Makko Ennyanjula
Ennyanjula
Enjiri eno yeeyasooka okuwandiikibwa ate y'esinga okuba ennyimpi. Enjiri eno yawandiikibwa omuyigirizwa ayitibwa Makko nga erinnya lye eddala ye Yokaana. N'olw'ekyo amanyiddwa nga Yokaana Makko, (Bik 12:12, 25; 15:37). Nnyina ye Malyamu ow'e Yerusaalemi, eyalina amaka ab'oluganda gye bakuŋŋaaniranga era yali mujjwa wa Balunnaba, (Bak 4:10). Makko ono yawerekerako omutume Pawulo mu lugendo lwe olw'Enjiri olwasooka, (Bik 12:25; 13:5). Nga amaze okwawukanako ne Pawulo yawerekerako Balunnaba mu kubuulira Enjiri, (Bik 15:39). Ekiseera ekinene yakimala Ruumi ng'ali ne Peetero era ku ye kwe yafunira byonna bye yawandiika. Buli muwandiisi w'Enjiri yalina abantu bagenderera okuwandiikira era n'engeri gye yawandiika ku Yesu. Yokaana Makko yawandiikira aba Ruumi. Kino akiraga ng'akozesa ebigambo byo Lulatini ebimu ate nga agezaako okunnyonnyola ebigambo ebimu ebya Aramayika, olulimi Yesu lwe yayogera basobole okubitegeera (3:17; 5:41; 7:34; 15:22). Makko assa nnyo essira ku ebyo Yesu bye yakola okusinga ku ebyo bye yayogera, amulaga nga omuweereza alina obuyinza obwa Katonda era amutegeeza nga omwana wa Katonda (1:1,11; 3:11; 5:7; 9:7; 13:32; 14:61; 15:39). Makko bwaba awandiika Yesu bye yakola akozesa nnyo ekigambo, amangwago, era awandiika nga agoberera ebitundu Yesu gye yagendanga.
Ebiri mu kitabo
I. Okwanjula Yesu (1:1-15).
II. Okulaga obuyinza bwa Yesu (1:16—8:26).
A. Obuweereza bwa Yesu obwasooka e Ggaliraaya (1:16—3:12).
B. Omulimu gwa Yesu nate e Ggaliraaya (3:13—6:6).
C. Omulimu gwa Yesu ebweru wa Ggaliraaya (6:7—8:26).
III. Omulimu gwa Yesu ogwasembayo mu Yerusaalemi, okubonyaabonyezebwa, okufa, n'okuzuukira kwa Yesu (8:27—16:20).
A. Yesu agenda e Yerusaalemi (8:27—10:52).
B. Wiiki eyasembayo mu Yerusaalemu ne ku miriraano gyakyo (11:1—13:37)
C. Okubonyaabonyezebwa, okufa n'okuzuukira kwa Yesu (14:1—16:8).
D. Ebisembayo (16:9-20).
Айни замон обунашуда:
Makko Ennyanjula: LBR
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
All rights are reserved to the Bible Society of Uganda.