7Tha Dia nan sluagh leinn fhèin a‑ghnàth;
Dia Iàcoib 's tèarmann dhuinn.
8Thigibh, is faicibh oibrean Dhè,
gach sgrios air talamh rinn.
9Gu iomall fòs an domhain mhòir
an cogadh nì e chosg:
Am bogha bhris, an t‑sleagh do gheàrr,
an carbad-cogaidh loisg.
10Bibh sàmhach, 's tuigibh gur mi Dia:
àrdaichear mi gu sìor
Am measg nan sluagh, biodh urram dhomh
air feadh gach uile thìr.
11Tha Dia nan sluagh ri còmhnadh leinn,
's an còmhnaidh air ar crann:
Is e Dia Iàcoib 's tèarmann dhuinn,
dar furtachd anns gach àm.
Айни замон обунашуда:
Sailm Dhaibhidh 46: SD1992
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
© Comann Bhìoball na h-Alba (Scottish Bible Society) 1992.